ଭଦ୍ରକ, ୩ା୪ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଏବେ ଗ୍ରୀଷ୍ମପ୍ରବାହ ଧୀରେ ଧୀରେ ତାର କାୟା ବିସ୍ତାର କରିଚାଲିଛି । ପୂର୍ବାହ୍ନ ୧୦ ଟା ପରେ ଲୋକେ ଘର ବାହାରକୁ ବାହାରିବା କଷ୍ଟକର ହୋଇପଡୁଛି । ଆଗକୁ ଏହାର ପରିଣାମ ଆହୁରି ବିଷମ ହେବ ବୋଲି ପରିବେଶବିତ୍ ମାନେ ଏବେଠୁ ଚେତାବନୀ ଦେଲେଣି । କିନ୍ତୁ ଏହି ଜିଲାର ଧାମନଗର ବ୍ଲକ୍ର ଶତାଧିକ ଗ୍ରାମରେ ଏବେ ପାନୀୟ ଜଳର ସଂକଟ ଉତ୍କଟ ରୂପ ଧାରଣ କରିଥିବାବେଳେ ଏହାର ନିରାକରଣ ଦିଗରେ ସରକାରୀ ତତ୍ପରତା ପ୍ରକାଶ ପାଉନାହିଁ । ଏଭଳି ଏକ ସମସ୍ୟାର ସମାଧାନ ପାଇଁ ଲୋକେ ବାରମ୍ବାର ସ୍ଥାନୀୟ ପ୍ରଶାସନ ଦୃଷ୍ଟି ଆକର୍ଷଣ କରି ନୟାନ୍ତ ହେଲାପରେ ମଧ୍ୟ ଅଧିକାରୀମାନେ କୁମ୍ଭକର୍ଣ୍ଣ ନିଦ୍ରାରେ ଶୋଇଥିବା ଭଳି ମନେ ହେଉଛି । ଏହି ବ୍ଲକ୍ର ଧାମନଗର, ଦୋବଲ, ଧୁଷୁରୀ ଓ ଅସୁରାଳି ଜୋନର ବହୁ ନଳକୂପ ଏବେ ଅଚଳ ହୋଇଛି । ଫଳରେ ଶତାଧିକ ଗ୍ରାମରେ ଜଳକଷ୍ଟ ପରିଲକ୍ଷିତ ହୋଇଥିବାବେଳେ ପୂର୍ବରୁ ବସାଯାଇଥିବା ନଳକୂପଗୁଡିକ ଅଚଳ ହୋଇପଡିଛି । କେବଳ ନଳକୂପ ନୁହେଁ ଏ ସମସ୍ତ ଅଂଚଳରେ ରହିଥିବା ବସୁଧା ଓ ଗ୍ରାମ୍ୟ ଜଳଯୋଗାଣ ପ୍ରକଳ୍ପ ଗୁଡିକର ଅବସ୍ଥା ମଧ୍ୟ ତଦୃପ । ଫଳରେ ପିଇବା ପାଣି ପାଇଁ ପ୍ରଚଣ୍ଡ ଖରାରେ ପିଲା ଠାରୁ ବୁଢା ପର୍ଯ୍ୟନ୍ତ ହନ୍ତସନ୍ତ ହେଉଛନ୍ତି । ସରକାରଙ୍କ ମେଗା ଯୋଜନାରେ ପ୍ରତ୍ୟେକ ଘରକୁ ସ୍ୱଚ୍ଛ ପାନୀୟ ଜଳ ଯୋଗାଣର କାର୍ଯ୍ୟ କେବଳ ହୋଡିଂ ଓ କାଗଜ କଲମରେ ଚାଲିଥିବାରୁ ତାହା ବାସ୍ତବରେ ଲୋକ ହିତରେ ଆସୁନାହିଁ । ଏହି ଯୋଜନାରେ ପଧାନୀ, ଦୋବଲ, ମୁସ୍ତାଫାପୁର, ଭଟସାହି, ନଦୀଗାଁ, ନୂଆପଡା, ଖଡିପଦା ସମେତ ବିଭିନ୍ନ ଅଂଚଳରେ ଏବେ ପାନୀୟଜଳ ସମସ୍ୟା ଉତ୍କଟ ରୂପ ନେଇଛି । ଏହି ବ୍ଲକ୍ର ୧୫ ରୁ ଉର୍ଦ୍ଧ୍ୱ ପଞ୍ଚାୟତରେ ଏବେ ଜଳସଂକଟ ଉଗ୍ରରୂପ ନେଲାଣି ।
ପ୍ରତ୍ୟେକ ଗ୍ରୀଷ୍ମଋତୁ ସମୟରେ ଅବଶ୍ୟ ପରିସ୍ଥିତି ଜଟିଳ ହୋଇଥାଏ । କିନ୍ତୁ ଜିଲା ପ୍ରଶାସନ ସେ ଦିଗରେ ଆଗୁଆ ପଦକ୍ଷେପ ନେଇଥାନ୍ତି । କିନ୍ତୁ ଏଠାରେ ନଳକୂପ ଅଚଳ ଓ ପାନୀୟ ଜଳ ସମସ୍ୟା ନେଇ ଜିଲା ପ୍ରଶାସନ ପାଖରେ ତଥ୍ୟ ମହଜୁଦ ରହିଥିଲେ ମଧ୍ୟ ତାର ଆଧାରରେ କୌଣସି ଆଗୁଆ ପଦକ୍ଷେପ ଗ୍ରହଣ କରାଯାଇନାହିଁ । ଯାହା ଲୋକଙ୍କ ସମସ୍ୟାକୁ ଦ୍ୱିଗୁଣିତ କରିଛି । ଗ୍ରୀଷ୍ମ ପ୍ରବାହ ପୂର୍ବରୁ ଅଚଳ ନଳକୂପ ଗୁଡିକୁ ମରାମତି କରାଯାଇଥାଏ । କିନ୍ତୁ ଚଳିତବର୍ଷ ତାହା ଠପ୍ ହୋଇଯାଇଛି । ଗ୍ରୀଷ୍ମ ପ୍ରବାହର ମୁକାବିଲା ପାଇଁ ଜିଲା ପ୍ରଶାସନ ପକ୍ଷରୁ ଜୋରଦାର ପ୍ରସ୍ତୁତ ଆରମ୍ଭ ହୋଇଥିବାର କୁହାଯାଉଥିବାବେଳେ ଧାମନଗର ବ୍ଲକ୍ର ଉପରୋକ୍ତ ଜଳକିଷ୍ଟ ଅଂଚଳରେ ତାର ବିପରୀତ ବ୍ୟବସ୍ଥା ବୁଦ୍ଧିଜୀବୀଙ୍କୁ ଚକିତ କରିଛି । ଏଠାରେ ସୂଚନାଥାଉକି ମୁସ୍ତାଫାପୁର ପଂଚାୟତ ଅଫିସ୍ ନିକଟରେ ଥିବା ନଳକୂପଟି ଦୀର୍ଘଦିନ ହେବ ଅଚଳ ଥିବାବେଳେ ତାହା ମରାମତି ହେଉନାହିଁ । ଏହି ଘଟଣାରୁ ଅନ୍ୟ ଗ୍ରାମମାନଙ୍କରେ ନଳକୂପ ଗୁଡିକର ଅବସ୍ଥା କିଭଳି ଥିବ, ତାହା ସହଜରେ ଅନୁମେୟ କରାଯାଇପାରେ । ତେବେ ଏ ସଂପର୍କରେ ବ୍ଲକ୍ର ବିଡିଓ ବନବିହାରୀ ଦିନ୍ଦାଙ୍କ ସହ ଏ ପ୍ରତିନିଧି ଯୋଗାଯୋଗ କରିବାରେ ପାନୀୟ ଜଳ ସମସ୍ୟାର ଅଭିଯୋଗ ଆସିନାହିଁ, ତଥାପି ଏ ଦିଗରେ ନଜର ଦିଆଯିବ ବୋଲି ସେ କହିବା ଆଶ୍ଚର୍ଯ୍ୟଜନକ ମନେହୁଏ । ଏଣୁ ପରିସ୍ଥିତି ଅଣାୟତ ହେବା ପୂର୍ବରୁ ପ୍ରଶାସନ ଯଥୋଚିତ ପଦକ୍ଷେପ ଗ୍ରହଣ କରିବା ପାଇଁ ଲୋକେ ଦାବି କରିଛନ୍ତି ।
