ଭଦ୍ରକ, ୨୮ା୮ (ଓଡ଼ିଆ ପୁଅ / ସ୍ନିଗ୍ଧା ରାୟ) – ବାରିକପୁର ବାଘମରା ଗ୍ରାମର ସତ୍ୟଜିତ ଗୋଚ୍ଛାୟତ ରାଜ୍ୟସ୍ତରୀୟ ସାଇକେଲ ଚାଳନା ପ୍ରତିଯୋଗୀତାରେ ପ୍ରଥମ ସ୍ଥାନ ହାସଲ କରି ପୁରସ୍କୃତ ହୋଇଛନ୍ତି । ରବିବାର ବାଲେଶ୍ୱର ମାରୱାରୀ ଯୁବ ମଞ୍ଚ ଦ୍ୱାରା ଆୟୋଜିତ ‘ସାଇକ୍ଲୋଥନ’ ପ୍ରତିଯୋଗୀତାରେ ଅଂଶଗ୍ରହଣ କରିଥିବା ୪ ଶହ ପ୍ରତିଯୋଗୀଙ୍କ ମଧ୍ୟରେ ପ୍ରଥମ ସ୍ଥାନ ଅଧିକାର କରି ପୁରସ୍କୃତ ହୋଇଥିବା ଜଣାଯାଇଛି । ଯୁବ ମଂଚ ସଭାପତି ଅଙ୍କିତ ଖଣ୍ଡେଲୱାଲ, ସମ୍ପାଦକ ଶୁଭମ ପୋଦ୍ଦାର, ଆବାହକ ନିଖିଳ ଖଣ୍ଡେଲୱାଲ, ରୋହିତ ଅଗ୍ରୱାଲଙ୍କ ଉପସ୍ଥିତିରେ ବାଲେଶ୍ୱର ସାଂସଦ ପ୍ରତାପ ଷଡଙ୍ଗୀ ମୁଖ୍ୟଅତିଥି ଭାବେ ଯୋଗଦେଇ ସତ୍ୟଜିତଙ୍କୁ ଟ୍ରଫି ପ୍ରଦାନ କରିଥିଲେ । ଏଠାରେ ପ୍ରକାଶ ଯୋଗ୍ୟ ଯେ ବାରିକପୁର ଉଚ୍ଚ ବିଦ୍ୟାଳୟର ଅଷ୍ଟମ ଶ୍ରେଣୀ ଛାତ୍ର ସତ୍ୟଜିତ ଗୋଚ୍ଛାୟତ ସାଇକେଲ ଚାଳନା ଚମ୍ପିଅନସିପ ପଦକ ହାସଲ କରି କ୍ରୀଡା ହଷ୍ଟେଲରେ ଅଧିକ ତାଲିମ ପାଇଁ ରାଜ୍ୟ ସରକାରଙ୍କ ଦ୍ୱାରା ଯୋଗ୍ୟ ବିବେଚିତ ହୋଇଛନ୍ତି । ସେଠାରେ ଶିକ୍ଷା ଗ୍ରହଣ ସହ ସାଇକେଲ ଚାଳନା ପ୍ରତିଯୋଗୀତା ପାଇଁ ତାଲିମ ଗ୍ରହଣ କରୁଛନ୍ତି । ସତ୍ୟଜିତ(୧୩) ଗତ ଜାନୁୟାରୀ ୫ ତାରିଖରେ ମୁମ୍ବାଇ ଠାରେ ଅନୁଷ୍ଠିତ ହୋଇଥିବା ଜାତୀୟ ସାଇକେଲ ଚାଳନା ପ୍ରତିଯୋଗୀତାରେ ୧୫ତମ ସ୍ଥାନ ହାସଲ କରିଥିଲେ । ଗତ ୨୦୨୨ ନଭେମ୍ବର୧୨ ଓ ୧୩ ତାରିଖରେ ଚରମ୍ପା ଠାରେ ଅନୁଷ୍ଠିତ ୩୯ତମ ରାଜ୍ୟ ସାଇକେଲ ଚାଳନା ପ୍ରତିଯୋଗୀତାରେ ସର୍ବକନିଷ୍ଠ ବର୍ଗରେ ସତ୍ୟଜିତ ଚାମ୍ପିଅନ ହେବା ସହ ଜାତୀୟ ଚାମ୍ପିଅନସିନ ପ୍ରତିଯୋଗୀତା ପାଇଁ ଯୋଗ୍ୟ ବିବେଚିତ ହୋଇଥିଲେ । ଏବେ ସତ୍ୟଜିତ ଜାତୀୟ ଚାମ୍ପିଅନସିପ ପାଇଁ ଅଭ୍ୟାସ ଜାରି ରଖିଛନ୍ତି । ସାଇକେଲ ଚାଳନା ପ୍ରତି ସତ୍ୟଜିତଙ୍କ ଋଚି ଓ ଅଭ୍ୟାସ ତାଙ୍କୁ ଜାତୀୟସ୍ତରକୁ ନେଇପାରିଛି ବୋଲି ପିତା ସୁବାସ ପ୍ରକାଶ କରିଛନ୍ତି ।
