ଭଦ୍ରକ, ୧୦ା୯ (ଓଡ଼ିଆ ପୁଅ / ସ୍ନିଗ୍ଧା ରାୟ) -ଜିଲା ପୁଲିସ୍ ମୁଖ୍ୟ କାର୍ଯ୍ୟାଳୟରେ ବିଭାଗୀୟ ଅବ୍ୟବସ୍ଥାକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି । ବିଶେଷକରି ଥାନାରୁ ନ୍ୟାୟ ନପାଇ ପୁଲିସ୍ ମୁଖ୍ୟଙ୍କୁ ସାକ୍ଷାତ୍ କରି ଦୁଃଖ ଜଣାଇବା ପାଇଁ ଜିଲାର ବିଭିନ୍ନ ପ୍ରାନ୍ତରରୁ ଆସୁଥିବା ସାଧାରଣ ଲୋକ ବହୁ ସମୟ ଧରି ଅପେକ୍ଷା କରିବାକୁ ପଡୁଛି । ଏନେଇ ଅସେନ୍ତାଷ ପ୍ରକାଶ ପାଇଛି । ଭୟରେ ମୁହଁ ଫିଟାଇ ପାରୁନାହାଁନ୍ତି । ନିକଟରେ ଟାଉନ୍ ଥାନା ପରିସରରେ ଆଦର୍ଶ ଥାନାକୁ ଉଦ୍ଘାଟନ କରିବାକୁ ଆସିଥିବା ରାଜ୍ୟ ପୁଲିସ୍ ଡିଜି ଜିଲା ପୁଲିସ୍ର ଉତ୍ତମ ସେବା ଉପରେ ଗୁରୁତ୍ୱ ଦେଇଥିଲେ । ଜନତାଙ୍କ ଉଦ୍ଦେଶ୍ୟରେ ସେ କହିଥିଲେ ଯେ ପୁଲିସ୍ ଏବେ ପିପୁଲ ଫ୍ରେଣ୍ଡଲି ହୋଇଥିବାରୁ ପ୍ରତ୍ୟେକ ବ୍ୟକ୍ତି ନିଜ ଥାନାରେ ଅଭିଯୋଗ କରିପାରିବେ । ଥାନାରେ ନ୍ୟାୟ ନମିଳିଲେ ଆଇନ୍କୁ ନିଜ ହାତକୁ ନନେଇ ଉଚ୍ଚ କର୍ତ୍ତୃପକ୍ଷଙ୍କ ନିକଟରେ ଅଭିଯୋଗ କରିପାରିବେ । ଡିଜିଙ୍କ ଏହି ପରାମର୍ଶ ଜିଲାରେ ବିପରୀତ ଗତିରେ ଚାଲିଛି । ଜିଲାର ବିଭିନ୍ନ ଥାନା ଅଂଚଳର ଗାଁ ଲୋକ ସ୍ଥାନୀୟ ଥାନାରୁ ନ୍ୟାୟ ନପାଇ ବୁଢା-ବୁଢୀ ବୟସ୍କ ବ୍ୟକ୍ତି ମହିଳା ଏସ୍ପିଙ୍କ ଠାରୁ ନ୍ୟାୟ ପାଇବା ଆଶାରେ ଦୌଡି ଆସିଥାନ୍ତି । ଏମାନଙ୍କ ପାଇଁ ମୁଖ୍ୟ କାର୍ଯ୍ୟାଳୟର ପ୍ରବେଶ ପଥରେ ଲମ୍ବା ସୋଫାର ବ୍ୟବସ୍ଥା ରହିଛି ।
କିନ୍ତୁ ସାହେବଙ୍କୁ ଦେଖା କରିବା ପାଇଁ ଘଣ୍ଟା ଘଣ୍ଟା ଧରି ଅପେକ୍ଷା କରିବାକୁ ପଡିଥାଏ । କେବଳ ଜନସାଧାରଣ ନୁହଁ ସମ୍ବାଦପତ୍ରର ପ୍ରତିନିଧିମାନଙ୍କୁ ଏଭଳି ଦୁର୍ଦ୍ଦଶା ଭୋଗିବାକୁ ପଡିଥାଏ । ସାହେବଙ୍କ ଡାକରା କେତେବେଳେ ଆସିବ, ନ୍ୟାୟ ପାଇବା ପାଇଁ ଅପେକ୍ଷାରତ ଚାତକ ଭଳି ଚାହିଁବସିଥାନ୍ତି । ଦୂର ଦୂରାନ୍ତରୁ ଆସୁଥିବା ଲୋକମାନେ ଏତେ ସମୟ ଅପେକ୍ଷା କରି ଥକାରେ ଶୋଇପଡିଥିବାର ଦୃଶ୍ୟ ଦେଖିବାକୁ ମିଳିଥାଏ । ସାହେବଙ୍କ ଦ୍ୱାରପାଳଙ୍କୁ ପଚାରିଲେ ଫାଇଲ୍ କାମ ଚାଲିଛି, କାମ ସରିଲେ ସାର୍ ଡାକିବେ ବୋଲି ଉତ୍ତର ମିଳେ । ଏଠି ପ୍ରଶ୍ନ ଉଠୁଛି ଫାଇଲ୍ କାମ ଆଗ ନା ଜନସାଧାରଣଙ୍କ ଅଭିଯୋଗ ଶୁଣିବା ଆଗ । ଜିଲା ପୁଲିସ୍ କେତେ ପିପୁଲ ଫ୍ରେଣ୍ଡଲି ତାହା ଏଥିରୁ ସ୍ପଷ୍ଟ ଅନୁମେୟ କରାଯାଇପାରେ । ତମାମ୍ ଜିଲାରେ ଆଇନ୍ ଶୃଙ୍ଖଳା ପରିସ୍ଥିତି ଉଦ୍ବେଗ ଜନକ ସ୍ଥିତିରେ ପହଞ୍ôଚଛି । ଜିଲାରେ କେହି ସୁରକ୍ଷିତ ନୁହଁନ୍ତି । ସରକାରୀ କର୍ମଚାରୀମାନଙ୍କୁ ମାଡ ମାରିବା, ଏପରିକି ପୁଲିସ୍କୁ ମାଡ ମାରିବା ଘଟଣା ମଧ୍ୟ ସୋସିଆଲ ମିଡିଆ ଓ ଗଣମାଧ୍ୟମରେ ଚର୍ଚ୍ଚାର ବିଷୟ ସାଜିଛି । ଚୋରି, ଡକାୟତି, ରାହାଜାନୀ ଓ ନିଶା କାରବାର ବୃଦ୍ଧି ପାଇବା ଘଟଣା ପୁଲିସ୍ର ପାରିବାପଣିଆକୁ ପଦାରେ ପକାଇଛି । ରାଜ୍ୟ ପୁଲିସ୍ ଡିଜି ଦେଇଥିବା ଉଦ୍ବୋଧନ ପାଣିର ଗାର ପାଲଟିଛି । କଥାରେ ଅଛି ‘ଖୁଣ୍ଟ ଗୁଣେ ବଳଦ ନାଚେ’ । ତେବେ ଜିଲା ପୁଲିସ୍ ପ୍ରଶାସନର ତଳରୁ ଉପର ଯାଏ ସବୁଠି ଉଦାସୀନତା ଓ ଅପରାଗତାର ଚିତ୍ର ଦେଖିବାକୁ ମିଳିଛି ।
