ନୂଆଦିଲ୍ଲୀ ୧୫-୩ (ଓଡ଼ିଆ ପୁଅ): ମଧ୍ୟପ୍ରଦେଶ ଜବଲପୁର ହାଇକୋର୍ଟ ବିବାହିତ ଝିଅମାନେ ଅନୁକମ୍ପା ମୂଳକ ନିଯୁକ୍ତି ପାଇବାକୁ କ୍ଷମତା ଦେଇଛନ୍ତି। ଜଷ୍ଟିସ ସଞ୍ଜୟ ଦ୍ୱିବେଦୀଙ୍କ ଏକକ ବେଞ୍ଚ ଏକ ମାମଲାର ଶୁଣାଣି କରି ଅନୁକମ୍ପା ମୂଳକ ନିଯୁକ୍ତି ପାଇଁ ଅଯୋଗ୍ୟ ରଖାଯାଇଥିବା ପୋଲିସ ମୁଖ୍ୟାଳୟର ଆଦେଶକୁ ଖଣ୍ଡନ କରିଛନ୍ତି।
ସୂଚନାଯୋଗ୍ୟ ଯେ, ସୁହାଗି ନିବାସୀ ପ୍ରୀତି ସିଂଙ୍କ ଦ୍ବାରା କୋର୍ଟରେ ଏକ ପିଟିସନ ଦାଖଲ କରାଯାଇଥିଲା ଯେଉଁଥିରେ ସେ କହିଥିଲେ ଯେ ତାଙ୍କ ମାତା ମୋହନ ସିଂଙ୍କୁ ସତନା ଜିଲ୍ଲାର କୋଲାଗୱାନ ପୋଲିସ ଷ୍ଟେସନରେ ଏଏସଆଇ ପଦରେ ପୋଷ୍ଟ କରାଯାଇଥିଲା। ଡ୍ୟୁଟିରେ ଥିବାବେଳେ ସେ ୨୩ ଅକ୍ଟୋବର ୨୦୧୪ ରେ ମୃତ୍ୟୁ ବରଣ କରିଥିଲେ। ସେମାନେ ଦୁଇ ଭଉଣୀ ଏବଂ ଦୁହେଁ ବିବାହିତା।
ମା’ଙ୍କ ମୃତ୍ୟୁ ପରେ ପ୍ରୀତି ସିଂ ଅନୁକମ୍ପା ମୂଳକ ନିଯୁକ୍ତି ପାଇଁ ଆବେଦନ କରିଥିଲେ କିନ୍ତୁ ପୋଲିସ ମୁଖ୍ୟାଳୟ ତାଙ୍କୁ ଅଯୋଗ୍ୟ ଘୋଷଣା କରିଥିଲେ। ୨୨ ଜାନୁଆରୀ ୨୦୧୫ ପୋଲିସ୍ ମୁଖ୍ୟାଳୟ, ଅନୁକମ୍ପା ମୂଳକ ନିଯୁକ୍ତି ନୀତି ପାରାଗ୍ରାଫ୍ ୨.୪ କୁ ଦର୍ଶାଇ ଏକ ଚିଠି ଜାରି କରି ଦର୍ଶାଇଥିଲେ ଯେ, ଜଣେ ବିବାହିତ ଝିଅଙ୍କୁ ଅନୁକମ୍ପା ମୂଳକ ନିଯୁକ୍ତି ଦିଆଯାଇପାରିବ ନାହିଁ।
ଏହା ପରେ ପୀଡିତା କୋର୍ଟରେ ଏକ ମାମଲା ଦାୟର କରିଥିଲେ। ବର୍ତ୍ତମାନ କୋର୍ଟ ତାଙ୍କ ସପକ୍ଷରେ ରାୟ ଦେଇଛନ୍ତି। ଏହି ପରିପ୍ରେକ୍ଷୀରେ ଆବେଦନକାରୀଙ୍କ ଓକିଲ କହିଥିଲେ ଯେ, ସମ୍ବିଧାନର ଧାରା ୧୪ ଅନୁଯାୟୀ, ମହିଳା ହେବା ଆଧାରରେ କାହାକୁ ଭେଦଭାବ କରାଯାଇପାରିବ ନାହିଁ। ଅନ୍ତିମ ଶୁଣାଣି ପରେ ଆବେଦନକାରୀଙ୍କୁ ଅନୁକମ୍ପା ମୂଳକ ନିଯୁକ୍ତି ପାଇଁ ଅଯୋଗ୍ୟ କରିବା ପାଇଁ ହାଇକୋର୍ଟ ପୋଲିସ ମୁଖ୍ୟାଳୟ ଆଦେଶକୁ ଖଣ୍ଡନ କରିଛନ୍ତି।
