ନୂଆଦିଲ୍ଲୀ ୧୨ ନଭେମ୍ବର (ଓଡିଆ ପୁଅ) ବଲିଉଡ ଅଭିନେତା ଆସୀଫ ବସ୍ରା ଗୁରୁବାର ହିମାଚଳ ପ୍ରଦେଶର କାଙ୍ଗରା ଜିଲ୍ଲାର ଧର୍ମଶାଲାରେ ଫାଶୀ ଲଗାଇ ଆତ୍ମହତ୍ୟା କରିଛନ୍ତି। ପୋଲିସ ଘଟଣା ସ୍ଥଳରେ ପହଁଚି ତଦନ୍ତ ଆରମ୍ଭ କରିଥିବା ଜଣାପଡ଼ିଛି। ତେବେ ଆତ୍ମହତ୍ୟା କରିବାର କାରଣ କ’ଣ ତାହା ଏପର୍ଯ୍ୟନ୍ତ ଜଣା ପଡିନାହିଁ।
ଆସିଫ ଜଣେ ବିଦେଶୀ ମହିଳା ବନ୍ଧୁଙ୍କ ସହ ଧର୍ମଶାଲାର ଏକ ଭଡା ଘରେ ରହୁଥିଲେ। ରିପୋର୍ଟ ଅନୁଯାୟୀ, ସେ ଗୁରୁବାର ଅପରାହ୍ନରେ ନିଜ ପୋଷା କୁକୁରକୁ ବୁଲିବାକୁ ଯାଇଥିଲେ। ଏହା ପରେ ସେ ଘରକୁ ଫେରି ନିଜ ପୋଷା କୁକୁରର ଦଉଡିକୁ ଗଳାର ଫନ୍ଦା ବନାଇ ଆତ୍ମହତ୍ୟା କରିଥିବା ଜଣାପଡ଼ିଛି।
ଆସୀଫ୍ ବସ୍ରାଙ୍କୁ ଶେଷ ଥର ପାଇଁ ଡିଜ୍ନି ପ୍ଲସ୍ ହଟ୍ଷ୍ଟାର୍ ସିରିଜ୍ ହୋଷ୍ଟେଜ୍ ର ଦ୍ୱିତୀୟ ସିଜନରେ ଦେଖାଯାଇଥିଲା। ଏହା ବ୍ୟତୀତ ସେ ଚଳିତ ବର୍ଷ ମୁକ୍ତିଲାଭ କରିଥିବା ଆମାଜନ ପ୍ରାଇମ ଭିଡିଓର ସିରିଜ୍ ପାତାଳଲୋକ ରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ। ଆସିଫ୍ ‘ଜବ୍ ୱି ମେଟ୍’, ‘ୱାନ୍ସ ଅପନ ଟାଇମ୍ ଇନ୍ ମୁମ୍ବାଇ’, ‘କ୍ରୃଷ୍ଣ-୩’ ‘, ଏକ ଭିଲିଆନ୍’ ଭଳି ଚଳଚ୍ଚିତ୍ରରେ ଅଭିନୟ କରିଛନ୍ତି।
