ଭଦ୍ରକ, ୧୧ା୮ (ଓଡ଼ିଆ ପୁଅ / ସ୍ନିଗ୍ଧା ରାୟ) – ବିଶ୍ୱ ତାପାୟନ ବୃଦ୍ଧି ପାଉଥିବା ବେଳେ ବୃକ୍ଷରୋପଣ ଉପରେ ଏବେ ସବୁଠି ଗୁରୁତ୍ୱ ଦିଆଯାଉଛି । ସାମାଜିକ ବନୀକରଣ ଠାରୁ ଆରମ୍ଭ କରି ମହାତ୍ମା ଗାନ୍ଧି ନିଶ୍ଚିତ କର୍ମନିଯୁକ୍ତି ଯୋଜନା ଜରିଆରେ କୋଟି କୋଟି ଟଙ୍କା ବୃକ୍ଷରୋପଣ କରାଯାଉଛି । ବିଶ୍ୱ ପରିବେଶ ଦିବସ ମଧ୍ୟ ସ୍ୱତନ୍ତ୍ର ଭାବେ ପାଳିତ ହୋଇ ବ୍ୟାପକ ବୃକ୍ଷ ରୋପଣ କରାଯାଉଛି । ଏହାବ୍ୟତୀତ ବିଭିନ୍ନ ସାମାଜିକ ସଂଗଠନ ପକ୍ଷରୁ ବୃକ୍ଷରୋପଣ କରିବାକୁ ଆଗ୍ରହ ପ୍ରକାଶଡ କଲେ । ବନ ବିଭାଗ ପକ୍ଷରୁ ସମସ୍ତ ପ୍ରକାର ବୈଷୟିକ ସହାୟତା ଯୋଗାଇ ଦିଆଯାଉଛି । କିନ୍ତୁ ଏ ସମସ୍ତ ବ୍ୟବସ୍ଥା ମଧ୍ୟରେ ସଂରକ୍ଷିତ ବର୍ଗର ଗଛ କାଟିନେଲେ ଯେଉଁ ପ୍ରକାର ବିଭାଗୀୟ କାର୍ଯ୍ୟାନୁଷ୍ଠାନ ପ୍ରାବଧାନ ରହିଛି, ସେଥିପ୍ରତି ବେଳେବେଳେ ବିଭାଗୀୟ ଅଧିକାରୀ ଆଖି ବୁଜିଦେବା ସହ ନିରବତା ଅବଲମ୍ବନ କରୁଛନ୍ତି । ଯାହାକି ପରୋକ୍ଷରେ ବିଭାଗୀୟ ଉଦାସୀନତା କିମ୍ବା ଅଭିଯୁକ୍ତଙ୍କ ପ୍ରତି ପ୍ରକାଶ ପାଉଥିବା ଅନୁକମ୍ପା ସଂପର୍କରେ ସ୍ପଷ୍ଟ ସୂଚନା ଦେଉଛି । ଯାହାର ଏକ ଜ୍ୱଳନ୍ତ ଉଦାହରଣ ଦେଖିବାକୁ ମିଳିଛି ଏହି ଜିଲା ବାସୁଦେବପୁର ବ୍ଲକ୍ ସୁଦର୍ଶନପୁର ପଂଚାୟତ ସୁଆଁ ଗ୍ରାମରେ । ପ୍ରାପ୍ତ ଅଭିଯୋଗ ଅନୁଯାୟୀ ଉକ୍ତ ସୁଆଁ ଗ୍ରାମର ବିଭୂତିଭୂଷଣ ପଣ୍ଡାଙ୍କ ପରିବାର ଉକ୍ତ ଗ୍ରାମପଞ୍ଚାୟତରେ ଥିବା ନିଜ ଇଜ୍ମାଇଲ୍ ଜମି ଉପରେ ପ୍ରାୟ ୩୦ ବର୍ଷ ପୂର୍ବେ କିଛି ଶାଗୁଆନ ଗଛ ଲଗାଇଥିଲେ । ଗତ ଜୁଲାଇ ମାସ ୨୦ ତାରିଖ କେତେକ ଆସାମାଜିକ ବ୍ୟକ୍ତ ୮ଟି ଶାଗୁଆନ ଗଛକୁ କାଟି ନେଇଥିଲେ ।
ଏ ସଂପର୍କରେ ଶ୍ରୀ ପଣ୍ଡା ସ୍ଥାନୀୟ ଅଂଚଳର ଜଣେ ବୃକ୍ଷପ୍ରେମୀ ତଥା ବରିଷ୍ଠ ନାଗରିକ ଯୁଧିଷ୍ଠିର ମଳିକଙ୍କ ଠାରୁ ଖବର ପାଇ ଘଟଣାସ୍ଥଳରେ ପହଞ୍ôଚ ସତ୍ୟତା ନିଜ ଆଖିରେ ଦେଖିଥିଲେ । ପରେ ଶ୍ରୀ ପଣ୍ଡା ବାସୁଦେବପୁର ବନ୍ୟପ୍ରାଣୀ ବିଭାଗର ରେଞ୍ଜ ଅଫିସରଙ୍କୁ ଲିଖିତ ଭାବେ ସେହିଦିନ ଏକ ଅଭିଯୋଗପତ୍ର ଦାଖଲ କରିଥିଲେ । ଏଥିସହିତ ଶ୍ରୀ ପଣ୍ଡା, ବାସୁଦେବପୁର ଥାନାଧିକାରୀ, ଏସ୍ଡିପିଓଙ୍କ ସମେତ ଜିଲାପାଳ, ଏସ୍ପି, ଜିଲା ବନ୍ୟପ୍ରାରୀ ଅଧିକାରୀଙ୍କ ଠାରୁ ଆରମ୍ଭ କରି ବହୁ ଅଧିକାରୀଙ୍କୁ ଯୋଗାଯୋଗ କରି ଜଣାଇଥିଲେ । ଏହାପରେ ବାସୁଦେବପୁର ଫରେଷ୍ଟର ଓ ରେଞ୍ଜ ଅଫିସର ସୁଶାନ୍ତ ମହାନ୍ତି ଘଟଣାସ୍ଥଳରେ ପହଞ୍ôଚ ସଂପୃକ୍ତ ବେଆଇନ୍ କାର୍ଯ୍ୟ ସଂପର୍କିତ ପ୍ରମାଣର ଫଟୋ ଉଭୟ ସ୍ଥାନରୁ ନେଇଥିଲେ । କଟାଯାଇଥିବା ଶାଗୁଆନ ଗଛକୁ କଚେରୀ ଛକ ନିକଟରେ ଥିବା ମୁଖ୍ୟ ରାସ୍ତାକଡରୁ ଚାଲାର ହେବା ବେଳେ ଜବତ କରି ସ୍ଥାନୀୟ ଜଣେ ବ୍ୟକ୍ତିଙ୍କ ଜିମା ଦେଇଥିଲେ । ତେବେ ଇତିମଧ୍ୟରେ ୨୦ ଦିନ ବିତିବାକୁ ବସିଛି । କିନ୍ତୁ ବନ୍ୟପ୍ରାଣୀ ବିଭାଗ ପକ୍ଷରୁ ଏଯାବତ୍ ମାମଲା ରୁଜୁ ହୋଇନାହିଁ କିମ୍ବା ଜବତ ଗଛର ଗଣ୍ଡିକୁ ବିଭାଗୀୟ କାର୍ଯ୍ୟାଳୟକୁ ନିଆଯାଇନାହିଁ । ଅପରପକ୍ଷେ ଗଛ କାଟିବାର ମୁଖ୍ୟ ଅଭିଯୁକ୍ତ ପ୍ରାକ୍ତନ ସରପଞ୍ଚ ଗଂଗାଧର ପଣ୍ଡା, ଅବନୀ ପଣ୍ଡା, ଅନିଲ ପଣ୍ଡା ଓ ନରେନ୍ଦ୍ର ନାୟକ ଓ ଏଥିରେ ସହଯୋଗ କରୁଥିବା ଶ୍ରୀ ନାୟକଙ୍କ ଭାଇ ଅଖୁଜି ଓ ତାଙ୍କ ଦୁଇପୁତ୍ରଙ୍କୁ ବନ୍ୟପ୍ରାଣୀ ବିଭାଗ ଘଣ୍ଟ ଘୋଡାଇ ଚାଲିଛି ବୋଲି ଶ୍ରୀ ପଣ୍ଡା ଅଭିଯୋଗ କରିଛନ୍ତି ।
ବିଶେଷକରି ପ୍ରାକ୍ତନ ସରପଞ୍ଚ ଓ ଶ୍ରୀ ନାୟକ ପୂର୍ବରୁ ବିଭିନ୍ନ ଅସାମାଜିକ କାର୍ଯ୍ୟରେ ଲିପ୍ତ ଥିବାର ଶ୍ରୀ ପଣ୍ଡା ଅଭିଯୋଗ କରିଛନ୍ତି । ନିଜ ରାଜନୈତିକ ପ୍ରଭାବ ବଳରେ ସେ ମାମଲାକୁ ଦୁର୍ବଳ କରିବାକୁ ବିଭାଗୀୟ ଅଧିକାରୀଙ୍କ ଉପରେ ଚାପ ପକାଉଛନ୍ତି । ଏହାବ୍ୟତୀତ ଅଭିଯୁକ୍ତମାନେ ଅଭିଯୋଗକାରୀ ଶ୍ରୀ ପଣ୍ଡା ଓ ସାକ୍ଷୀମାନଙ୍କୁ ନିୟମିତ ଭାବେ ଧମକ ଦେଉଥିବା ସେ ଅଭିଯୋଗ କରିଛନ୍ତି । ଏ ସଂପର୍କରେ ବିଭାଗୀୟ ରେଞ୍ଜ ଅଫିସର ସୁଶାନ୍ତ ମହାନ୍ତିଙ୍କ ସହ ଯୋଗାଯୋଗ କରାଯାଇଥିବାବେଳେ ଏ ସଂପର୍କରେ ସେ ଅବଗତ ଥିବା କହିଛନ୍ତି । କିନ୍ତୁ ୟାସ୍ ବାତ୍ୟା ବେଳେ ଏ ସମସ୍ତ ଗଛ ଉପୁଡି ପଡିଥିଲା । ତଥାପି ଏହାକୁ କାଟିବା ଓ ଚାଲାଣ ପୂର୍ବରୁ ବିଭାଗୀୟ ଅନୁମତି ଆବଶ୍ୟକତା ରହିଛି । ଯାହାକି ଅଭିଯୁକ୍ତମାନଙ୍କ ପକ୍ଷରୁ ନିଆଯାଇନାହିଁ ଓ ଏହି କାରଣରୁ ଆମେ କଟାଯାଇଥିବା ଗଛକୁ ସିଜ୍ କରି ଜଣେ ସ୍ଥାନୀୟ ବ୍ୟକ୍ତିଙ୍କ ଜିମାରେ ରଖିଛୁ । ସଂପୃକ୍ତ ଜମିର ମାଲିକାନା ଅଭିଯୋଗକାରୀଙ୍କ କିମ୍ବା ସରକାରୀ ପ୍ଲଟ୍ ତାହାର ଡିମାରକେଶନ ପାଇଁ ଆମେ ତହସିଲଦାରଙ୍କୁ ୧୦ ଦିନ ପୂର୍ବରୁ ଚିଠି କରିଛୁ । ତାଙ୍କ ରିପୋର୍ଟ ଆସିବା ପରେ ମାମଲା ରୁଜୁ ହେବ ଓ ଆବଶ୍ୟକ କାର୍ଯ୍ୟାନୁଷ୍ଠାନ ନିଆଯିବ ବୋଲି ରେଞ୍ଜ ଅଫିସର ଶ୍ରୀ ମହାନ୍ତି ଆମ ପ୍ରତିନିଧିଙ୍କୁ କହିଛନ୍ତି ।
