ନୂଆ ଦିଲ୍ଲୀ ୧-୪ (ଓଡ଼ିଆ ପୁଅ) ରାଜସ୍ଥାନ ସରକାର ଏବେ ରାଜ୍ୟବାସୀଙ୍କ ପାଇଁ ଏକ ବିଶେଷ ଘୋଷଣା କରିଛନ୍ତି। ସରକାର ଘୋଷଣା କରିଛନ୍ତି ଯେ, ଏପ୍ରିଲ ୧ ରୁ ରାଜ୍ୟରେ ମାସକୁ ମାତ୍ର ୧୦୦ ୟୁନିଟ୍ ବିଦ୍ୟୁତ୍ ବ୍ୟବହାର କରୁଥିବା ଲୋକଙ୍କୁ ପ୍ରତି ମାସରେ ୫୦ ୟୁନିଟ୍ ବିଦ୍ୟୁତ୍ ମାଗଣାରେ ଦିଆଯିବ।
ସମସ୍ତ ଘରୋଇ ଗ୍ରାହକଙ୍କ ପାଇଁ ୧୫୦ ୟୁନିଟ୍ ପର୍ଯ୍ୟନ୍ତ ବ୍ୟବହାର ପାଇଁ ୟୁନିଟ୍ ପିଛା ୩ ଟଙ୍କା ଏବଂ ୧୫୦ ରୁ ୩୦୦ ୟୁନିଟ୍ ବ୍ୟବହାର ପାଇଁ ୟୁନିଟ୍ ପିଛା ୨ ଟଙ୍କା ରାଜ୍ୟ ସରକାର ପ୍ରଦାନ କରିବେ ବୋଲି ରାଜ୍ୟ ସରକାର କହିଛନ୍ତି। ଗେହଲୋତ୍ ସରକାରଙ୍କ ଅନୁଯାୟୀ ୧.୧୮ କୋଟି ପରିବାର ଏଥିରୁ ଉପକୃତ ହେବେ।
ଚିରଞ୍ଜୀବୀ ସ୍ୱାସ୍ଥ୍ୟ ଯୋଜନାରେ ବୃଦ୍ଧି
ଅନ୍ୟଏକ ଫ୍ଲାଗସିପ୍ ଯୋଜନା, ଚିରଞ୍ଜୀବୀ ସ୍ୱାସ୍ଥ୍ୟ ଯୋଜନା ଅଧୀନରେ ବୀମାଭୁକ୍ତ ହୋଇଥିବା ଅର୍ଥକୁ ୫ ଲକ୍ଷରୁ ୧୦ ଲକ୍ଷକୁ ବୃଦ୍ଧି କରାଯାଇଛି ବୋଲି ଗେହେଲୋତ୍ ସରକାର ଘୋଷଣା କରିଛନ୍ତି। ଏଥିରୁ ୧.୩୪ କୋଟି ପରିବାର ଉପକୃତ ହେବେ ବୋଲି ସରକାର ଦାବି କରିଛନ୍ତି।
୧୨୫ ଦିନ ରୋଜଗାର
ଏହା ସହିତ ରାଜ୍ୟ ସରକାର ଘୋଷଣା କରିଛନ୍ତି ଯେ NREGA ଯୋଜନା ଅଧୀନରେ ଏହା ୧୦୦ ଦିନ ପରିବର୍ତ୍ତେ ୧୨୫ ଦିନ ରୋଜଗାର ଯୋଗାଇ ଦିଆଯିବ। ସରକାର କହିଛନ୍ତି ଯେ, ଏପ୍ରିଲ ୧ ରୁ ସମସ୍ତ ସରକାରୀ ଡାକ୍ତରଖାନାରେ ଓପିଡି ଏବଂ ଆଇପିଡି ଏକ ମାସ ପାଇଁ ମାଗଣା ରହିବ ଏବଂ ମେ ୧ ରୁ ଏହାକୁ ସମ୍ପୂର୍ଣ୍ଣ ରୂପେ କାର୍ଯ୍ୟକାରୀ କରିବା ପାଇଁ ସମସ୍ତ ବୈଷୟିକ ସମସ୍ୟାର ଯତ୍ନ ନିଆଯିବ।
