ଭଦ୍ରକ, ୨୦ା୧୨ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଭଦ୍ରକ ଜିଲା ଧାମନଗର ବ୍ଲକ ଅନ୍ତର୍ଗତ ଦେହୁଡ଼ି ଆନନ୍ଦପୁର ପଂଚାୟତର ଚମ୍ପାବାଗ ଗ୍ରାମର ପଦ୍ମନାଭ ନାୟକଙ୍କ ପୁଅ ଖଗେଶ୍ୱର ନାୟକ (୧୯) ମୋବାଇଲରେ ଖେଳ ଖେଳି ନିଜକୁ ଅସହାୟ ମନେକରି କେଉଁଆଡ଼େ ନିଖୋଜ ହୋଇଯାଇଛନ୍ତି । ଖଗେଶ୍ୱର ପରିବାରର ଆର୍ଥିକ ସ୍ଥିତି ଏତେ ଭଲ ନଥିବାରୁ ପାଠ ପଢିବା ସହିତ ଏକ ଦୋକାନରେ ରହି କାମ କରନ୍ତି । ନିଜର ଗୋଟିଏ ମୋବାଇଲ ଫୋନ ପାଇଁ ବାପାଙ୍କ ନିକଟରେ ଜିଦ୍ ଧରିଥିଲେ । ଶେଷରେ ବାପା ତାଙ୍କୁ ଗୋଟିଏ ମୋବାଇଲ କିଣିଦେଇଥିଲେ । ହେଲେ ସେହି ମୋବାଇଲରେ ଖଗେଶ୍ୱର ଅନ୍ଲାଇନ୍ରେ ଫ୍ରିଫାୟାର ଓ ଯୁଡ଼ୋଆଦି ଗେମ ଖେଳି ଆସୁଥିଲେ । ଶେଷରେ ଏହି ଗେମରୁ ହାରିବାରୁ ତାଙ୍କ ବାପାଙ୍କ ବ୍ୟାଙ୍କ ଆକାଉଣ୍ଟରୁ ଟଙ୍କା ଟ୍ରାନ୍ସଫର କରୁଥିଲେ । ଏପରିକି ସାଙ୍ଗ ସାଥି ଓ ବନ୍ଧୁ ବାନ୍ଧବଙ୍କ ଠାରୁ ମଧ୍ୟ ଧାର କରଜ କରି ସାଇବର ଠକଙ୍କୁ ଟଙ୍କା ପଠାଉଥିଲେ । ପ୍ରାୟ ୩୦ରୁ ୪୦ ହଜାର ଟଙ୍କା ବରବାଦ କରିବା ପରେ ଆତ୍ମ ବିଶ୍ୱାସ ହରାଇ ଥିଲେ । ଗତ ୧୭ତାରିଖ ଘରେ ନିଜର ମୋବାଇଲ ରଖି କେଉଁଆଡ଼େ ନିଖୋଜ ହୋଇଯାଇଛନ୍ତି । ଏ ନେଇ ଖଗେଶ୍ୱରଙ୍କ ପରିବାର ପକ୍ଷରୁ ମଧ୍ୟ ଧାମନଗର ଥାନାରେ ଅଭିଯୋଗ କରାଯାଇଛି । ପ୍ରକାଶ ଥାଉକି ଧାମନଗର ଅଂଚଳର ବହୁ ଯୁବପିଢି ଧଳା ଜହର ଓ ନିଶା ସେବନ କରି ଅବାଟକୁ ଚାଲି ଯାଉଥିବାବେଳେ ଏବେ ସେମାନଙ୍କୁ ମୋବାଇଲ୍ କିମିଆ କରିଛି । ତେବେ ଘଟଣା ୪ଦିନ ଘଟିଯାଇଥିଲେ ମଧ୍ୟ ଖଗେଶ୍ୱରର କୌଣସି ପତ୍ତା ମିଳିନାହିଁ ।
