ଭଦ୍ରକ, ୧୧ା୭ (ଓଡ଼ିଆ ପୁଅ / ସ୍ନିଗ୍ଧା ରାୟ)) – ଗତ ବର୍ଷ ମାର୍ଚ୍ଚ ମାସରୁ ଲାଗି ରହିଛି କରୋନା ମହାମାରୀର ପ୍ରକୋପ । ଇତିମଧ୍ୟରେ ଦେଢ଼ ବର୍ଷ ବିତିବାକୁ ବସିଛି । ତଥାପି ଏହି ମହାମରୀର ପଭାବ ଅନୁଭୂତ ହୋଇ ଚାଲିଛି ସବୁ ସ୍ଥାନରେ । ତେବେ କରୋନା କଟକଣା ଲକ୍ଡାଉନ ଓ ସର୍ଟ ଡାଉନ୍ ପାଇଁ ସାଧାରଣ ଲୋକଙ୍କ ଜୀବନ ଓ ଜିବୀକା ଗଭୀର ଭାବେ ପ୍ରଭାବିତ ହୋଇଛି । ଏହି ସମସ୍ୟାକୁ ଠିକ ଭାବରେ ଉପଲବ୍ଧି କରିଛନ୍ତି କେନ୍ଦ୍ର ଓ ରାଜ୍ୟ ସରକାର । ତେଣୁ ଜୀବନ ଜିବୀକା ଲଢ଼େଇରେ ସନ୍ତୁଳି ହେଉଥିବା ବିଭିନ୍ନ ବର୍ଗର ଲୋକଙ୍କ ପାଇଁ ଉଭୟ କେନ୍ଦ୍ର ଓ ରାଜ୍ୟ ସରକାର ବିଭିନ୍ନ ପ୍ରକାର ପ୍ରୋତ୍ସାହନ ଘୋଷଣା କରିଛନ୍ତି । ଗତବର୍ଷ ଦାରିଦ୍ର୍ୟ ସୀମାରେଖା ତଳେ ବସବାସ କରୁଥିବା ଲୋକଙ୍କୁ ଜାତୀୟ ନିରାପତ୍ତା ଯୋଜନାରେ ଖାଦ୍ୟ ସାମଗ୍ରୀ ଯୋଇ ଦିଆଯାଇଥିଲା । ଜନଧନ ଯୋଜନା ଏକାଉଣ୍ଟଧାରୀଙ୍କୁ ୩ମାସ ପର୍ଯ୍ୟନ୍ତ ୫ଶହ ଟଙ୍କାର ସହାୟତା ରାଶୀ ଘୋଷଣା କରିଥିଲେ କେନ୍ଦ୍ର ସରକାର । ସେହିପରି ନିର୍ମାଣ ଶ୍ରମିକ ଓ ଚାଲୀଙ୍କୁ ମଧ୍ୟ ଆର୍ଥୀକ ପ୍ରୋତ୍ସାହନ ଯୋଗାଇ ଦିଆଯାଇଥିଲା । ଅନୁରୂପ ନିକଟରେ ରାଜ୍ୟ ସରକାର ମହାତ୍ମାଗାନ୍ଧି ଜାତୀୟ ନିଶ୍ଚିତ କର୍ମନିଯୁକ୍ତି ଯୋଜନା (ମନରେଗା) ଅଧୀନରେ କାମ କରିଥିବା ଶ୍ରମିକଙ୍କ ଲାଗି ସ୍ୱତନ୍ତ୍ର କୋଭିଡ ସହାୟତା ଘୋଷଣା କରିଛନ୍ତି । ଏଥିନେଇ ପଞ୍ଚାୟତରାଜ ବିଭାଗ ପକ୍ଷରୁ ସମସ୍ତ ଜିଲ୍ଲାପାଳଙ୍କୁ ଅବଗତ କରାଯାଇଛି । ବିଭାଗୀୟ ସୂଚନାନୁଯାୟୀ; ଗତ ଅପ୍ରେଲ ପହିଲାରୁ ଜୁନ’ମାସ ୩୦ ତାରିଖ ମଧ୍ୟରେ ଯେଉଁ ଶ୍ରମିକମାନେ ମନରେଗା ଅଧୀନରେ କାମ କରିଥିବେ ସେମାନଙ୍କୁ ପ୍ରତ୍ୟେକ ଦିନର ମଜୁରି ଉପରେ ୫୦ ଟଙ୍କା କରି ସ୍ୱତନ୍ତ୍ର ସହାୟତା ପ୍ରଦାନ କରାଯିବ ।
ଏଥି ନିମିତ୍ତ ରାଜ୍ୟ ସରକାର ବିଧିବଦ୍ଧ ଭାବେ ଘୋଷଣା କରିଛନ୍ତି । ଏହି କ୍ରମରେ ସମଗ୍ର ରାଜ୍ୟରେ ମୋଟ ୩୫୨.୯୭ କୋଟି ଟଙ୍କାର ଆର୍ଥୀକ ସହାୟତା ଘୋଷଣା କରାଯାଇଛି । ଏଥିମଧ୍ୟରୁ ଭଦ୍ରକ ଜିଲ୍ଲା ଭାଗରେ ପଡ଼ିଛି ୭କୋଟି ୪୪ଲକ୍ଷ ଟଙ୍କା । ଜଗତ ଏପ୍ରିଲ ମାସରୁ ଜୁନ ମାସ ଶେଷ ପର୍ଯ୍ୟନ୍ତ ଯେଉଁମାନେ ମନରେଗା ଯୋଜନାରେ କାର୍ଯ୍ୟ କରିଥିବେ, ସେମାନଙ୍କ ପ୍ରତ୍ୟେକ ଦିନ ମଜୁରୀ ଉପରେ ମିଳିବ ୫୦ଟଙ୍କାର ସହାୟତା ରାଶୀ । ତେଣୁ ପରିସଂଖ୍ୟାନ ଅନୁଯାୟୀ ଏହି ତିନି ମାସ ମଧ୍ୟରେ ଶ୍ରମିକଙ୍କ ମଜୁରି ଅନୁପାତରେ ଉପକୃତ ହୋଇଥିବା ମୋଟ ୧୪ଲକ୍ଷ ୮୮ହଜାର ମଜୁରି ଉପରେ ମିଳିବ ଏହି ସହାୟତା ରାଶୀ । ଏହି ଆର୍ଥୀକ ରାଶୀ ପ୍ରଦାନ ସମୟରେ ସ୍ୱଛତା ରକ୍ଷା ଦିଗ ଉପରେ ଗୁରୁତ୍ୱ ଦିଆଯାଇଛି । ଏକ୍ଷେତ୍ରରେ କୌଣସି ଅନିୟମିତତାର ପ୍ରଶ୍ନ ଆସିଲେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବାର ଚେତାବନୀ ଦେଇଛି ପଞ୍ଚାୟତିରାଜ ବିଭାଗ । ତେବେ ରାଜ୍ୟ ସରକାରଙ୍କ ଏହି ସମ୍ବେଦନଶୀଳ ପଦକ୍ଷେପର ବାସ୍ତବ ଲାଭ ମନରେଗାରେ ନିୟୋଜିତ ଶ୍ରମଜୀବୀମାନେ ପାଇବେ ତ ବୋଲି ପ୍ରଶ୍ନ ଉଠିଛି । କାରଣ ଜିଲ୍ଲାତମାମ୍ ମନରେଗା ଯୋଜନା କାର୍ଯ୍ୟକାରୀ ହେଉଛି । ଏହି ଯୋଜନା ଠିକ୍ଠାକ୍ ଚାଲିଛି ବୋଲି ବିଭାଗ ପକ୍ଷରୁ କାଗଜପତ୍ରରେ ଦର୍ଶାଯାଉଛି । କିନ୍ତୁ ବାସ୍ତବ ଚିତ୍ର କିଛି ଅଲଗା । ଜିଲ୍ଲାର ପ୍ରାୟ ସମସ୍ତ ବ୍ଲକରେ ମନରୋଗା ଯୋଜନାରେ ମେସିନ କାମ କରିଥିବା ଅଭିଯୋଗ ହୋଇ ଆସୁଛି । ଭଦ୍ରକ ବ୍ଳକର ଗେଲପୁର ପଞ୍ଚାୟତ ହେଉ କିମ୍ବା ଧାମନଗର ବ୍ଳକର କାସିମପୁର ପଞ୍ଚାୟତ ହେଉ । ସବୁଠି ସମାନ ଅଭିଯୋଗ । ମିଥ୍ୟା ମଷ୍ଟର ରୋଲ ପ୍ରସ୍ତୁତ କରି ପଞ୍ଚାୟତ ନିର୍ବାହୀ ଅଧିକାରୀ, ବ୍ଲକର କନିଷ୍ଠ ଯନ୍ତ୍ରୀ ଓ ସରପଞ୍ଚମାନେ ମନରେଗା ଯୋଜନାର ଅର୍ଥକୁ ଯୋଜନାବଦ୍ଧ ଭାବେ ମେସିନ ଦ୍ୱାରା କାମ କରି ଶ୍ରମଜୀବୀଙ୍କ ପାଇଁ ଉଦ୍ଦିଷ୍ଟ ଅର୍ଥକୁ ହଡ଼ପ କରି ମାଲେମାଲ ହୋଇଛନ୍ତି । ତେଣୁ ମୁଖ୍ୟମନ୍ତ୍ରୀ ଏବେ ଘୋଷଣା କରିଥିବା ଅର୍ଥରାଶୀ ଏହି ବର୍ଗର ହଡ଼ପପକାରୀଙ୍କ ପକେଟକୁ ଯିବା ଏକପ୍ରକାର ନିଶ୍ଚିତ । ତେବେ ଦେଖିବାକୁ ବାକି ରହିଲା କିଏ କେତେ ପରିମାଣରେ ମନରେଗା ଶ୍ରମିକଙ୍କ ପ୍ରୋତ୍ସାହନ ରାଶୀକୁ ହଡ଼ପ କରୁଛି ।
