ଭୁବନେଶ୍ୱର: ଭୁବନେଶ୍ୱର ବିଜେପିର ଅସନ୍ତୁଷ୍ଟ ବିଜେପି ନେତା ଜଗନ୍ନାଥ ପ୍ରଧାନ ଦଳକୁ ପୁଣି ଫେରିଥିବା ଜଣାପଡ଼ିଛି। ଜଗା ପ୍ରଧାନଙ୍କୁ ଆଜି ଭୁବନେଶ୍ୱର ସ୍ଥିତ ରାଜ୍ୟ ବିଜେପି କାର୍ଯ୍ୟାଳୟରେ ଦେଖିବାକୁ ମିଳିଛି। ଫଟୋଟିରେ ଜଗା ପ୍ରଧାନଙ୍କ ସହିତ ରାଜ୍ୟ ମିଡିଆ ସେଲ୍ ସହ ସଂଯୋଜକ ସୁଜିତ ଦାସ, ମହିଳା ମୋର୍ଚ୍ଚା ମିଡିଆ ସେଲ୍ ସଂଯୋଜିକା ସୁଚରୀତା ଜେନାମଣି ଏବଂ ରାଜ୍ୟ ଲିଗାଲ୍ ସେଲ୍ ସଂଯୋଜକ ଜୟନ୍ତ ଜେନା ଉପସ୍ଥିତ ଅଛନ୍ତି। ସୂଚନାଯୋଗ୍ୟ ଯେ ଜଗା ପ୍ରଧାନ ଭୁବନେଶ୍ୱର ଜିଲ୍ଲା ସଭାପତି ବାବୁ ସିଂ ଏବଂ ନିଜକୁ ଜିଲ୍ଲାର ସୁପର୍ ସଭାପତି ଭାବୁଥିବା ଜଣେ ନେତାଙ୍କ କାର୍ଯ୍ୟକଳାପରେ ଅସନ୍ତୁଷ୍ଟ ଥାଇ ଦଳଠାରୁ ଦୂରେଇ ରହୁଥିଲେ। ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀ ଜଗାଙ୍କୁ ଭେଟି ମାନଭଞ୍ଜନ କରିବାକୁ ଚେଷ୍ଟା କରି ବିଫଳ ହୋଇଥିବା ବେଳେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମଧ୍ୟ ଜଗାଙ୍କୁ ମନାଇବାରେ ବିଫଳ ହୋଇଥିଲେ ବୋଲି କୁହାଯାଏ। ତେବେ ଆଜି ହଠାତ୍ ଜଗା ପ୍ରଧାନ ପାର୍ଟି ଅଫିସ୍ ଭିତରେ ଦେଖାଯିବା ଏବଂ ଏହାର ପ୍ରଚ୍ଛଦ ପଟର ନାୟକ କିଏ ନେଇ ରହସ୍ୟ ରହିଛି।
/-DevDr
