ଭଦ୍ରକ, ୧୦ା୭ (ଓଡ଼ିଆ ପୁଅ / ସ୍ନିଗ୍ଧା ରାୟ) – ପବିତ୍ର ଶ୍ରାବଣମାସରେ ୨ୟ ସୋମବାରରେ ଆରଡିପୀଠ ବାବା ଆଖଣ୍ଡଳମଣିଙ୍କୁ ଜଳଲାଗି କରିବା ପାଇଁ ରାଜ୍ୟର ବିଭିନ୍ନ ପ୍ରାନ୍ତରରୁ ହଜାର ହଜାର କାଉଡିଆଙ୍କ ଭିଡ ଜମିଥିଲା ପୀଠରେ । ସୋମବାର ଭୋର ରୀତିନୀତି ଅନୁଯାୟୀ ପହଡ ଖୋଲିବା ପରେ ମଙ୍ଗଳ ଆଳତୀ, ମହାସ୍ନାନ, ଘର୍ଷଣଲାଗି ସରିବା ପରେ କାଉଡିଆ ଭକ୍ତମାନେ ସ୍ୱତନ୍ତ୍ର ବ୍ୟାରିକେଡ ଯାଇ ମଣିବାବାଙ୍କୁ ଜଳଲାଗି କରିଥିଲେ । ଏଥିପାଇଁ ଜିଲା ଓ ମନ୍ଦିର ପ୍ରଶାସନ ପକ୍ଷରୁ ପୀଠରେ ବ୍ୟାପକ ସୁରକ୍ଷା ବ୍ୟବସ୍ଥା କରାଯାଇଥିଲା । ବିଶେଷକରି ଜଳପଥରେ ଆସୁଥିବା କାଉଡିଆଙ୍କ ସୁରକ୍ଷିତ ଯାତୟତ ପାଇଁ ଅଧିକ ସଂଖ୍ୟକ ମୋଟର ଚାଳିତ ଡଙ୍ଗା ନିୟୋଜିତ କରାଯାଇଥିବାବେଳେ ନଦୀର ଉଭୟ ପାଶ୍ୱର୍ରେ ଅଗ୍ନିଶମ ବାହିନୀ ଓ ଓଡ୍ରାଫ୍ ଟିମ୍ ମୁତୟନ ରହିଥିଲେ । ସେହିପରି ମନ୍ଦିର ପରିସରରେ ଉଜ୍ୱଳ ଆଲୋକ ବ୍ୟବସ୍ଥା ସହିତ କାଉଡିଆ ଭକ୍ତ ଧାଡିରେ ଯେପରି ଯାଇ ଜଳଲାଗି କରିବେ, ସେଥିପାଇଁ ସ୍ୱତନ୍ତ୍ର ବ୍ୟାରିକେଡ୍ ନିର୍ମାଣ କରାଯାଇଥିଲା । ଭିଡକୁ ଦୃଷ୍ଟିରେ ରଖି ପୀଠରେ ବ୍ୟାପକ ପୁଲିସ୍ ମୁତୟନ ରହିଥିଲେ ।
