ନୟାଗଡ଼, ୮ା୯ (ଓଡ଼ିଆ ପୁଅ/ସୁରେନ୍ଦ୍ର ନାଥ ପ୍ରଧାନ): ନୟାଗଡ଼ ଜିଲ୍ଲା ଶିକ୍ଷାଧିକାରୀ ହେଲେ ସପନ ଜେନା। ନୟାଗଡ଼ ଶିକ୍ଷାଧିକାରୀ ଲକ୍ଷ୍ମୀଧର ବେହେରା ଗତ ଅଗଷ୍ଟ ମାସ ୧୯ ତାରିଖରେ ସ୍ୱେଚ୍ଛାକୃତ ଅବସର ପାଇଁ ଆବେଦନ କରି ଅନିର୍ଦ୍ଦିଷ୍ଟ କାଳ ପାଇଁ ଛୁଟିରେ ରହିଥିଲାବେଳେ ତାଙ୍କ ସ୍ଥାନରେ ବ୍ରଜେନ୍ଦ୍ର ଉଚ୍ଚବିଦ୍ୟାଳୟର ପ୍ରଧାନଶିକ୍ଷକ ଡିଇଓ ଦାୟିତ୍ୱରେ ରହିଥିଲେ। କିନ୍ତୁ ପରେ ରାଜ୍ୟ ଶିକ୍ଷା ବିଭାଗ ଖୋର୍ଦ୍ଧା ଜିଲାର ଶିକ୍ଷାଧିକାରୀ ବନ୍ଦନା ମହାପାତ୍ରଙ୍କୁ ନୟାଗଡ଼ ଡିଇଓ ଭାବେ ଅତିରିକ୍ତ ଦାୟିତ୍ୱ ପ୍ରଦାନ କରିଥିଲେ। ତେବେ ଆଜି ରାଜ୍ୟ ଶିକ୍ଷା ବିଭାଗ ଜଗତସିଂହପୁର ଅତିରିକ୍ତ ଜିଲା ଶିକ୍ଷାଧିକାରୀ ସପନ କୁମାର ଜେନାଙ୍କୁ ନୟାଗଡ଼ ଜିଲା ଶିକ୍ଷାଧିକାରୀ (ଭାରପ୍ରାପ୍ତ) ଭାବେ ନିଯୁକ୍ତି ଦେଇଛନ୍ତି।
