ଭଦ୍ରକ, ୩ା୧୦ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଆଜି ଭାରତର କମ୍ୟୁନିଷ୍ଟ ପାର୍ଟି (ମାର୍କ୍ସବାଦୀ) ଭଦ୍ରକ ଆଞ୍ଚଳିକ କମିଟିର ୧୩ତମ ସମ୍ମିଳନୀ ସ୍ଥାନୀୟ ବାଲଗୋପାଲ ମନ୍ଦିର ସମ୍ମିଳନୀ କକ୍ଷରେ ଅନୁଷ୍ଠିତ ହୋଇଛି । ଏହି ସମ୍ମିଳନୀକୁ ପୂର୍ଣ୍ଣ ମାଝୀ, ରାଧାଶ୍ୟାମ ନାୟକ, ପ୍ରଭାତୀ ଜେନାଙ୍କୁ ନେଇ ଗଠିତ ସଭାପତି ମଣ୍ଡଳୀ ପରିଚାଳନା କରିଥିଲେ । ଏଥିପୂର୍ବରୁ ବନ୍ତଛକ ବସ୍ଷ୍ଟାଣ୍ଡ ଠାରେ ପାର୍ଟିର ଲାଲ ପତାକାକୁ ଚନ୍ଦ୍ରଶେଖର ନାୟକ ସାଥୀ ରାଧା ଦାସ, ନିରଂଜନ ପାଣି, ଅଭିନ୍ନ ରାୟ, ସେକ୍ କମର, ସେକ୍ କାଲୁ, ସେକ୍ ସତ୍ତାରୁଦ୍ଦିନ୍ଙ୍କ ଉପସ୍ଥିତିରେ ଉତ୍ତୋଳନ କରି ଏକ ଶୋଭାଯାତ୍ରାରେ ସହର ପରିକ୍ରମା କରିଥିଲେ । ଏହାକୁ ସିପିଆଇ(ଏମ୍) ର ରାଜ୍ୟ ନେତା ସନ୍ତୋଷ ଦାସ ଉଦ୍ଘାଟନ କରି କରୋନା ମହାମାରୀରେ ଦେଶବାସୀ ଭୟଙ୍କର ବିପଦରେ ପଡିଥିବାବେଳେ କେନ୍ଦ୍ର ଓ ରାଜ୍ୟ ସରକାର ଦେଶର ଜାତୀୟ ସଂପତ୍ତି ଯେଭଳି କର୍ପୋରେଟ୍ କଂପାନୀକୁ ବିକ୍ରି କରିବା ସହ ଡିଜେଲ୍, ପେଟ୍ରୋଲ ଓ ରନ୍ଧନ ଗ୍ୟାସ୍ ଦରଦାମ ବୃଦ୍ଧି କରୁଛନ୍ତି, ତାହାକୁ ତୀବ୍ର ସମାଲୋଚନା କରିଥିଲେ ।
ଏବଂ ୩ଟି କଳା କୃଷି ଆଇନ୍ ଓ ଶ୍ରମିକ ବିରୋଧୀ ୪ଟି ଶ୍ରମ କୋର୍ଡ ବାତିଲ କରିବାକୁ ଆହ୍ୱାନ ଦେଇଥିଲେ । ଆଞ୍ଚଳିକ କମିଟିର ସଂପାଦକ ରାଧା ଦାସ ଏକ ଲିଖିତ ରିପୋର୍ଟ ଉପସ୍ଥାପନ କରିବା ପରେ ତାହା ଉପରେ ୧୦ ଜଣ ସାଥୀ ଆଲୋଚନା କରିଥିଲେ । ବିଶେଷକରି ଦରଦାମ ବୃଦ୍ଧି, ମହିଳାମାନଙ୍କ ଉପରେ ଅତ୍ୟାଚାର ଓ ସଂସଦରେ ମହିଳା ବିଲ୍ ପାରିତ ଓ କୃଷକ ବିରୋଧୀ କଳା କୃଷି ଆଇନ୍ ପ୍ରତ୍ୟାହାର କରିବା ପାଇଁ ୩ଟି ପ୍ରସ୍ତାବକୁ ପ୍ରଭାତୀ ଜେନା, ଚକ୍ରଧର ପାତ୍ର, ଡ. ପ୍ରହ୍ଲାଦ ପତି ପ୍ରମୁଖ ଆଗତ କରିଥିଲେ । ଏହି ସମ୍ମିଳନୀରେ ଦିବଂଗତ ନେତା ରବି ମହାନ୍ତି, ମଂଗୁଳି ଦାସ, ଚନ୍ଦ୍ରକାନ୍ତ ବିଶ୍ୱାଳ, ଉପେନ୍ଦ୍ରନାଥ ଦାସ, ବଂଶୀଧର ଦାସଙ୍କ ପାଇଁ ଶୋକ ପ୍ରସ୍ତାବ ଆଗତ କରିଥିଲେ ଜିଲା ସଂପାଦକ ଦିବ୍ୟସିଂହ ନାୟକ । ସମ୍ମିଳନୀରେ ଏକ ନୂତନ ୧୩ ଜଣିଆ ସଦସ୍ୟଙ୍କୁ ନେଇ କମିଟି ନିର୍ବାଚିତ ହୋଇଥିଲା । ଏଥିରେ ସଂପାଦକ ଭାବେ ରାଧା ଦାସ ନିର୍ବାଚିତ ହୋଇଥିଲେ । ଏହି ସମ୍ମିଳନୀକୁ ରାଜ୍ୟ ନେତା ନିର୍ମଳ ନାୟକ ଉଦ୍ଯାପିତ କରି ତାଙ୍କ ବକ୍ତବ୍ୟରେ ଆମ ଦେଶ ଓ ରାଜ୍ୟରେ ଚାଲିଥିବା ଜନ ବିରୋଧୀ ନୀତି ବିରୁଦ୍ଧରେ ଆଗାମୀ ଦିନରେ ଶ୍ରମିକ ଓ କୃଷକମାନେ ଆଗେଇ ଆସିବାକୁ ଆହ୍ୱାନ ଦେଇଥିଲେ । ଶେଷରେ ବିନୋଦ ସାହୁ ଧନ୍ୟବାଦ ଦେଇଥିଲେ ।
