ଭଦ୍ରକ, ୧୧ା୮ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଭଦ୍ରକ ଜିଲାରେ ନିର୍ମାଣ ଶ୍ରମିକ କାର୍ଡ ପାଇଁ ଚାଲିଛି କସରତ । ଏହି କାର୍ଡ ହାତେଇବାକୁ ଏକ ପ୍ରକାର ପ୍ରତିଦ୍ୱନ୍ଦ୍ୱିତା ଚାଲିଛି ଯୋଗ୍ୟ ଓ ଅଯୋଗ୍ୟ ହିତାଧିକାରୀଙ୍କ ମଧ୍ୟରେ । ଯିଏ ଅଧିକ ଖର୍ଚ୍ଚ କରିପାରିଲା ଓ ଦଲାଲଙ୍କୁ ସନ୍ତୁଷ୍ଟ କରିପାରିଲା, ସେ ପାଇଲା ଏହି କାର୍ଡ । ନିର୍ମାଣ ଶ୍ରମିକଙ୍କ ପାଇଁ ସରକାରଙ୍କ ବହୁ ଆକର୍ଷଣୀୟ ଯୋଜନା ରହିଛି । ଗତବର୍ଷ ସେପ୍ଟେମ୍ବର ମାସ ପରଠାରୁ ଜିଲା ଶ୍ରମ କାର୍ଯ୍ୟାଳୟରେ ଅସମ୍ଭବ ଭିଡ ଲାଗି ରହୁଛି । ଶହ ଶହ ଆଶାୟୀ ଏହି କାର୍ଯ୍ୟାଳୟରେ ଲମ୍ବା ଲାଇନ୍ ଲଗାଉଛନ୍ତି । ଗତ ସେପ୍ଟେମ୍ବର ମାସରୁ ଗତ ଜୁନ୍ ମାସ ୧୭ ତାରିଖ ସୁଦ୍ଧା ଜିଲାରେ ୧୦ ମାସରେ ୪୦ ହଜାରରୁ ଅଧିକ ନିର୍ମାଣ ଶ୍ରମିକ ନିଜର ନାମ ପଂଜିକରଣ କରିଥିବା ଜଣାପଡିଛି । ବିଭାଗୀୟ ସୂଚନା ଅନୁଯାୟୀ କରୋନାର ପ୍ରଥମ ଲହର ସମୟରେ ରାଜ୍ୟ ସରକାର ପଂଜିକୃତ ନିର୍ମାଣ ଶ୍ରମିକଙ୍କ ପାଇଁ ମୁଣ୍ଡପିଛା ଦେଢହଜାର ଟଙ୍କା ଲେଖାଏଁ କୋଭିଡ୍ ସହାୟତା ରାଶି ଘୋଷଣା କରିଥିଲେ । ତଥ୍ୟ ଅନୁଯାୟୀ, ଜିଲାର ୬୮ ହଜାରରୁ ନିର୍ମାଣ ଶ୍ରମିକଙ୍କ ପାଇଁ ୧୦ କୋଟି ୩୪ ଲକ୍ଷ ୭୦ ହଜାର ଟଙ୍କାର ସହାୟତା ରାଶି ଆସିଥିଲା । ହିତାଧିକାରୀଙ୍କୁ ସିଧାସଳଖ ସହାୟତା ରାଶି ପ୍ରଦାନ କରିବାକୁ ନିର୍ଦ୍ଦେଶ ଥିଲା । ଏହି କ୍ରମରେ ପ୍ରାୟ ୬୨ ହଜାର ନିର୍ମାଣ ଶ୍ରମିକଙ୍କୁ ୯.୩୦ କୋଟି ଟଙ୍କାର ସହାୟତା ବଣ୍ଟନ କରାଯାଇଥିବାବେଳେ ୬ ହଜାର ପଂଜିକୃତ ନିର୍ମାଣ ଶ୍ରମିକ କୌଣସି କାରଣରୁ ନିଖୋଜ ହୋଇଯାଇଥିଲେ । ୧ କୋଟିରୁ ଅଧିକ ଟଙ୍କା ଆବଣ୍ଟିତ ହୋଇନଥିବା ଜଣାପଡିଛି ।
ଚଳିତବର୍ଷ କରୋନାର ଦ୍ୱିତୀୟ ଲହର ସମୟରେ ମଧ୍ୟ ରାଜ୍ୟ ସରକାର ରାଜ୍ୟର ୨୬ ଲକ୍ଷ ନିର୍ମାଣ ଶ୍ରମିକଙ୍କ ପାଇଁ ୩୮୫ କୋଟି ଟଙ୍କାର ଆର୍ଥିକ ସହାୟତା ଘୋଷଣା କରିଛନ୍ତି । ଗତବର୍ଷ ଜିଲାରେ ମୋଟ ପଂଜିକୃତ ନିର୍ମାଣ ଶ୍ରମିକଙ୍କ ସଂଖ୍ୟା ୯୫ ହଜାର ଥିବାବେଳେ ଏବେ ଏହା ଆଶ୍ଚର୍ଯ୍ୟଜନକ ଭାବେ ବୃଦ୍ଧି ପାଇ ୧ ଲକ୍ଷ ୩୬ ହଜାରରେ ପହଞ୍ôଚଛି । କରୋନା ଲକଡାଉନ୍ ଓ ସଟଡାଉନ୍ ପାଇଁ ପଂଜିକରଣ କାର୍ଯ୍ୟକୁ ଦୀର୍ଘ ମାସ ଧରି ବନ୍ଦ ରଖାଯାଇଥିଲା । ଏହାସତ୍ୱେ ମାତ୍ର ଅଳ୍ପ କେଇମାସ ମଧ୍ୟରେ ୪୧ ହଜାର ବ୍ୟକ୍ତି କିପରି ନିର୍ମାଣ ଶ୍ରମିକ କାର୍ଡ ପାଇପାରିଲେ, ତାହା ସମସ୍ତଙ୍କୁ ଚକିତ କରିଛି । ଜିଲା ଶ୍ରମ ବିଭାଗର ମଣ୍ଡଳ ଶ୍ରମାୟୁକ୍ତ କୁବେର ବେହେରାଙ୍କ ସୂଚନା ଅନୁଯାୟୀ ଚଳିତବର୍ଷ ଦ୍ୱିତୀୟ ଲହର ସମୟରେ ଜିଲା ଶ୍ରମ କାର୍ଯ୍ୟାଳୟ ପକ୍ଷରୁ ୧ ଲକ୍ଷ ୨୦ ହଜାର ୭୦୭ ଜଣ ପଂଜିକୃତ ନିର୍ମାଣ ଶ୍ରମିକଙ୍କ ନାମ ଦ୍ୱିତୀୟ ଦଫାର କୋଭିଡ୍ ସହାୟତା ପାଇଁ ପଠାଯାଇଥିଲା । ଇତିମଧ୍ୟରେ ଚଳିତବର୍ଷ ୨ଟି ପର୍ଯ୍ୟାୟରେ ଜିଲାର ୭୯ ହଜାର ୩୩୨ ଜଣ ହିତାଧିକାରୀଙ୍କୁ ଏହି ସହାୟତା ରାଶି ମିଳିସାରିଛି । ଅର୍ଥାତ୍ ଗତବର୍ଷ ଅପେକ୍ଷା ଅଧିକ ୧୭ ହଜାର ହିତାଧିକାରୀ ଚଳିତବର୍ଷ ଏପର୍ଯ୍ୟନ୍ତ ଉପକୃତ ହୋଇସାରିଛନ୍ତି ।
ଗତବର୍ଷ ହିତାଧିକାରୀଙ୍କୁ ଖୋଜି ଖୋଜି ଆର୍ଥିକ ସହାୟତା ପ୍ରଦାନ କରାଯାଇଛି । ଚଳିତବର୍ଷ ନିର୍ମାଣ ଶ୍ରମିକଙ୍କ ବ୍ୟାଙ୍କ ଆକାଉଣ୍ଟକୁ ସିଧାସଳଖ ଏହି ସହାୟତା ରାଶି ପଠାଯାଇଛି । ଏପରିକି ଗତବର୍ଷ ନିଖୋଜ ଥିବା ବହୁ ନିର୍ମାଣ ଶ୍ରମିକ ପ୍ରଥମ ପର୍ଯ୍ୟାୟ ସହାୟତା ନନେଇ ମଧ୍ୟ ଦ୍ୱିତୀୟ ଥରର ଅତିରିକ୍ତ ସହାୟତା ପାଇବାକୁ ସକ୍ଷମ ହୋଇଛନ୍ତି । ତଥାପି ଆମେ ପଠାଇଥିବା ତାଲିକା ଅନୁଯାୟୀ ପଂଜିକୃତ ନିର୍ମାଣ ଶ୍ରମିକ ପରବର୍ତ୍ତୀ ପର୍ଯ୍ୟାୟରେ ଆର୍ଥିକ ସହାୟତା ପାଇବେ ବୋଲି ଶ୍ରୀ ବେହରା କହିଛନ୍ତି । ଜାଲ ପଂଜିକରଣ ଦଲାଲ ଓ କେତେକ ଦୁର୍ନୀତିଗ୍ରସ୍ତ ବିଭାଗୀୟ କର୍ମଚାରୀଙ୍କ ସହଯୋଗରେ ବହୁ ଅଯୋଗ୍ୟଙ୍କୁ ନିର୍ମାଣ ଶ୍ରମିକ ତାଲିକାରେ ସାମିଲ କରାଯିବା ଯୋଗୁଁ ଏହି ସଂଖ୍ୟା ବଢିଛି ବୋଲି କୁହାଯାଉଛି । ତେଣୁ ସହାୟତା ରାଶି ଦେବା ପୂର୍ବରୁ ପଂଜିକୃତ ନିର୍ମାଣ ଶ୍ରମିକଙ୍କ ଯୋଗ୍ୟତା ସଂପର୍କରେ ଯାଞ୍ଚ ହେବାର ଆବଶ୍ୟକତା ରହିଛି ବୋଲି ସାଧାରଣରେ ମତପ୍ରକାଶ ପାଇଛି ।
