ହରିଚନ୍ଦନପୁର,ତା ୨୫ ନଭେମ୍ବର (ଓଡ଼ିଆ ପୁଅ/ପ୍ରେମାନନ୍ଦ ଦାସ) କେନ୍ଦୁଝର ଜିଲ୍ଲା ହରିଚନ୍ଦନପୁର ଥାନା ଓ ତହସିଲ ଅନ୍ତର୍ଗତ ଟାଙ୍ଗିରିଆପାଳ ଗ୍ରାମ ପଞ୍ଚାୟତ ଗୋଳାଗାଡିଆ ଗ୍ରାମରେ ଥିବା ସର୍ବସାଧାରଣଙ୍କ ଉଦ୍ଦିଷ୍ଟ ସରକାରୀ ଜମିକୁ ଜଣେ ବ୍ୟକ୍ତି ବେଆଇନ୍ ଭାବେ ଜବରଦଖଲ କରିବାକୁ ଉଦ୍ୟମ କରିଥିଲେ । ଯାହାକୁ ନେଇ ଗ୍ରାମର ଶତାଧିକ ଲୋକ ଏହାକୁ ବିରୋଧ କରି ୬ ଜାନୁଆରୀରେ ଜିଲ୍ଲାପାଳଙ୍କ ଜନଶୁଣାଣୀ ଓ ଉପଜିଲ୍ଲାପାଳଙ୍କ ପାଖରେ ଲିଖିତ ସହ ମୌଖିକ ଅଭିଯୋଗ କରିଥିଲେ । ଅଭିଯୋଗ ପରେ ଜିଲ୍ଲାପାଳ କିମ୍ବା ଉପଜିଲ୍ଲାପାଳ ଘଟଣାକୁ ନେଇ କୌଣସି ପଦକ୍ଷେପ ଗ୍ରହଣ କରିନଥିଲେ । ଗ୍ରାମର ୧୦୦ ପରିବାରଙ୍କ କର୍ମରେ ଆସୁଥିବା ପ୍ରାୟତଃ ୧ଏକର ୩୦ଡିସିମିଲ ସରକାରୀ ଜମିରେ ବାରିଗାଁ ଟିକରସାହିର ଅର୍ଜ୍ଜୁନ ସୋରେନ୍ ନାମକ ବ୍ୟକ୍ତି ଗତ ୧୨ ଜୁଲାଇ ରାତିରେ ବେଆଇନ୍ ଭାବେ ଘର ନିର୍ମାଣ କାର୍ଯ୍ୟ ଆରମ୍ଭ କରିଥିଲେ । ଯାହାକୁ ନେଇ ଗ୍ରାମର ୧୦୦ପରିବାରର ଶତାଧିକ ଲୋକ ଏହାକୁ ବିରୋଧ କରିଥିଲେ । ଗ୍ରାମବାସୀଙ୍କ ବିରୋଧ ପରେ ଘର କାର୍ଯ୍ୟକୁ ବନ୍ଦ କରି ଅର୍ଜ୍ଜୁନ ୧୩ ତାରିଖ ହରିଚନ୍ଦନପୁର ଥାନାରେ ମାଡ଼ ମରାଯାଇଥିବା କହି ମିଥ୍ୟାରେ ଗ୍ରାମର ୬୨ଜଣଙ୍କ ନାମରେ ଲିଖିତ ଅଭିଯୋଗ କରିଥିଲେ । ଘଟଣାଟି ଜମିବାଡ଼ି ସମ୍ପର୍କିତ ଅଭିଯୋଗ ହୋଇଥିବାରୁ ପୋଲିସ ଘଟଣାର କୌଣସି ବିଚାର ନକରି କେଶ୍ ନମ୍ବର ୪୩/୨୦୨୦ ୟୁ/ଏସ ୧୦୭ ସିଆରପିସିରେ ମାମଲା ରୁଜୁ କରିଥିଲେ । ସେହି କେଶର ନୋଟିସ୍ ଗତ ୩ ନଭେମ୍ବରରେ ୬୨ଜଣଙ୍କ ପାଖରେ ପହଞ୍ଚିଥିଲା, ସେଥିରେ ୨୫ ନଭେମ୍ବର ଦିନ ତହସିଲ କାର୍ଯ୍ୟାଳୟରେ ହାଜର ହେବାକୁ ଉଲ୍ଲେଖ ରହିଥିଲା । ଆଜି ଉକ୍ତ ୬୨ଜଣଙ୍କ ମଧ୍ୟରୁ ଦେହ ଅସୁସ୍ଥ କାରଣରୁ ୫୯ଜଣ ଖର୍ଚ୍ଚାନ୍ତ ହୋଇ ତହସିଲ କାର୍ଯ୍ୟାଳୟରେ ପହଞ୍ଚି ଦାୟିତ୍ଵରେ ଥିବା ଅତିରିକ୍ତ ତହସିଲଦାରଙ୍କୁ ୨ହଜାର ଟଙ୍କା ଲେଖାଏଁ ଏଗ୍ରିମେଣ୍ଟ୍ ବଣ୍ଡ ଦେଇ ଘରକୁ ଫେରୁଥିବା ଜଣାପଡ଼ିଛି । ଏଠାରେ ପ୍ରଶ୍ନ ଯେ ସର୍ବସାଧାରଣଙ୍କ କାର୍ଯ୍ୟରେ ଲାଗୁଥିବା ସରକାରୀ ଜମିକୁ ଜବରଦଖଲରୁ ସୁରକ୍ଷିତ ରଖିବା ଗ୍ରାମର ଆଦିବାସୀଙ୍କ ଲୋକଙ୍କ ପାଇଁ ହେଲା କାଳ । ଯାହାକୁ ନେଇ କରୋନା ମହାମାରୀର କଟକଣା ସମୟରେ ସମସ୍ତେ ଘରେ ହାତବାନ୍ଧି ବସି ରହିଥିବା ବେଳେ ଏହି କେଶ୍ ପାଇଁ ବାଧ୍ୟ ହୋଇ ଧାନ ଚାଉଳ ଓ ଧାରକରଜ୍ କରି ୫୯ଜଣ ଏଗ୍ରିମେଣ୍ଟ ବଣ୍ଡ ଦେଇଥିବା ଜଣାପଡିଛି । ଏଥିପ୍ରତି ଜିଲ୍ଲା ପ୍ରଶାସନ ଦୃଷ୍ଟି ଦେଇ ଯଥାଶୀଘ୍ର ନିର୍ଦୋଷରେ ଦଣ୍ଡ ପାଇଥିବା ଉକ୍ତ ଗରିବ ଆଦିବାସୀଙ୍କୁ ଉଚିତ୍ ନ୍ୟାୟ ପ୍ରଦାନ କରିବାକୁ ଜନସାଧାରଣ ଓ ବୁଦ୍ଧିଜୀବି ମହଲରେ ଦାବି ହୋଇଛି ।
