ନୂଆ ଦିଲ୍ଲୀ ୫-୧୨ (ଓଡ଼ିଆ ପୁଅ) କର୍ଣ୍ଣାଟକର ୧୫ଟି ବିଧାନସଭା କ୍ଷେତ୍ରରେ ହେଉଥିବା ଉପନିର୍ବାଚନ ପାଇଁ ଆଜି ମତଦାନ ଆରମ୍ଭ ହେଇଛି। ଉପନିର୍ବାଚନ ଫଳାଫଳ ୯ ଡିସେମ୍ବରରେ ଆସିବ, ଏହା ପରେ ଜଣା ପଡ଼ିବ କି ଏହି ଦକ୍ଷିଣତମ ରାଜ୍ୟରେ ଚାରି ମାସର ପୁରୁଣା ବିଜେପି ସରକାର ରହିବ କି ନାହିଁ। ମତଦାନ ସକାଳେ ୭ ଟାରୁ ଆରମ୍ଭ ହେଇ ସଂଧ୍ୟା ୬ ପର୍ଯ୍ୟନ୍ତ ଚାଲିଛି।
ଉପନିର୍ବାଚନ ଅଠାନୀ, କଗବାଡ଼, ଗୋକକ, ୟେଲାପୁର, ହିରେକେରୁର, ରାନୀବେନ୍ନୁର, ବିଜୟନଗର, ଚିକବେଲାପୁର, କେ.ଆର.ପୁରା, ଯଶବନ୍ତପୁରା, ମହାଲକ୍ଷ୍ମୀ ଲେଆଉଟ, ଶିବାଜୀନଗର, ହୋସାକୋଟେ, ଆର ଆର ପେଟେ, ହୁନସୁର ଆସନଗୁଡ଼ିକରେ ଚାଲିଛି। ମୁସକୀ (ରାଇଚୁର ଜିଲା) ଏବଂ ଆର ଆର ନଗର (ବେଂଗଲୁରୁ) ଉପନିର୍ବାଚନ ଉପରେ କର୍ଣ୍ଣାଟକ ହାଇକୋର୍ଟରେ ମଇ ୨୦୧୮ ବିଧାନସଭା ନିର୍ବାଚନର ଫଳାଫଳ କୁ ନେଇକରି ଦାଖଲ ମାମଲା କାରଣରୁ ରୋକ ଲଗାଯାଇଛି।
୧୫ଟି ବିଧାନସଭା କ୍ଷେତ୍ରରେ ୩୮ ଲକ୍ଷରୁ ଅଧିକ ମତଦାତା ଅଛନ୍ତି। ଯେଉଁଥିରେ ୧୯.୨୫ ଲକ୍ଷ ପୁରୁଷ ଏବଂ ୧୮.୫୨ ଲକ୍ଷ ମହିଳା ଅଛନ୍ତି। ୧୫ଟି ବିଧାନସଭା କ୍ଷେତ୍ରର ୮୮୪ ଅତିସମ୍ବେଦନଶୀଳ ମତଦାନ କେନ୍ଦ୍ର ସହିତ ୪୧୮୫ ମତଦାତା କେନ୍ଦ୍ର ଉପରେ ମତଦାନ ହେବ। ଏହି ମତଦାନ କେନ୍ଦ୍ରଗୁଡ଼ିକ ଉପରେ ସମ୍ପୂର୍ଣ୍ଣ ଦିନର ମତଦାନ ପାଇଁ ସର୍ବମୋଟ ୮, ୩୨୬ ବାଲାଟ ୟୁନିଟ୍ସ, ୮, ୧୮୬ କଣ୍ଟ୍ରୋଲିଙ୍ଗ ୟୁନିଟ୍ସ ଏବଂ ୭, ୮୭୬ ଭିଭିପାଟ୍ ରହିଛି। ୧୫ ଟି ବିଧାନସଭା କ୍ଷେତ୍ରରେ ସର୍ବମୋଟ ୧୬୫ ଜଣ ପ୍ରାର୍ଥୀ ନିର୍ବାଚନ ଲଢ଼ୁଛନ୍ତି, ଯେଉଁଥିରୁ ୧୨୬ ନିର୍ଦଳୀୟ ଏବଂ ୯ଜଣ ମହିଳା ସାମିଲ ଅଛନ୍ତି।
ବିଜେପି ଏବଂ ବିରୋଧି ଦଳ କଂଗ୍ରେସ ଏହି ସମସ୍ତ ୧୫ ବିଧାନସଭା ଆସନ ଉପରେ ନିର୍ବାଚନ ଲଢ଼ୁଛନ୍ତି। ଜେଡିଏସ ନିଜର ୧୨ଟି ଆସନ ଉପରେ ପ୍ରାର୍ଥୀ ଛାଡ଼ିଛି। ଯେଉଁଠାରେ ନିର୍ବାଚନ ତ୍ରିକୋଣୀୟ ହେବାର ସମ୍ଭାବନା ଅଛି। ବେଲଗାବୀ ଜିଲ୍ଲାର ଅଠାନୀ, ଉତ୍ତର କନ୍ନଡ଼ ଜିଲ୍ଲାର ୟେଲାପୁର ଏବଂ ବାଙ୍ଗାଲୁରୁ ଗ୍ରାମୀଣ ଜିଲ୍ଲାର ହୋସାକୋଟରେ ବିଜେପି ଏବଂ କଂଗ୍ରେସ ମଧ୍ୟରେ ସିଧା ପ୍ରତିଦ୍ୱନ୍ଦିତା ହେବ। ବିଜେପି ନିର୍ବାଚନ ରଣଭୂମିରେ କଂଗ୍ରେସ ଏବଂ ଜେଡିଏସ ଛାଡ଼ିକରି ଆସିଥିବା କ୍ରମଶଃ ୧୧ ଏବଂ ତିନିଜଣ ବିଧାୟକମାନଙ୍କୁ ଟିକେଟ ଦେଇଛି। ଏହି ପ୍ରାର୍ଥୀମାନେ ୧୪ ନଭେମ୍ବରରେ ଶାସକ ଦଳରେ ଯୋଗଦେଇଥିଲେ।
ସୁପ୍ରୀମକୋର୍ଟ ୧୩ ନଭେମ୍ବରରେ ତାଙ୍କର ରାୟ ଶୁଣାଇଥିଲେ। ସେମାନଙ୍କ ଅଯୋଗ୍ୟତାକୁ ବଳବତ୍ତର ରଖିଥିଲେ ସୁପ୍ରିମ କୋର୍ଟ। କିନ୍ତୁ ସେମାନଙ୍କୁ ନିର୍ବାଚନ ଲଢିବା ପାଇଁ ଅନୁମତି ଦେଇଥିଲେ। ବିଧାନସଭା ଅଧ୍ୟକ୍ଷ କେ.ଆର.ରମେଶ କୁମାର ୨୫ ଏବଂ ୨୮ ଜୁଲାଇରେ ଏହି ବିଧାୟକମାନଙ୍କୁ ଅଯୋଗ୍ୟ ଘୋଷିତ କରିଥିଲେ। ଏହି ୧୫ଟି ବିଧାନସଭା କ୍ଷେତ୍ରର ଉପନିର୍ବାଚନ ପାଇଁ ୨୧, ୦୦୦ ମତଦାନ ଅଧିକାରୀ ଏବଂ ପ୍ରାୟତଃ ୧୯, ୦୦୦ ସୁରକ୍ଷାକର୍ମିଙ୍କୁ ନିଯୁକ୍ତ କରାଯାଇଛି। ଯେଉଁଥିରେ ରାଜ୍ୟ ପୁଲିସ ଏବଂ କେନ୍ଦ୍ରୀୟ ବଳ ମଧ୍ୟ ସାମିଲ ଅଛନ୍ତି। ଏହି ୧୫ଟି ଆସନ ଉପରେ ଉପନିର୍ବାଚନ ହେଉଥିବା ଆସନରେ ୧୨ ଟି କଂଗ୍ରେସ ପାଖରେ ଥିବାବେଳେ ତିନୋଟି ଜେଡିଏସ ପାଖରେ ଥିଲା। ବିଧାୟକମାନଙ୍କର ବିଦ୍ରୋହ କାରଣରୁ ଗଠବନ୍ଧନ ସରକାର ଭାଙ୍ଗିଯାଇଥିଲା।
