– ଉତ୍ତରପ୍ରଦେଶର ଶାହାଜାହାନପୁରରେ ଜଣେ ମହିଳା ୨୭ ବର୍ଷ ପୂର୍ବେ ଘଟିଥିବା ଏହି ଗଣଦୁଷ୍କର୍ମ ମାମଲାରେ ମାମଲା ଦାୟର କରିଛନ୍ତି।
– ଦୁଷ୍କର୍ମ ପରେ ପୀଡିତା ୧୪ ବର୍ଷ ବୟସରେ ଏକ ପୁତ୍ର ସନ୍ତାନ ଜନ୍ମ ଦେଇଥିଲେ।
– ପୁଅ ତା’ର ବାୟୋଲୋଜିକାଲ ପିତାଙ୍କ ବିଷୟରେ ଜାଣିବାକୁ ଚାହୁଁଛି
– ଏବେ ପୀଡିତା ଅଭିଯୁକ୍ତର ଡିଏନ୍ଏ ପରୀକ୍ଷା କରିବାକୁ ଦାବି କରିଛନ୍ତି।
ଲକ୍ଷ୍ନୌ ୭-୩ (ଓଡ଼ିଆ ପୁଅ) : ଉତ୍ତରପ୍ରଦେଶର ଶାହାଜାହାନପୁର ପୋଲିସ ୨୭ ବର୍ଷ ପୂର୍ବେ ହୋଇଥିବା ଏକ ଗଣ ଦୁଷ୍କର୍ମ ମାମଲାରେ ଦୁଇ ଭାଇଙ୍କ ବିରୋଧରେ ମାମଲା ରୁଜୁ କରିଛି। ଗଣ ଦୁଷ୍କର୍ମ ପରେ ୧୪ ବର୍ଷର ପୀଡିତା ଏକ ପୁଅକୁ ଜନ୍ମ ଦେଇଥିଲେ। ଏହି ମାମଲା କୋର୍ଟଙ୍କ ନିର୍ଦ୍ଦେଶରେ ପଞ୍ଜିକୃତ ହୋଇଥିଲା। ଏହି ମହିଳାଙ୍କର ବୟସ ପ୍ରାୟ ୪୦ ବର୍ଷ ଏବଂ ସେ ଏବେ ଲକ୍ଷ୍ନୌରେ ରୁହନ୍ତି। ତାଙ୍କ ପିଟିସନରେ ମହିଳା ଜଣକ ତାଙ୍କ ପୁଅର ଜୈବିକ ପିତାଙ୍କ ବିଷୟରେ ତଥ୍ୟ ପ୍ରମାଣ କରିବାକୁ ଉଭୟ ଅଭିଯୁକ୍ତଙ୍କ DNA ପରୀକ୍ଷା କରିବାକୁ ଦାବି କରିଛନ୍ତି। ପୀଡିତା କହିଛନ୍ତି ଯେ, ସାମାଜିକ କଳଙ୍କ ଭୟରେ ସେ ପୂର୍ବରୁ ପୋଲିସ ସହ ଯୋଗାଯୋଗ କରିନଥିଲେ କିନ୍ତୁ ବର୍ତ୍ତମାନ ସେ ତାଙ୍କ ପୁଅ ପାଇଁ ଏହା କରୁଛନ୍ତି। ପୁଅ ତାଙ୍କ ପିତାଙ୍କ ବିଷୟରେ ଜାଣିବାକୁ ଚାହୁଁଛି। ମହିଳା ଜଣକ ଏହା ମଧ୍ୟ କହିଛନ୍ତି ଯେ, ତାଙ୍କ ବିବାହ ପରେ ତାଙ୍କ ସ୍ୱାମୀ ଯେତେବେଳେ ଜାଣିଲେ ତାଙ୍କର ବିବାହ ପୂର୍ବରୁ ତାଙ୍କର ଏକ ପୁତ୍ର ଜନ୍ମ ହୋଇଥିଲା ଏହା ପରେ ସେ ତାଙ୍କଠାରୁ ଅଲଗା ହୋଇଯାଇଥିଲେ।
ଅଭିଯୁକ୍ତଙ୍କ ଡିଏନ୍ଏ ପରୀକ୍ଷା ପାଇଁ ପୋଲିସ ପ୍ରସ୍ତୁତ ହେଉଛି
ସିଟି ସର୍କଲ ଅଧିକାରୀ ପ୍ରବୀଣ କୁମାର ଯାଦବ କହିଛନ୍ତି ଯେ “ବ୍ୟବସାୟ କରୁଥିବା ଦୁଇ ଭାଇଙ୍କ ବିରୋଧରେ ଆମେ ଏକ ଗଣଦୁଷ୍କର୍ମ ମାମଲା ପଞ୍ଜିକୃତ କରିଛୁ। ଆମେ ଡିଏନଏ ପରୀକ୍ଷା ପାଇଁ ପ୍ରସ୍ତୁତ ହେଉଛୁ। ପୋଲିସ ଅଭିଯୁକ୍ତ ଦ୍ୱୟଙ୍କୁ ଚିହ୍ନଟ କରିଛି। ଯାଦବ କହିଛନ୍ତି ଯେ ୨୭ ବର୍ଷ ପୂର୍ବେ ଘଟିଥିବା ଏହି ମାମଲାରେ କିପରି ପ୍ରମାଣ ସଂଗ୍ରହ କରାଯାଇପାରିବ ତାହା ଦେଖିବା ଆବଶ୍ୟକ। ପୋଲିସ ବିଶ୍ୱାସ କରୁଛିଯେ, ଏହି ଘଟଣା ୧୯୯୪-୯୫ ରେ ଘଟିଥିଲା।
ଅଭିଯୁକ୍ତ ଚୁପ୍ ରହିବା ପାଇଁ ଧମକ ଦେଇଥିଲା
ଖବର ଅନୁଯାୟୀ, ସଦର ବଜାର ପୋଲିସ ଷ୍ଟେସନର ଷ୍ଟେସନ ହାଉସ ଅଧିକାରୀ ଅଶୋକ ପାଲ ସିଂ ଗଣମାଧ୍ୟମକୁ କହିଛନ୍ତି ଯେ, ମହିଳାଙ୍କ ଅନୁଯାୟୀ ସେ ଶାହାଜାହାନପୁରର ସଦର ବଜାର ଅଞ୍ଚଳରେ ତାଙ୍କ ଭଉଣୀଙ୍କ ସହ ରହିବାକୁ ଆସିଥିଲେ। ସେ କହିଛନ୍ତି ଯେ, ଯେତେବେଳେ ଦୁଇ ଭାଇ ଦୁଷ୍କର୍ମ କରିଥିଲେ, ସେତେବେଳେ ସେମାନଙ୍କର ବୟସ ପ୍ରାୟ ୨୦ ବର୍ଷ ହୋଇଥିଲା ଏବଂ ସେମାନେ ତାଙ୍କର ପଡୋଶୀ ଥିଲେ। ଯେତେବେଳେ ତାଙ୍କ ଭଉଣୀ ଏବଂ ଭାଉଜ ଘରେ ନଥିଲେ, ଅଭିଯୁକ୍ତ ତାଙ୍କୁ ଦୁଷ୍କର୍ମ କରି ଚୁପ୍ ରହିବାକୁ ଧମକ ଦେଇଥିଲା।
ପୀଡ଼ିତା କହିଛନ୍ତିଯେ, ସେ କାହାକୁ କିଛି କହି ନଥିଲେ ଏବଂ ଘଟଣାର କିଛି ଦିନ ପରେ ସେ ଏବଂ ତାଙ୍କ ଭଉଣୀ ଲକ୍ଷ୍ନୌ ଆସି ଯାଇଥିଲେ। ଯେତେବେଳେ ସେ ତାଙ୍କ ଗର୍ଭଧାରଣ ବିଷୟରେ ଜାଣିଲେ, ସେ ତାଙ୍କ ଭଉଣୀକୁ କହିଥିଲେ। ମହିଳା କହିଛନ୍ତି ଯେ ଏହା ପରେ ଅଭିଯୁକ୍ତ ତାଙ୍କ ଭଉଣୀକୁ ମଧ୍ୟ ଧମକ ଦେଇଥିଲା ଏବଂ ସେମାନେ ପୋଲିସରେ ନ ରହିବାକୁ ନିଷ୍ପତ୍ତି ନେଇଥିଲେ।
ପୁଅ ଏବେ ତା’ର ଜୈବିକ ପିତା ବିଷୟରେ ଜାଣିବାକୁ ଚାହୁଁଛି
ମହିଳାଙ୍କ ବୟସ ମାତ୍ର ୧୪ ବର୍ଷ ହୋଇଥିବାରୁ ଡାକ୍ତରମାନେ ଗର୍ଭପାତ କରିବାକୁ ମନା କରିଦେଇଥିଲେ। ସେ ଏକ ବାଳକକୁ ଜନ୍ମ ଦେଲେ ଏବଂ ସେମାନେ ଉକ୍ତ ନବଜାତ ଶିଶୁକୁ ଏକ ଦମ୍ପତି ପୋଷ୍ୟ ସନ୍ତାନ ଭାବରେ ଗ୍ରହଣ କଲେ ଯାହାଙ୍କୁ ସେମାନେ ପୂର୍ବରୁ ଜାଣିଥିଲେ। ତାଙ୍କ ଭଲ ଯତ୍ନ ନେବାକୁ ଦମ୍ପତ୍ତି ପ୍ରତିଶୃତି ଦେଇଥିଲେ। ପରେ ମହିଳା ଜଣକ ବିବାହ କରିଥିଲେ।
ସିଂଙ୍କ ଅନୁଯାୟୀ ପୀଡିତା ତାଙ୍କ ଅଭିଯୋଗରେ କହିଛନ୍ତି ଯେ ପୁଅ ବର୍ତ୍ତମାନ ବଡ ହୋଇଯାଇଛି। ସେ କିଛି ମାସ ପୂର୍ବରୁ ତାଙ୍କ ନିକଟକୁ ଆସି ଜୈବିକ ପିତାଙ୍କ ବିଷୟରେ ଜାଣିବାକୁ ଚାପ ପକାଇଥିଲେ। ତେଣୁ ସେ ଯୌନ ଉତ୍ପୀଡ଼ନ ମାମଲାରେ ଡିଏନ୍ଏ ପରୀକ୍ଷା ଏବଂ କାର୍ଯ୍ୟାନୁଷ୍ଠାନ ପାଇଁ କୋର୍ଟକୁ ଯିବାକୁ ନିଷ୍ପତ୍ତି ନେଇଥିଲେ।
