ଭଦ୍ରକ, ୨୭ା୧୦ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଭଦ୍ରକ ସହରର ସମସ୍ତ ବିଶେଷ କରି ପୁରୁଣାବଜାର ଥାନା ଏବେ ଦଲାଲଙ୍କ କବଜାରେ । ଶାସକ ଦଳର ନେତାଙ୍କ ଇଙ୍ଗିତରେ ଏହି ଥାନା ପରିଚାଳିତ ହେଉଛି । ଫଳରେ ପୌରାଞ୍ଚଳର ସବୁଠାରୁ ସମ୍ବେଦନଶୀଳ ପୁରୁଣାବଜାର ଥାନା ଉପରୁ ଲୋକଙ୍କ ଆସ୍ଥା ତୁଟିବାରେ ଲାଗିଛି । ନ୍ୟାୟ ଦେବା ବଦଳରେ ଥାନାଧିକାରୀ ଓ ଉକ୍ତ ଥାନାର କେତେକ ପୁଲିସ ଅଧିକାରୀ ଓ କର୍ମଚାରୀ କେତେକ ଦଲାଲଙ୍କ ଜରିଆରେ ସାଧାରଣ ଲୋକଙ୍କୁ ନ୍ୟାୟ ଦେବା ପରିବର୍ତ୍ତେ ମାମଲା ରଫାଦଫା କରିବାକୁ ଅଧିକ ପସନ୍ଦ କରୁଛନ୍ତି । ଫଳରେ ନ୍ୟାୟ ପାଇଁ ସଂପୃକ୍ତ ଅଞ୍ଚଳର ବହୁ ବ୍ୟକ୍ତି ନିୟମିତ ଭାବରେ ଜିଲ୍ଲା ଆରକ୍ଷୀ ଅଧିକ୍ଷକ(ଏସପି)ଙ୍କ ଦ୍ୱାରସ୍ଥ ହେଉଛନ୍ତି । ଯାହାର ଏକ ନଜିର ହେଉଛି ଏହି ଥାନା ଅଧିନସ୍ଥ ବଡ଼ଶଙ୍କରପୁର ଅଞ୍ଚଳର ୰ ବାବୁ ଖାଁଙ୍କ ପୁତ୍ର ଓକିଲ ଖାଁ(୬୫) । ଏହି ମାମଲାରେ ଯଦି ପୁରୁଣାବଜାର ଥାନାଧିକାରୀ ଓ ତାଙ୍କ ଅଧସ୍ତନ ଅଧିକାରଙ୍କ ଉପରେ ୧୫ ଦିନ ମଧ୍ୟରେ କାର୍ଯ୍ୟାନୁ୍ଷ୍ଠାନ ଗ୍ରହଣ କରାନଯାଏ, ତେବେ ଭଦ୍ରକ ଟାଉନ କଂଗ୍ରେସ ପକ୍ଷରୁ ଏସପିଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦିଆଯିବ ବୋଲି ଭଦ୍ରକ ବିଧାନସଭା କଂଗ୍ରେସ ନେତା ନଳିନୀ ମହାନ୍ତି ଚେତାବନୀ ଦେଇଛନ୍ତି ।
ଶ୍ରୀ ମହାନ୍ତି ଅଭିଯୋଗ କରି କହିଛନ୍ତିଯେ ଓକିଲ ଖାଁଙ୍କ ଜଣେ ପୁତୁରାର ଏକ ଅଭିଯୋଗ ଭିତ୍ତିରେ ତାଙ୍କୁ ଗତ ୩୦ ତାରିଖ ସକାଳେ ଘରୁ ଉଠାଇ ଆଣିଥିଲା ପୁରୁଣାବଜାର ପୁଲିସ । ତେବେ ଉକ୍ତ ଥାନାରେ ଦଲାଲି କାର୍ଯ୍ୟ କରୁଥିବା ପୁରୁଣାବଜାର ଅଞ୍ଚଳର ସାମାଜିକ ଅନୁଷ୍ଠାନ ସ୍ୱାଭିମାନ ମଞ୍ଚର ଜଣେ ବରିଷ୍ଠ କର୍ମକର୍ତ୍ତାଙ୍କ ଭଣଜା ଜହୁର ଖାଁ ୬ ହଜାର ଟଙ୍କା ଦେଲେ ଓକିଲଙ୍କୁ ଛାଡ଼ି ଦିଆଯିବ ବୋଲି ତାଙ୍କ ପୁତ୍ର ରିୟାଜୁଦ୍ଦିନଙ୍କୁ କହିଥିଲେ । ସେହି ଅନୁଯାୟୀ ତାଙ୍କ ପୁତ୍ର ଦେଇଥିବା ୬ ହଜାର ଟଙ୍କା ତଦନ୍ତ କରୁଥିବା ମହିଳା ଅଧିକାରୀ ତପସ୍ୱିନୀ ମହାପାତ୍ରଙ୍କୁ ପ୍ରଦାନ କରିବା ପରେ ତାଙ୍କୁ ଥାନାରୁ ଅକ୍ଟୋବର ୧ ତାରିଖ ଛାଡିଥିଲା । ତେଣୁ ଏପରି ଅମାନବୀୟ ଆଚରଣରେ ଅତିଷ୍ଠ ହୋଇ ଓ ଅଭିଯୋଗକାରୀଙ୍କ ଧମକରେ ଭୟଭୀତ ହୋଇ ଶ୍ରୀ ଖାଁ ନ୍ୟାୟ ପାଇଁ ଏସପିଙ୍କ ଦ୍ୱାରସ୍ଥ ହୋଇ ତାଙ୍କ ଅନୁପସ୍ଥିତିରେ ଅତିରିକ୍ତ ଏସପିଙ୍କୁ ନିଜର ଅଭିଯୋଗପତ୍ର ପ୍ରଦାନ କରିଥିଲେ । ଏ ସମ୍ପର୍କରେ ଉପଯୁକ୍ତ ତଦନ୍ତ ହେବ ବୋଲି ତାଙ୍କୁ ପ୍ରତିଶ୍ରୁତି ମିଳିଥିଲା । କିନ୍ତୁ ଏହା ମିଳିନଥିଲା । ଏହା ଏକମାତ୍ର ମାମଲା ନୁହେଁ, ପୁରୁଣାବଜାର ଥାନାରେ ଏହିପରି ପ୍ରତ୍ୟେକ ଦିନ ବହୁ ଘଟଣା ଘଟି ଚାଲିଛି ଓ ସାଧାରଣ ଲୋକ ନ୍ୟାୟରୁ ବଂଚିତ ହେଉଛନ୍ତି । ଏଦିଗରେ ଜିଲ୍ଲା ଆରକ୍ଷୀ ଅଧିକ୍ଷକ ଆବଶ୍ୟକ କାର୍ଯ୍ୟାନୁଷ୍ଠାନ ୧୫ ଦିନ ମଧ୍ୟରେ ଗ୍ରହଣ ନ କଲେ ଟାଉନ କଂଗ୍ରେସ ପକ୍ଷରୁ ଏସପିଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦିଆଯିବ ବୋଲି ଶ୍ରୀ ମହାନ୍ତି ଚେତାବନୀ ଦେଇଛନ୍ତି । ଅନ୍ୟମାନଙ୍କ ମଧ୍ୟରେ ଜିଲ୍ଲା ଛାତ୍ର କଂଗ୍ରେସ ସଭାପତି ସୌମ୍ୟରଂଜନ ବାରିକ, ଚିଦାନନ୍ଦ ବାରିକ, ହେମନ୍ତ ମହାପାତ୍ର, ଇଲିୟାସ ଅଲ୍ଲୀ ଖାନ, ଏନାମୁଏ ହକ୍, ସେକ୍ ପାପା ପ୍ରମୁଖ ଉପସ୍ଥିତ ଥିଲେ ।
