ଭଦ୍ରକ, ୨ା୧୨ (ଓଡ଼ିଆ ପୁଅ / ସ୍ନିଗ୍ଧା ରାୟ) – ସରକାର ନ୍ୟାୟପାଳିକାକୁ ଅଧିକ କ୍ରିୟାଶୀଳ କରାଇ ଜନସାଧାରଣଙ୍କୁ ସରଳ ଓ ସୁବିଧାରେ ଆଇନଗତ ସହାୟତା ପ୍ରଦାନ ଉଦ୍ଦେଶ୍ୟରେ ପ୍ରତି ତହସିଲ ଅଧୀନରେ ଗୋଟିଏ ଲେଖାଏଁ ପ୍ରଥମ ଶ୍ରେଣୀ ବିଚାର ବିଭାଗୀୟ ତଥା କନିଷ୍ଠ ଦେୱାନୀ ଅଦାଲତ ପ୍ରତିଷ୍ଠା କରିବାର ଯୋଜନା କରିଛନ୍ତି । ଇତିମଧ୍ୟରେ ଭଦ୍ରକ ଜିଲାର ଧାମନଗର ,ଚାନ୍ଦବାଲି ବ୍ଲକ ରେ ଉକ୍ତ କୋଟ କିଛି ବର୍ଷ ହେବ ପ୍ରତିଷ୍ଠା ହୋଇସାରିଥିବାବେଳେ ସମସ୍ତ ଦୃଷ୍ଟି କୋଣରୁ ବନ୍ତ ଏକ ସମସ୍ୟା ବହୁଳ ଅଂଚଳ ହୋଇଥିବାରୁ ଉକ୍ତ ସ୍ଥାନରେ କୋଟ ପ୍ରତିଷ୍ଠା କରିବା ଅବଶ୍ୟମ୍ଭାବି ହୋଇପଡ଼ିଛି । ଏହି ବ୍ଲକ ଅଧିନରେ ଏକ ଲକ୍ଷ ସତୁରୀ ହଜାର ରୁ ଅଧିକ ଜନସଂଖ୍ୟା ବିଶିଷ୍ଟ ଥିବାରୁ ଜନସଂଖ୍ୟାର ଘନତା ,ଦୂରତା ଓ ବିଭିନ୍ନ ମାମାଲା କୁ ନେଇ ପୂର୍ବରୁ ବନ୍ତରେ କୋଟ ପ୍ରତିଷ୍ଠା ହେବାର ସୂଚନା ମିଳିଥିଲା । ଏହାକୁ ଯଥାଶିଘ୍ର କାର୍ଯ୍ୟକାରୀ କରିବାପାଇଁ ଓକିଲ ସଂଘ , ସର୍ବସାଧାରଣ ଜନତା ଓ ବିଭିନ୍ନ ରାଜନୈତିକ ଦଳପକ୍ଷରୁ ଦାବୀପତ୍ର ପ୍ରଦାନ ପରେ ବନ୍ତ କଲ୍ୟାଣ ମଣ୍ଡପକୁ ମରାମତି କରାଯାଇ ସେଥିରେ ଅସ୍ଥାୟୀ କୋଟ ପ୍ରତିଷ୍ଠା ପାଇଁ ସ୍ଥିର ହୋଇଥିଲା । ଇତି ମଧ୍ୟରେ ଉକ୍ତ ଗୃହର ସମସ୍ତ କାର୍ଯ୍ୟ ସମ୍ପନ୍ନ ହୋଇ ଏକବର୍ଷରୁ ଅଧିକ ସମୟ ବିତିଥିବା ବେଳେ କାର୍ଯ୍ୟକାରୀ ହୋଇନି ଏହାକୁ ନେଇ ଜନଅସନ୍ତୋଷ ବୃଦ୍ଧିପାଉଛି । ସ୍ଥାନୀୟ ଅଂଚଳବାସୀ ସାଧାରଣ ନିର୍ବାଚନ ପୂର୍ବରୁ ଉକ୍ତ କୋଟର ଶୁଭାରମ୍ଭ ହେବାର ବହୁ ଆଶା ପୋଷଣ କରିଥିବା ବେଳେ ଅଦ୍ୟାବଧି କିଛି ଗ୍ରୀନ ସିଗ୍ନାଲ ମିଳିନଥିବାର ୁସେମାଙ୍କ ମଧ୍ୟରେ ଅସନ୍ତୋଷ ଦେଖାଯାଇଛି । ବର୍ତର୍ତ୍ତମାନ ପ୍ରତ୍ୟେକ ଛୋଟ ବଡ଼ ମାମଲା ପାଇଁ ଲୋକମାନଙ୍କୁ ଦୂରତାରେ ଥିବା ଭଦ୍ରକ କୋଟ କୁ ଯିବାକୁ ପଡୁଛିି । ଏହି ବ୍ଳକ ଅଧୀନରେ ୨୦୫ଟି ରାଜସ୍ୱ ଗ୍ରାମର ତିନିଗୋଟି ଜିଲାପରିଷଦ ଜୋନ ୨୫ ଗୋଟି ପଂଚାୟତ ର ଜନସାଧାରଣ ବ୍ଲକ୍ ସଦର ମୋହକୁମା ଉପରେ ଦୈନଦିନ ନିର୍ଭର କରନ୍ତି । ଏହାର ପରିସୀମା ଓ ଜନସଂଖ୍ୟା ଦୃଷ୍ଟିରୁ ଦୈନ ଦିନ ଏହି ଅଂଚଳରେ ଘଟୁଥିବା ଆପରାଧିକ ମାମଲାକୁ ନିୟନ୍ତ୍ରଣ କରିବା ପାଇଁ ବନ୍ତ , ଆଗରପଡ଼ା ଥାନା ସହ କେନ୍ଦୁଆପଦା ଫାଣ୍ଡି ଆଦି କାଯ୍ୟ କରୁଛନ୍ତି । ଅନ୍ୟପକ୍ଷରେ ବନ୍ତରେ ପ୍ରାୟ ସମସ୍ତ ବିଭାଗର ସରକାରୀ କାର୍ଯ୍ୟଳୟ ସମେତ ୪ଟି ବ୍ୟାଙ୍କ, ଉପ ଡାକଘର, ସ୍କୁଲ୍, କଲେଜ, ବ୍ୟବସାୟ ପ୍ରତିଷ୍ଠାନ ତଥା ବୈଷୟିକ ଶିକ୍ଷାନୁଷ୍ଠାନମାନ ରହିଥିବାସହ ଏହାର ମଧ୍ୟମ ଭାଗରେ ୫୩ ନଂ. ଭଦ୍ରକ-କେନ୍ଦୁଝର ରାଜ୍ୟ ରାଜପଥ ଗତିକରିଛିି । ଏହି ଅଂଚଳର ନାନା ବିଧ ସମସ୍ୟା ଦୃଷ୍ଟିରୁ ଉକ୍ତ ସ୍ଥାନରେ ଯଥାଶିଘ୍ର ପ୍ରଥମଶ୍ରେଣୀ ବିଚାର ବିଭାଗୀୟ କୋର୍ଟ କୁ ଯଥାଶିଘ୍ର କାର୍ଯ୍ୟକାରୀ କରିବାକୁ ଅଂଳବାସୀ ଙ୍କ ତରଫରୁ ଦୃଢ଼ ଦାବୀ ହେଉଛି ।
