ଭୁବନେଶ୍ୱର:ଭାରତ ତେରେ ଟୁକୁଡ଼େ ହୋଙ୍ଗେ ଇନ୍ସା ଆଲ୍ଲା ଇନ୍ସା ଆଲ୍ଲା, କାଶ୍ମୀର ମାଙ୍ଗେ ଆଜାଦି, ହମେ ଚାହିଏ ଆଜାଦି, ଆରଏସଏସ ସେ ଆଜାଦି।ଭାରତ ଆରଏସଏସ ମୁକ୍ତ ହେବା ଉଚିତ!ମୋଦୀ ସିନା କଂଗ୍ରେସ ମୁକ୍ତ ଭାରତ କଥା କହୁଛନ୍ତି।କିନ୍ତୁ ଏହି “ଟୁକୁଡ଼େ ଟୁକୁଡ଼େ” ଗ୍ୟାଙ୍ଗ ଏବଂ ତାଙ୍କ ସାଥି କଂଗ୍ରେସ, ଟିଏମସି, ମାୟାବତୀ, ବାମପନ୍ଥୀ ଆଦି ଚାହାଁନ୍ତି ଆରଏସଏସ (ସଂଘ) ମୁକ୍ତ ଭାରତ।ସେମାନଙ୍କ ଇଚ୍ଛା କେତେ ପୂରଣ ହୋଇପାରୁଛି, ତାହା ତ’ ପର କଥା।ଓଡ଼ିଶାରେ କିନ୍ତୁ ଆରଏସଏସ ମୁକ୍ତ ଅଭିଯାନରେ ସାମିଲ ହୋଇଯାଇଛି ବିଜେପି!
“ପାର୍ଟି ଉଇଥ ଡିଫରେନ୍ସ” କଥା କହୁଥିବା ବିଜେପି ଆଉ କ୍ୟାଡର ବେସ ପାର୍ଟି ହୋଇ ରହିନାହିଁ।ବିଜେପି ଏବେ ମାସ୍ ପାର୍ଟି।କିଛି ଦିନ ତଳେ ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହା କହୁଥିଲେ, ବିଜେପି ଏବେ କ୍ୟାଡର ବେସ ସହିତ ମାସ୍ ପାର୍ଟି ବି ହୋଇ ଯାଇଛି।ରାଷ୍ଟ୍ରୀୟ ସ୍ତରରେ ହୁଏତ ତାହା ହୋଇଥାଇ ପାରେ।କିନ୍ତୁ, ଓଡ଼ିଶାରେ ନୁହେଁ।ଓଡ଼ିଶାରେ ବିଜେପି କେବଳ (ବିଚାରଧାରା ବିହୀନ) ମାସ୍ ପାର୍ଟି।ଅନ୍ତତଃ ପକ୍ଷେ ୨୦୧୯ରେ ତାହାର ପ୍ରମାଣ ମିଳିଯାଉଛି।ଓଡ଼ିଶା ବିଜେପିରୁ ଏବେ ଧୀରେ ଧୀରେ ସ୍ୱୟଂ ସେବକ ମାନେ ଦୂରେଇ ଯାଉଛନ୍ତି।ସଂଘ ବିଚାରଧାରା ସହିତ ଆଦୌ ଜଡ଼ିତ ନଥିବା ଏକ ଗୋଷ୍ଠୀ ଦ୍ୱାରା ଆଜି ଓଡ଼ିଶା ବିଜେପି ପରିଚାଳିତ।୨୧ଟି ଲୋକସଭା ଏବଂ ୧୪୭ ବିଧାନସଭା ପାର୍ଥି ମଧ୍ୟରୁ କେତେ ଜଣ ସ୍ୱୟଂ ସେବକ?କେତେ ଜଣ ସଂଘ ସମ୍ପର୍କିତ?ହାତ ଗଣତି ଯେଉଁ କେତେ ଜଣ ବା ସଂଘ ବିଚାରଧାରାର ବ୍ୟକ୍ତି ବିଜେପି ଭିତରେ ଅଛନ୍ତି, ତାଙ୍କ ସ୍ୱରକୁ ଚାପି ଦିଆଯାଇଛି।ଯିଏ ଚାପି ହେଇନି, ସେ ଦଳ ଛାଡ଼ିଦେଇଛି।
ପଦ୍ମ ଧରି ପୁରୁଷତ୍ୱ ପାଇଗଲେ ଶ୍ରୀଖଣ୍ଡୀ; ରାଜ୍ୟ ସରକାର ବଦଳିବା ଦରକାର!
“ରାଜ୍ୟ ସରକାର ବଦଳିବା ଦରକାର” ଏବଂ ନିଜେ କ୍ଷମତାସୀନ ହେବା ଦରକାର ଉଦ୍ଦେଶ୍ୟରେ ବିଚାରଧାରାକୁ ଫୋପାଡ଼ି ଦେଇଛି ଓଡ଼ିଶା ବିଜେପି।ଖଣି ମାଫିଆ, ଅପରାଧୀ, ଆରଏସଏସ ବିରୋଧୀ, ହିନ୍ଦୁତ୍ୱ ବିରୋଧୀ ଆଜି ବିଜେପିରେ ସାମିଲ ହୋଇ ଯାଇଛନ୍ତି।ସରକାର ଗଠନ କରିବା ପାଇଁ ଅନ୍ୟ ଦଳରୁ ନେତାଙ୍କୁ ଆଣି ନିଜ ଦଳରେ ସାମିଲ କରାଇବା ଭଲ କଥା।କିନ୍ତୁ, ଏହାର ଅର୍ଥ ନୁହେଁ ଯେ ଦଳୀୟ ଦୃଷ୍ଟି କୋଣରୁ ବିଜେପିକୁ ବିରୋଧ କରିବା ବାଦେ, ଯେଉଁମାନେ ଲକ୍ଷ୍ମଣାନନ୍ଦ ସରସ୍ୱତୀଙ୍କ ହତ୍ୟା ପରେ ଆୟୋଜିତ ଆନ୍ଦୋଳନକୁ ବିରୋଧ କରୁଥିଲେ, ସ୍ୱାମୀଜୀଙ୍କ ପ୍ରତି କୁତ୍ସାରଟନା କରୁଥିଲେ, ଯିଏ ବାମପନ୍ଥୀ ବିଚାରଧାରାର, ଯିଏ ବେଆଇନ ଗୋଚାଲାଣକୁ ସମର୍ଥନ କରୁଥିଲେ, ଯେଉଁମାନେ ଟୁକୁଡ଼େ ଟୁକୁଡ଼େ ଗ୍ୟାଙ୍ଗକୁ ସମର୍ଥନ କରୁଥିଲେ, ସେହିମାନେ ସବୁ ଆଜି ବିଜେପିରେ?ସେମାନଙ୍କ ହାତରେ କ୍ଷମତା।ବିଚରା, ବିଚାରଧାରାକୁ ନେଇ ଲଢ଼ି ଆସିଥିବା ବ୍ୟକ୍ତିମାନେ ଏବେ କରିବେ କ’ଣ?
ସମ୍ବଦ୍ଧିତ ଖବର –
ଟିକେଟ ବଣ୍ଟନ ପ୍ରକ୍ରିୟାକୁ ନେଇ ସଂଘ ପରିବାରରେ ବିଦ୍ରୋହ:ବିଜେପିର ସାଥି ଏବେ ଅର୍ବାନ ନକ୍ସଲ!
ଏହିପରି ସବୁ ଘଟଣାକୁ ନେଇ ସଂଘ ଭିତରେ ଏବେ ବିଭେଦ।ଅନେକ୍ କାର୍ଯ୍ୟକର୍ତ୍ତା ଓଡ଼ିଶା ବିଜେପିର କାର୍ଯ୍ୟଶୈଳୀରେ କ୍ଷୁବ୍ଧ।କିଛି ସ୍ୱର ଉତ୍ତୋଳନ କରୁଛନ୍ତି, ଆଉ କିଛି ନିରବ ହୋଇ ଯାଇଛନ୍ତି।ସଂଘ ଏକ ଅତ୍ୟନ୍ତ ଶୃଙ୍ଖଳିତ ସଙ୍ଗଠନ।ଏହାର କାର୍ଯ୍ୟକର୍ତ୍ତା (ସ୍ୱୟଂ ସେବକ) ମାନେ ଖୁବ୍ ଅନୁଶାସିତ।ଭାରତରେ ବିଜେପି ସରକାର ଗଠନ କରୁ, ଏହା ସଂଘ ନିଶ୍ଚିତ ଚାହିଁବ।ଏହି ଆଳରେ ଏବେ ରାଜ୍ୟ ସରକାର ବଦଳିବା ଦରକାର ଏବଂ ଓଡ଼ିଶାରେ ଡବଲ ଇଞ୍ଜିନ କଥା ଉଠୁଛି।ଅଧିକାଂଶ ସଂଘ କାର୍ଯ୍ୟକର୍ତ୍ତା ମାନଙ୍କର ଏ’ନେଇ ଆଗ୍ରହ ନାହିଁ।ଯଦି ବା କିଏ ଏ’ ନେଇ ପ୍ରଶ୍ନ ଉଠାଉଛି, ତେବେ ଫାଇଦାରେ ରହିଥିବା କେତେଜଣ ସେମାନଙ୍କୁ ରାଷ୍ଟ୍ର ନିର୍ମାଣ, ଅନୁଶାସନ କଥା କହି ନିରବ କରାଇ ଦେଉଛନ୍ତି।ବିଜେପିର ମଙ୍ଗୁଆଳ ମାନେ ସଂଘର ଏ’ ଦୁର୍ବଳତା ଜାଣିଛନ୍ତି।ସଂଘ ବିଚାରଧାରା ଲୋକମାନଙ୍କୁ ଯେତେ ଅଣଦେଖା କିମ୍ବା ଖରାପ ବ୍ୟବହାର କଲେ ମଧ୍ୟ ସେମାନେ ବିଜେପିକୁ ଭୋଟ ଦେବେ, ଭାବି ସେମାନେ ଇମୋସନାଲ ଅତ୍ୟାଚାର କରୁଛନ୍ତି।ମୋଦିଙ୍କ “କଂଗ୍ରେସ ମୁକ୍ତ” ନ୍ୟାରାକୁ ତ’ ଓଡ଼ିଶାରେ ବିଜେପି କାର୍ଯ୍ୟକାରୀ କରିପାରିଲା ନାହିଁ, ତାହା ହୁଏତ ନବୀନ ପଟ୍ଟନାୟକ ତାହା କରୁଛନ୍ତି।କିନ୍ତୁ, ଓଡ଼ିଶା ବିଜେପି ବୋଧେ ଆରଏସଏସ ମୁକ୍ତ ବିଜେପି ଗଢ଼ି ତୋଳୁଛି!//ଦେବଦତ୍ତ