କୋରାପୁଟ ୦୫-୦୮(ଓଡିଆ ପୁଅ /ରଂଜନ ଦାସ) କୋରାପୁଟ ଜିଲ୍ଲାର ପାଡୁଆ ଓ ମାଛକୁଣ୍ଡ ପୋଲିସ ଦ୍ୱାରା ୨କୋଟି ଟଙ୍କାର ଗଞେଇ ଜବତ କରାଯାଇଥିବାବେଳେ ଘଟଣାରେ ସଂପୂକ୍ତ ୨ଜଣ ଅଭିଯୁକ୍ତଙ୍କୁ ଗିରଫ କରା ଯାଇଥିବା ନନ୍ଦପୁର ଉପଖଣ୍ଡ ପୋଲିସ ଅଧିକାରୀ ସଂଜୟ କୁମାର ମହାପାତ୍ର ସୂଚନା ଦେଇଛନ୍ତି । ପାଡୁଆ ଥାନା ଅନ୍ତର୍ଗତ ବାଡେଲ ଅଂଚଳରୁ ଆନ୍ଧ୍ରପ୍ରଦେଶକୁ ଏକ ଭ୍ୟାନରେ ଗଞେଇ ଚୋରା ଚାଲାଣ ହେଉଥିବା ସୂଚନା ପାଇ ଏସପି ବରୁଣ ଗୁଣ୍ଠୁପାଲ୍ଲିଙ୍କ ନିର୍ଦ୍ଦେଶରେ ଏସଡିପିଓ ଶ୍ରୀ ମହାପାତ୍ର,ପାଡୁଆ ଥାନା ଅଧିକାରୀ ସରୋଜ କୁମାର ମଲ୍ଲିକ ଓ ଅନ୍ୟ କର୍ମଚାରୀ ଡାକ ବଙ୍ଗଳା ନିକଟରେ ନାକାବନ୍ଦୀ କରିଥିଲେ । ଗଞେଇ ନେଇ ଯାଉଥିବା ଭ୍ୟାନ ଆସିବା ମାତ୍ରେ ପୋଲିସ ଟିମ ଗାଡି ଅଟକାଇ ଚେକିଂ କରିବା ବେଳକୁ ଗାଡିରୁ ୩୭ଟି ଜରି ଅଖାରେ ପ୍ରାୟ ୧ ହଜାର କିଲୋଗ୍ରାମ ଗଞେଇ ଥିବା ଜଣା ପଡିଥିଲା । ଅନ୍ଧାରର ସୁଯୋଗ ନେଇ ଭ୍ୟାନ ଡ୍ରାଇଭର ଫେରାର ହୋଇ ଯାଇଥିବାବେଳେ ଚୋରା ଗଞେଇ ଚାଲାଣରେ ଏସକର୍ଟର୍ ଦେଉଥିବା ଦୁଇଜଣକୁ ଗିରଫ କରାଯାଇଛି । ଗିରଫ ଦୁଇଜଣ ହେଲେ ବାଡେଲ ଅଂଚଳର ଗୁରୁ ହନ୍ତାଳ ଏବଂ ପ୍ରହଲ୍ଲାଦ ଗଲୋରୀ । ପୋଲିସ ଉଭୟଙ୍କୁ ଗିରଫ କରି କୋର୍ଟ ଚାଲାଣ କରିଥିବାବେଳେ ଗଞେଇ ଭରା ଭ୍ୟାନ ଓ ଏସକର୍ଟର୍ରେ ବ୍ୟବହୃତ ଏକ ବାଇକକୁ ଜବତ କରିଛି । ସେହିପରି ମାଛକୁଣ୍ଡ ପୋଲିସ ଲମତାପୁଟ-ସଗର ରାସ୍ତାର ବଡପଡା ଘାଟି ନିକଟ ନିଳଗିରି ବାଡରୁ ୧୦୧୦ କିଲୋ ୯୦୦ ଗ୍ରାମ ଗଞେଇ ଜବତ କରିଥିବା ନନ୍ଦପୁର ଏସଡିପିଓ ଶ୍ରୀ ମହାପାତ୍ର ସୂଚନା ଦେଇଛନ୍ତି । ବଡପଡା ଘାଟି ନିକଟ ନିଳଗିରି ବାଡରେ ବିପୁଳ ପରିମାଣର ଗଞେଇ ପଡି ରହିଥିବା ସୂଚନା ପାଇ ମାଛକୁଣ୍ଡ ଥାନାର ସବ-ଇନସପେକ୍ଟର ଦିଲ୍ଲୀପ ପ୍ରଧାନ,ଏଏସଆଇ ମହେଶ୍ୱର କିର୍ଷାନୀ ପୋଲିସ ଟିମ ନେଇ ଘଟଣା ସ୍ଥଳରେ ପହଂଚିଥିଲେ । ନିଳଗିରି ଜଙ୍ଗଲରେ ଜରି ଅଖାରେ ଗଞେଇ ରଖା ଯାଇଥିବା ଦେଖିବାକୁ ପାଇ ସେଗୁଡିକ ଜବତ କରି ପୋଲିସ ଟିମ ଥାନାକୁ ନେଇ ଆସିଥିଲେ । ନିଳଗିରି ଜଙ୍ଗଲରୁ ପ୍ରାୟ ୧୦୧୦ କିଲୋ ୯୦୦ ଗ୍ରାମ ଗଞେଇ ଉଦ୍ଧାର କରା ଯାଇଥିବା ଏସଡିପିଓ ଶ୍ରୀ ମହାପାତ୍ର କହିଛନ୍ତି । ଗଞେଇ ମାଫିଆ ସେଗୁଡିକ ରାତିରେ ଅନ୍ୟତ୍ର ସ୍ଥାନାନ୍ତର କରିବାକୁ ଯୋଜନା କରି ସେଠାରେ ଗଚ୍ଛିତ ରଖିଥିବା ପୋଲିସ ସନ୍ଦେହ କରୁଛି । ତେବେ ଏଥିରେ ଏ ଯାଏ କେହି ଗିରଫ ହୋଇନଥିଲେ ମଧ୍ୟ ପୋଲିସ ଏନଡିପିଏସ ଆଇନରେ ଏକ ମାମଲା(କେସ ନଂ-୫୯/୨୦୨୧) ରୁଜୁ କରି ତନାଘନା ଆରମ୍ଭ କରିଥିବାବେଳେ ଗଞେଇ ମାଫିଆଙ୍କ ଖୁବ ଶିଘ୍ର ଚିହ୍ନଟ କରା ଯାଇ ଗିରଫ କରା ଯିବ ବୋଲି ନନ୍ଦପୁର ଏସଡିପିଓ ଶ୍ରୀ ମହାପାତ୍ର ପ୍ରକାଶ କରିଛନ୍ତି । ପାଡୁଆ ଓ ମାଛକୁଣ୍ଡ ପୋଲିସ ଦ୍ୱାରା ଜବତ ଗଞେଇର ଆନୁମାନିକ ମୂଲ୍ୟ ୨ କୋଟି ଟଙ୍କାରୁ ଉର୍ଦ୍ଧ୍ୱ ହେବ ବୋଲି ଜଣାପଡିଛି ।
