ଭଦ୍ରକ, ୩ା୮ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଗତ ୪ଦିନ ଧରି ଲଗାଣ ବର୍ଷା ଫଳରେ ଏହି ଜିଲାର ବନ୍ତ ଅଞ୍ଚଳର ବିଭିନ୍ନ ତଳିଆ ଅଞ୍ଚଳ ଗୁଡିକ ପ୍ରଭାବିତ ହୋଇଛି । ମଙ୍ଗଳବାର ରାତ୍ରରୁ ବର୍ଷା ଲାଗି ରହିବାରୁ ବିଶେଷ କରି ଏହି ବ୍ଲକ ଦେଇ ପ୍ରଭାହିତ ହେଉଥିବା ରେବ ଓ କପାଳି ନଦୀରେ କୃତିମ ବନ୍ୟା ପରିସ୍ଥିତି ସୃଷ୍ଟି ହୋଇଛି । ନଦୀ କୂଳିଆ ପଞ୍ଚାୟତ ଯଥା ବସନ୍ତିଆ,ରାମଚନ୍ଦ୍ରପୁର,ବନ୍ତ,ଟିଲୋ,ରାମପୁର,ରାମକୃଷ୍ଣପୁର ଆଦି ଅଧିକାଂଶ ଗ୍ରାମରେ ବନ୍ୟା ଜଳ ଯୋଗୁଁ ଅନେକଙ୍କ ଘରେ ପାଣି ପସିଥିବା ବେଳେ ଘରର କାନ୍ଥ ଭାଙ୍ଗିଛି । ଯଦିଓ ଆଜି ଏଠାରେ ବର୍ଷା ହୋଇନାହିଁ ଜଳ ସ୍ତର କିଛି ମାତ୍ରାରେ କମୁଥିବା ବେଳେ ବର୍ଷା ଯୋଗୁଁ ରାସ୍ତାଘାଟ ଧୋଇଯାଇ ଚାଷ ଜମି ଗୁଡିକ ଜଳ ମଗ୍ନ ହୋଇଛି । ଫଳରେ ବିଳମ୍ବରେ ଚାଷ କାମ ଆରମ୍ଭ କରିଥିବା ଚାଷୀ ମଥାରେ ଚଡକ ପଡିଛି । ବିଶେଷ କରି କପାଳି ନଦୀର ବଢି ପାଣିରେ ରାମଚନ୍ଦ୍ରପୁର ଗ୍ରାମର ସୁବାଷ ଜେନାଙ୍କ ଚାଳ ଛପର ଘରଟି ସଂପୂର୍ଣ୍ଣ ଭୁସୁଡି ପଡିଥିବା ବେଳେ ଏବେ ସେ ଗ୍ରାମର ମିଶନ ଶକ୍ତି ଗୋଷ୍ଠୀ ଗୃହରେ ଆଶ୍ରୟ ନେଇଛନ୍ତି । ଆଜି ବ୍ଲକ ଅଧ୍ୟକ୍ଷ ମନୋରଞ୍ଜନ ଘଡେଇ ଓ ସ୍ଥାନୀୟ ସରପଞ୍ଚ ପ୍ରିୟଙ୍କା ପ୍ରିୟଦର୍ଶନୀ ଦାସ ଏହି ପରିବାରକୁ ଆର୍ଥିକ ସହାୟତା ପ୍ରଦାନ କରିଥିବା ବେଳେ ସୁଖିଲା ଖାଦ୍ୟ ଯୋଗାଇ ଦେଇଛନ୍ତି । ଏତଦ୍ ଭିନ୍ନ ଏହି ଗ୍ରାମର ଡମ୍ବରୁଧର ମାଝି,ପ୍ରଶାନ୍ତ ମାଝି,କୋଇଲି ମାଝି,ଭରତ ଜେନା,ପାନବଦୀ ଗ୍ରାମର ଗୟାଧର ଜେନା ଓ ନିମାପଡ଼ାର ଉମାକାନ୍ତ ରାଉଳ ଏବଂ ଶ୍ରୀରାମ ପଣ୍ଡାଙ୍କ ଘର ଭାଙ୍ଗି ଥିବା ଜଣାପଡିଛି ।
କାଦବରାଙ୍ଗ ପଞ୍ଚାୟତ କାଦବରାଙ୍ଗ ଆଡିଆ ଭାୟା ବନ୍ତଳା ଗ୍ରାମ୍ୟ ଉନ୍ନୟନ ରାସ୍ତା ଉପରେ ଏବେ ମଧ୍ୟ ଦୁଇ ଫୁଟ ଉଚ୍ଚତାରେ ଜଳ ପ୍ରଭାହିତ ହେଉଛି । ବନ୍ତଳା ଠାରେ ଥିବା ଘୋସରାଟି ସଂପୂର୍ଣ୍ଣ ବୁଡିଯିବାରୁ କୁସୁନପୁର,ବନ୍ତଳା,ଏରେଣ୍ଡେଇ,ବାଙ୍କତିରା,ଭଗାରାମ,ତୁମ୍ବାପଦୀ ଅଦି ଗ୍ରାମର ଲୋକେ ଏହି ରାସ୍ତା ଦେଇ ଯିବା ଆସିବାରେ ବହୁ ଅସୁବିଧା ଭୋଗ କରୁଛନ୍ତି । ସେହିପରି ବଡ଼ବର୍ଚ୍ଚିକୟାଁ ପଞ୍ଚାୟତର ଆପ୍ତିରା ଷଡଙ୍ଗୀ ୟୁଜିଏମଇ ସ୍କୁଲରୁ ଷଡଙ୍ଗୀ ରାସ୍ତା ଏବଂ ଜେନା ସାହି ଆଖ ପାଖ ଅଞ୍ଚଳ ଜଳମଗ୍ନ ହୋଇଛି । ଏଥିରେ ପାଞ୍ଚ ଗୋଟି ପରିବାର ପ୍ରଭାବିତ ହୋଇ ଆପ୍ତିରା ସ୍କୁଲରେ ରହିଥିବା ବେଳେ ପଞ୍ଚାୟତ ପକ୍ଷରୁ ସରପଞ୍ଚ ପୁଷ୍ପାଞ୍ଜଳି ସ୍ୱାଇଁ ଓ ସମିତି ସଭ୍ୟ ସନ୍ତୋଷ ପହି,ନିର୍ବାହି ଅଧିକାରୀ ସଂଗୀତା ରାଣୀ ପାଣିଗ୍ରାହୀ ସୁଖିଲା ଓ ରନ୍ଧା ଖାଦ୍ୟ ଯୋଗାଇ ଦେଇଛନ୍ତି । ଏହି ପଞ୍ଚାୟତ ରାଉତ୍ରାଗଢିଆ ଗ୍ରାମର କାଶୀନାଥ ପାଳଙ୍କ ଘର ଉପରେ ବିରାଟକାୟ ଗଛ ଉପୁଡି ପଡିବାରୁ ବ୍ୟାପକ କ୍ଷତି ଘଟିଛି । ବଡମହିଁଷଗୋଠ ପଞ୍ଚାୟତର ମହିଁଷଗୋଠ ଗ୍ରାମରେ ବର୍ଷା ଜଳ ନିଷ୍କାସନ ନହେବାରୁ ପ୍ରଶାସନ ଉପସ୍ଥିତିରେ କିଆଁଶମଡିଆ କାଉପୁର ଭାୟା ଅଣିଜୋ ଗ୍ରାମ ଉନ୍ନୟନ ରାସ୍ତାକୁ କଟାଯାଇ ମରାମତି କରାଯାଇଛି । ବ୍ଲକ ପ୍ରଶାସନ ପକ୍ଷରୁ ଗୋଷ୍ଠୀ ଉନ୍ନୟନ ଅଧିକାରୀ ପ୍ରଦୀପ କୁମାର ସେଠୀ,ବ୍ଲକ ଅଧ୍ୟକ୍ଷ ମନୋରଞ୍ଜନ ଘଡେଇ,ଅତିରିକ୍ତ ତହସିଲଦାର ବିନିତାରାଣୀ କିସ୍କୁ ଏହି ବ୍ଲକର ଦୋଳପଦି,ନରସିଂହପୁର,ପଧାନପଡା,ଆପଣ୍ଡା,ରାମଚନ୍ଦ୍ରପୁର,ବଡମହିଁଷଗୋଠ ଆଦି ପ୍ରଭାବିତ ଅଞ୍ଚଳ ପରିଦର୍ଶନ କରି ସ୍ଥିତି ଅନୁଧ୍ୟାନ କରିବା ସହିତ ଲୋକ ମାନଙ୍କ ବିଭିନ୍ନ ସମସ୍ୟା ବିଷୟରେ ଆଲୋଚନା କରୁଛନ୍ତି । ମୋଟାମୋଟି ଭାବେ ବର୍ଷାଜଳ ନିଷ୍କାସନ ପାଇଁ ବିଭିନ୍ନ ସ୍ଥାନରେ ରାସ୍ତା କଟା ଯାଇଥିବା କେତେକ ସ୍ଥାନରେ ପବନରେ ଗଛ ଉପୁଡ଼ି ପଡ଼ି ଥିବା ଦେଖିବାକୁ ମିଳିଛି । ଅନ୍ୟପକ୍ଷରେ ପ୍ରଶାସନ ସ୍ଥିତିକୁ ସ୍ୱାଭାବିକ କରିବା ନେଇ ବ୍ୟବସ୍ତା କରୁଥିବା ଜଣାପଡିଛି ।
