କେନ୍ଦ୍ରାପଡ଼ା ୧୩ ଅଗଷ୍ଟ (ଓଡ଼ିଆ ପୁଅ/ଚିତ୍ତରଞ୍ଜନ ଦାସ) : କେନ୍ଦ୍ରାପଡା ନେହେରୁ ଯୁବକେନ୍ଦ୍ର ପକ୍ଷରୁ ଫ୍ରିଡମ ରନ-୨୦୨୧ର ଆୟୋଜନ କରାଯାଉଛି। ସ୍ୱାଧୀନତାର ୭୫ବର୍ଷ ପାଳନକୁ କେନ୍ଦ୍ର ସରକାର ଆଜାଦିକା ଅମୃତ ମହୋତ୍ସବ ଭାବରେ ପାଳନ କରୁଥିବା ପରିପ୍ରେକ୍ଷୀରେ ନେହେରୁ ଯୁବକେନ୍ଦ୍ର ସଂଗଠନ ପକ୍ଷରୁ ଫିଟ ଇଣ୍ଡିଆ ଓ ଫ୍ରିଡମ ରନ ଭଳି ବିଭିନ୍ନ କାର୍ଯ୍ୟକ୍ରମର ଆୟୋଜନ କରାଯାଉଛି। ଗତବର୍ଷ ମାର୍ଚ୍ଚ ୧୨ତାରିଖରେ ଆଜାଦିକା ଅମୃତ ମହୋତ୍ସବ ଉଦଘାଟନ ପର୍ବ ଉପକ୍ରମରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଆହ୍ୱାନରେ ଉଦବୁଦ୍ଧ ହୋଇ ସରକାରଙ୍କ କ୍ରୀଡା ଓ ଯୁବସେବା ମନ୍ତ୍ରଣାଳୟ ଆନୁକୁଲ୍ୟରେ ଆରମ୍ଭ ହେବାକୁ ଯାଉଥିବା ଏହି ଅଭିଯାନରେ ସମଗ୍ର ଦେଶର ୪୨.୧୮ଲକ୍ଷ ଯୁବ ସ୍ୱେଛାସେବୀ ଅଂଶଗ୍ରହଣ କରିବେ। କ୍ରୀଡା ଓ ଯୁବସେବା ମନ୍ତ୍ରଣାଳୟ ଅଧିନସ୍ତ କେନ୍ଦ୍ରାପଡା ନେହେରୁ ଯୁବକେନ୍ଦ୍ର ସଂଗଠନ ପକ୍ଷରୁ ଚଳିତମାସ ୧୩ ତାରିଖରୁ ଅକ୍ଟୋବରମାସ ୨ତାରିଖ ଗାନ୍ଧୀ ଜୟନ୍ତୀ ପର୍ଯ୍ୟନ୍ତ ଫିଟ ଇଣ୍ଡଆ ଓ ଫ୍ରିଡମ ରନ ଆୟୋଜନ କରାଯାଉଛି। କେନ୍ଦ୍ରାପଡା ଜିଲ୍ଲାର ୯ଟି ବ୍ଲକର ଯୁବ ସ୍ୱେଛାସେବୀମାନେ ଏପରି କାର୍ଯ୍ୟକ୍ରମରେ ଅଂଶଗ୍ରହଣ କରିପାରିବେ। ଜନ ଭାଗିଦାରି, ଜନ ଆନ୍ଦୋଳନ ଶୀର୍ଷକ ପ୍ରସଙ୍ଗ ଆଧାରିତ ଏହି ଫ୍ରିଡମ ରନରେ ଜିଲ୍ଲାର ୭୫ଟି ଗ୍ରାମରୁ ୭୫ଜଣ ଯୁବ ସ୍ୱେଛାସେବୀ ସାମିଲ ହେବେ। ଏହି ଅଭିଯାନରେ ଜାତୀୟ ସଂଗୀତ ପରିବେଶଣ ସାଙ୍ଗକୁ ଦୈାଡ କାର୍ଯ୍ୟକ୍ରମ ପ୍ରତି ଗ୍ରାମରେ ଅନୁଷ୍ଠିତ ହେବ। ଅଭିଯାତ୍ରୀମାନେ ବ୍ୟାନର ଓ ପ୍ଲାକାର୍ଡ ଧାରଣ କରିବେ ଓ ସେମାନଙ୍କୁ ବିଶିଷ୍ଟବ୍ୟକ୍ତି, ନିର୍ବାଚିତ ଲୋକ ପ୍ରତିନିଧ, ସମାଜସେବୀ, ଗଣମାଧ୍ୟମ ବ୍ୟକ୍ତିତ୍ୱ ପ୍ରମୁଖ ଯୋଗଦାନ ପୂର୍ବକ ଉତ୍ସାହିତ କରିବେ। ଫିଟ ଇଣ୍ଡିଆ ଓ ଫ୍ରିଡମ ରନର ପ୍ରମୁଖ ଆଭିମୁଖ୍ୟ ହେଉଛି ଜୀବନଧାରାରେ ଶରୀର ଚର୍ଚ୍ଚାକୁ ପ୍ରାଧାନ୍ୟ ଦେଇ ଆଳସ୍ୟ, ଅବସାଦ, ଉତ୍କଣ୍ଠା ତଥା ରୋଗବ୍ୟାଧିକୁ ଦୂର କରିବା ଲକ୍ଷ୍ୟରେ ଦୈନିକ ଅନ୍ତତଃ ଅଧଘଣ୍ଟାଏ ଦୈାଡ ତଥା ଶରୀର ଚର୍ଚ୍ଚା ଇତ୍ୟାଦିରେ ବିନିଯୋଗ କରିବା। କୋଭିଡ ମାର୍ଗଦର୍ଶିକା ଅନୁପାଳନ ପୂର୍ବକ ଆବଶ୍ୟକ ସ୍ଥଳେ ଭର୍ଚ୍ଚୁଆଲ ଓ ପ୍ରତ୍ୟେକ୍ଷ କାର୍ଯ୍ୟକ୍ରମର ଆୟୋଜନ କରାଯିବ ବୋଲି ସଂଗଠନ ପକ୍ଷରୁ ସୂଚନା ଦିଆଯାଇଛି।
