ନୂଆଦିଲ୍ଲୀ ୯-୧୦ (ଓଡ଼ିଆ ପୁଅ) ୟୁପିର ଲକ୍ଷ୍ମୀପୁର ଖେରୀ ଘଟଣା ଏବେ ସାରା ଦେଶରେ ଆଲୋଚନା ହେଉଛି। ଅକ୍ଟୋବର ୩ ତାରିଖରେ ୪ ଜଣ କୃଷକଙ୍କ ସମେତ ୮ ଜଣଙ୍କୁ ଏକ କାର ଦ୍ୱାରା ଧକ୍କା ଦେଇଥିଲା। ଏହି ବିଷୟରେ କେନ୍ଦ୍ର ଗୃହମନ୍ତ୍ରୀ ଅଜୟ ମିଶ୍ର ଟେନିଙ୍କ ପୁଅ ଆଶିଷ ମିଶ୍ର ସନ୍ଦେହ ଘେରରେ ରହିଛନ୍ତି। ଏହି ଧାରାରେ ଆଜି ଆଶିଷ ମିଶ୍ର ଲକ୍ଷ୍ମୀପୁର ଖେରୀର କ୍ରାଇମ ବ୍ରାଞ୍ଚରେ ହାଜର ହୋଇଥିଲେ। ଯେଉଁଠାରେ ତାଙ୍କୁ ପ୍ରାୟ ଦଶ ଘଣ୍ଟା ଧରି ପଚରାଉଚରା କରାଯାଇଥିଲା। ଏଥି ସହ ଆଶିଷ ମିଶ୍ରଙ୍କ ଫୋନ ପୋଲିସ ଜବତ କରିଛି। ଅନ୍ୟପକ୍ଷରେ ଆଶିଷ ମିଶ୍ରଙ୍କୁ ପଚରାଉଚୁରାରେ ସନ୍ତୁଷ୍ଟ ନହେଲେ ଗିରଫ କରାଯାଇପାରେ ବୋଲି ବିଶ୍ୱାସ କରାଯାଉଛି।
ସୂଚନାଯୋଗ୍ୟଯେ, ଚାଷୀଙ୍କ ହତ୍ୟାକୁ ନେଇ ଲକ୍ଷ୍ନୌରୁ ଦିଲ୍ଲୀ ପର୍ଯ୍ୟନ୍ତ ଏକ ରାଜନୈତିକ ଉଷ୍ମତା ଆସିଛି। ବିରୋଧୀ ଦଳ ଅଜୟ ମିଶ୍ରଙ୍କୁ ମୋଦୀ କ୍ୟାବିନେଟରୁ ବହିଷ୍କାର କରିବାକୁ ଦାବି କରୁଥିବାବେଳେ ୯୨ ଘଣ୍ଟା ପରେ ଆଶିଷ ମିଶ୍ର ଗିରଫ ନହେବା ଉପରେ ପ୍ରଶ୍ନ ଉଠୁଛି।
ଏହାପୂର୍ବରୁ ଶୁକ୍ରବାର ଦିନ ଆଶିଷ ମିଶ୍ରଙ୍କୁ ହାଜର ହେବାକୁ କୁହାଯାଇଥିଲା। କିନ୍ତୁ ଆଜି ସକାଳେ ଏକ ସ୍କୁଟିରେ ବସି ସେ କ୍ରାଇମ ବ୍ରାଞ୍ଚ କାର୍ଯ୍ୟାଳୟରେ ପହଞ୍ଚିଥିଲେ। ସେ ମୁହଁରେ ରୁମାଲ ବାନ୍ଧିଥିଲେ। ଲକ୍ଷ୍ମୀପୁର ଖେରୀରେ କଡା ସୁରକ୍ଷା ବ୍ୟବସ୍ଥା କରାଯାଇଛି। କ୍ରାଇମ ବ୍ରାଞ୍ଚ ଏବଂ ଏସଆଇଟିର ଅଧିକାରୀଙ୍କ ବ୍ୟତୀତ ୟୁପି ପୋଲିସ ଆଶିଷଙ୍କୁ ପଚରାଉଚରା କରୁଛି। ଏହି ସମୟରେ ଆଶିଷଙ୍କ ଓକିଲ ମଧ୍ୟ ଉପସ୍ଥିତ ଥିଲେ। ନିଜର ନିର୍ଦ୍ଦୋଷତା ପ୍ରମାଣ କରିବାକୁ ଆଶିଷ ମଧ୍ୟ ପେନ୍ ଡ୍ରାଇଭ୍ ସାଥିରେ ନେଇଥିଲେ। ସେ କହିବାକୁ ଚାହାୁଥିଲେ ଯେ ଘଟଣା ସମୟରେ ସେ ଦଙ୍ଗଲ କାର୍ଯ୍ୟକ୍ରମରେ ଉପସ୍ଥିତ ଥିଲେ।
