ନୂଆଦିଲ୍ଲୀ, ଏପ୍ରିଲ ୨୯ (ଓଡ଼ିଆ ପୁଅ) : ଭାରତରେ କରୋନା ଭୂତାଣୁର ଦ୍ୱିତୀୟ ଲହର ଜାରି ରହିଛି। ଭାରତରେ କରୋନା ଭୂତାଣୁ ପରିସ୍ଥିତିକୁ ଠିକ୍ ଭାବରେ ପରିଚାଳନା ନକରିବାରୁ କେନ୍ଦ୍ରରେ ଥିବା ନରେନ୍ଦ୍ର ମୋଦୀ ସରକାରଙ୍କୁ କଡା ସମାଲୋଚନା କରାଯାଇଛି। ଏହି ସମୟରେ, ଫେସବୁକ୍, ଟ୍ୱିଟର ସମେତ ଅନେକ ସୋସିଆଲ ମିଡିଆ ପ୍ଲାଟଫର୍ମରେ ‘ପିଏମ ମୋଦୀ ଇସ୍ତଫା ଦିଅ’ (#ResignModi) ହ୍ୟାସଟ୍ୟାଗ ଚାଲିଛି। ଭାରତୀୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଇସ୍ତଫା ପାଇଁ ଆଦ୍ୱାନ ଦେଇଥିବା ଏହି #ହ୍ୟାସଟ୍ୟାଗ ବୁଧବାର (ଏପ୍ରିଲ ୨୮) ରେ ଫେସବୁକ ଦ୍ୱାରା ଅବରୋଧ କରାଯାଇଥିଲା। ‘ଦି ଗାର୍ଡିଆନ୍’ରେ ପ୍ରକାଶିତ ଏକ ରିପୋର୍ଟ ଅନୁଯାୟୀ, ଫେସବୁକ୍ ମଧ୍ୟ ହ୍ୟାସଟ୍ୟାଗକୁ ଅବରୋଧ କରି ୧୨, ୦୦୦ ରୁ ଅଧିକ ପୋଷ୍ଟକୁ ଡାଉନଗ୍ରେଡ୍ କରିଥିଲା ଯେଉଁଥିରେ ପ୍ରଧାନମନ୍ତ୍ରୀ ମୋଦୀଙ୍କ ଇସ୍ତଫା ଦାବି କରି ସରକାରଙ୍କୁ ସମାଲୋଚନା କରାଯାଇଥିଲା।
FB କହିଲା – #ResignModi କୁ ଭୁଲରେ ବ୍ଲକ କରାଯାଇଥିଲା
ତେବେ ‘ୱାଲ୍ ଷ୍ଟ୍ରିଟ୍ ଜେନେରାଲ୍’ ଏହାର ରିପୋର୍ଟରେ କହିଛି ଯେ, ବୁଧବାର ଦିନ ବ୍ଲକ ହେବାର କିଛି ଘଣ୍ଟା ପରେ ଫେସବୁକ୍ #ResignModi ହ୍ୟାସଟ୍ୟାଗକୁ ପୁନଃ ଆରମ୍ଭ କରିଛି। ଫେସବୁକ କହିଛି ଯେ #ResignModi ହ୍ୟାସଟ୍ୟାଗକୁ ଭୁଲରେ ବ୍ଲକ କରାଯାଇଥିଲା। ରିପୋର୍ଟରେ କୁହାଯାଇଛି ଯେ, କରୋନା ସଙ୍କଟକୁ ନେଇ ଭାରତୀୟଙ୍କ ପ୍ରତିକ୍ରିୟା ତଥା ଜନସାଧାରଣଙ୍କ ଅସନ୍ତୋଷକୁ ରୋକିବା ପାଇଁ ସରକାରଙ୍କ ଉଦ୍ୟମ ମଧ୍ୟରେ #ResignModi ହ୍ୟାସଟ୍ୟାଗ ଫେସବୁକରେ ଅନେକ ଘଣ୍ଟା ଧରି ବ୍ଲକ କରାଯାଇଥିଲା।
ଏହି କାର୍ଯ୍ୟାନୁଷ୍ଠାନ କାହିଁକି ନିଆଗଲା ଫେସବୁକ୍ ଏ ବିଷୟରେ କିଛି କହି ନାହିଁ
#ResignModi ହ୍ୟାସଟ୍ୟାଗକୁ କାହିଁକି ଅବରୋଧ କରାଯାଇଥିଲା, ଫେସବୁକ ତରଫରୁ କ’ଣ ପଦକ୍ଷେପ ନିଆଯାଇଛି ଏବଂ କାହିଁକି ପଦକ୍ଷେପ ନିଆଯାଇଛି ତାହା କହିବାକୁ ମନା କରିଦେଇଛି। ତେବେ ଏହି ହ୍ୟାସଟ୍ୟାଗ ହଟାଇବା ପାଇଁ ଫେସବୁକ କ୍ଷମା ମାଗିଛି। ଫେସବୁକ ମୁଖପାତ୍ର ଆଣ୍ଡି ଷ୍ଟୋନ କହିଛନ୍ତି, “ଆମର ଭୁଲ ଯୋଗୁଁ ହ୍ୟାସଟ୍ୟାଗକୁ ବ୍ଲକ କରାଯାଇଥିଲା, ଏହାର ଅର୍ଥ ନୁହେଁଯେ, ଆମକୁ ଭାରତ ସରକାରଙ୍କ ଦ୍ୱାରା କିଛି କୁହାଯାଇଥିଲା। କିମ୍ବା ଏହାକୁ ପୁନଃ ସ୍ଥାପିତ କରିବାକୁ ଭାରତ ସରକାର ଆମକୁ କହି ନାହାଁନ୍ତି।”
ଲୋକମାନେ ଟ୍ୱିଟରରେ ସୂଚନା ଦେଇଥିଲେ ଯେ, #ResignModi ହ୍ୟାସଟ୍ୟାଗକୁ FB ବ୍ଲକ କରିଛି
ଭାରତର ଅନେକ ଫେସବୁକ ବ୍ୟବହାରକାରୀ ଟ୍ୱିଟରରେ ପୋଷ୍ଟ କରିଥିଲେ ଯେ ‘#ResignModi’ ହ୍ୟାସଟ୍ୟାଗକୁ ଫେସବୁକରେ ବ୍ଲକ କରାଯାଇଛି।
