ହରିଚନ୍ଦନପୁର,ତା ୧୪ ଡିସେମ୍ବର (ଓଡ଼ିଆ ପୁଅ/ପ୍ରେମାନନ୍ଦ ଦାସ)କେନ୍ଦୁଝର ଜିଲ୍ଲା ହରିଚନ୍ଦନପୁର ବ୍ଲକ ଅନ୍ତର୍ଗତ ବ୍ରାହ୍ମଣୀପାଳ ନିକଟସ୍ଥ ଜନିଦାପାଳ ଗ୍ରାମରେ ବେକାରୀ ସମସ୍ୟାକୁ ନେଇ ଓଡ଼ିଶା ଡେଭ୍ଲମେଣ୍ଟ ଆସୋସିଏସନ୍ ପକ୍ଷରୁ ପଦଯାତ୍ରା ଅନୁଷ୍ଠିତ ହୋଯାଇଛି । ଏହି କାର୍ଯ୍ୟକ୍ରମରେ ଦୀପକ କୁମାର ରାଉତ, ବାପି ମହାରଣା, ମିଲନ ମହାରଣା, କଳାକାର ମହାନ୍ତ, ସବ୍ୟସାଚୀ ମହାନ୍ତ, ସୁବ୍ରତ ସ୍ୱାଇଁ ପ୍ରମୁଖଙ୍କ ଦ୍ୱାରା ୫୦ରୁ ଉର୍ଦ୍ଧ୍ବ ଯୁବକଙ୍କୁ ନେଇ ଏହି ପଦଯାତ୍ରା ଆରମ୍ଭ ହୋଇଥିଲା । ଦୈତାରୀ ଓଏମସିର ଲୁହାପଥର ଖଣି ଓ ବ୍ରାହ୍ମଣୀପାଳ ଠାରେ ଥିବା ଟାଟାଷ୍ଟିଲ ପ୍ଲାଣ୍ଟ ଏହି ଅଞ୍ଚଳରୁ ପ୍ରତ୍ୟେକ ଦିନ କୋଟିକୋଟି ଟଙ୍କା ଲାଭ ପାଉଥିବା ବେଳେ କର୍ତ୍ତୃପକ୍ଷ ସ୍ଥାନୀୟ ଜନସାଧାରଣଙ୍କ କଥା ବୁଝୁ ନାହାନ୍ତି । ଏଠାକାର ଆଦିବାସୀ ଶ୍ରେଣୀର ଲୋକଙ୍କ ପରିବାର ପ୍ଲାଣ୍ଟ ଓ ଖଣିର ଧୂଳିଧୂଆଁରେ ଅସ୍ତବ୍ୟସ୍ତ ହେଉଥିବା ସହ ଅନେକ କ୍ଷତିର ସମ୍ମୁଖୀନ ହେଉଛନ୍ତି । ଏଥିସହ ଏଅଞ୍ଚଳର ଶିକ୍ଷିତ ଯୁବକ ଯୁବତୀମାନେ କାମଧନ୍ଦା ନପାଇ ବେକାର ହୋଇ ଘୁରି ବୁଲୁଥିବା ସହ ଏହି ସଂସ୍ଥାମାନଙ୍କ ନିଯୁକ୍ତି ପାଇଁ ବାରମ୍ବାର ଦୈାଡି ନିରାଶ ହେଉଛନ୍ତି । ଏଅଞ୍ଚଳର ଅନେକ ଆଦିବାସୀ ଶ୍ରେଣୀର ଯୁବକ ଯୁବତୀମାନେ କାମ ନପାଇ ବାହାର ରାଜ୍ୟକୁ ଦାଦନ ଖଟିବାକୁ ପଳାଇଥିବା ବେଳେ ଅନେକ କାମଧନ୍ଦାରୁ ବଞ୍ଚିତ ହୋଇ ଘରେ ବସି ରହିଛନ୍ତି । ଉକ୍ତ ଯୁବକ ଯୁବତୀମାନଙ୍କୁ ନିଯୁକ୍ତି ଦାବି ନେଇ ଆଜି ୫୦ରୁ ଉର୍ଦ୍ଧ୍ବ ଯୁବକ ଏକତ୍ରିତ ହୋଇ ଷ୍ଟିଲ ପ୍ଲାଣ୍ଟର ଦାୟିତ୍ଵରେ ଥିବା ଅଧିକାରୀଙ୍କୁ ଦାବିପତ୍ର ପ୍ରଦାନ କରିଛନ୍ତି । ଅଧିକାରୀଙ୍କ ସୂଚନା ଅନୁଯାୟୀ ୩୦ଦିନ ମଧ୍ୟରେ ଉକ୍ତ ସମସ୍ୟାର ସମାଧାନ କରିବାକୁ ପ୍ରତିଶୃତି ଦେଇଥିବା ଜଣାପଡିଛି । ନଚେତ୍ ଆଗାମୀ ଦିନରେ ଏଅଞ୍ଚଳର ସମସ୍ତ ବେକାରୀ ଶିକ୍ଷିତ ଯୁବକ ଯୁବତୀ ଏକତ୍ରିତ ହୋଇ ରାଜରାସ୍ତାକୁ ଓହ୍ଲାଇବା ସହ ଆନ୍ଦୋଳନର ପନ୍ଥା ଆପଣାଇବାକୁ ଚେତାବନୀ ଦେଇଛନ୍ତି ।
