ଭଦ୍ରକ, ୨୧ା୧୦ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଭଦ୍ରକ ସହରକୁ ସୌନ୍ଦର୍ଯ୍ୟକରଣ ପାଇଁ ପୌରପାଳିକା ପକ୍ଷରୁ ବିଭିନ୍ନ କାର୍ଯ୍ୟକ୍ରମ ହାତକୁ ନିଆଯାଇଥିବାବେଳେ ଟ୍ରଲି ବ୍ୟବସାୟୀମାନେ ଏଥିରେ ଅନ୍ତରାୟ ସୃଷ୍ଟି କରିଛନ୍ତି । ପ୍ରତ୍ୟେକଦିନ ସହରରେ ଟ୍ରାଫିକ୍ ଜାମ୍ କରୁଥିବାରୁ ଏହି ଟ୍ରଲି ଓ ଠେଲା ବ୍ୟବସାୟୀଙ୍କୁ ପୌରପାଳିକା ପକ୍ଷରୁ ଚେତାବନୀ ଦିଆଯାଉଛି । ଏଠାରେ ସୂଚନାଯୋଗ୍ୟ ଗତ କିଛିବର୍ଷ ଧରି ଭଦ୍ରକ ସହରର ମୁଖ୍ୟ ରାସ୍ତା କୁହାଯାଉଥିବା ଜିଲାପାଳଙ୍କ କାର୍ଯ୍ୟାଳୟ ଠାରୁ ଆରମ୍ଭ କରି ବାଇପାସ୍ ପର୍ଯ୍ୟନ୍ତ ଶତାଧିକ ଟ୍ରଲି ରିକ୍ସା ଫଳ, ପନିପରିବା, ଆଳୁ ଓ ପିଆଜ ଭଳି ଦ୍ରବ୍ୟକୁ ରଖି ଟ୍ରାଫିକ୍ ଜାମ୍ କରିଆସୁଛନ୍ତି । ଏହାଫଳରେ ପ୍ରତିଦିନ କୌଣସି ନା କୌଣସି ଦୁର୍ଘଟଣା ଘଟିବା ସହ ଯାତାୟତ କରୁଥିବା ବାଇକ୍ ଓ ଗାଡି ଚାଳକ ମାନେ ପାର୍କିଂରୁ ବଂଚିତ ହୋଇଆସୁଛନ୍ତି । ଏହି ଟ୍ରଲିଗୁଡିକର ଉଚ୍ଛେଦ ନେଇ ଜନସାଧାରଣ ଓ ବୁଦ୍ଧିଜୀବୀ ମାନଙ୍କ ପକ୍ଷରୁ ବହୁବାର ଦାବି କରାଯାଇଆସୁଥିଲା । ଏମାନଙ୍କ ପାଖରୁ ପୌରପାଳିକା ଟିକସ ବାବଦରେ ପ୍ରତିଦିନ ୧୦ ଟଙ୍କା ଆଦାୟ କରୁଛି । ତେବେ ଏହି ଠେଲା ଉପରେ ଶତାଧିକ ଗରିବ ଶ୍ରେଣୀର ଲୋକେ ନିର୍ଭର କରିଆସୁଥିବାବେଳେ ସେମାନଙ୍କୁ ଥଇଥାନ ନକରି ହଠାତ୍ ଗତକାଲି ରାତିରେ ମାଇକ୍ ଯୋଗେ ରାସ୍ତାପାଶ୍ୱର୍ରୁ ସେମାନେ ଉଠିଯିବା ପାଇଁ ଘୋଷଣା କରାଯାଇଥିଲା । ଏହାର ପ୍ରତିବାଦରେ ଆଜି ଶତାଧିକ ଟ୍ରଲି ବ୍ୟବସାୟୀ ପୌରପାଳିକା କାର୍ଯ୍ୟାଳୟ ଘେରାଉ କରିଥିଲେ । ପରେ ଏହି ଟ୍ରଲି ଚାଳକ ସଂଘର ସଭାପତି ଟୋନି ଅଲ୍ଲୀ, କଂଗ୍ରେସ ନେତା ନଳିନୀ ମହାନ୍ତି, ଟାଉନ୍ କଂଗ୍ରେସ ସଂପାଦକ ସେକ୍ ଫାଇଜାନ ଅଲ୍ଲୀ, ଅସରଫ ଅଲ୍ଲୀ ପ୍ରମୁଖ ପହଞ୍ôଚ ଏସ୍ଡିପିଓ ସାର୍ଥକ ରାୟ ଓ ପୌର କାର୍ଯ୍ୟନିର୍ବାହୀ ଅଧିକାରୀଙ୍କ ସହ ଆଲୋଚନା କରିଥିଲେ । ଏବଂ ୧୫ଦିନ ମଧ୍ୟରେ ଏହି ଟ୍ରଲି ବ୍ୟବସାୟୀଙ୍କୁ ଠିକ୍ ଭାବରେ ଥଇଥାନ କରାଯିବାର ନିଷ୍ପତ୍ତି ହୋଇଥିଲା । ଏବଂ ଏଥିସହ ଏକ କମିଟି ଗଠନ ପରେ ପୁନର୍ବାର ଆଲୋଚନା ହେବ ବୋଲି ସ୍ଥିର ହୋଇଥିଲା ।
