ନୟାଗଡ(ଓଡିଆ ପୁଅ/ଦେବୀପ୍ରସାଦ ଆଚାର୍ଯ୍ୟ)/୧୫/୦୪-ନୟାଗଡ ଜିଲ୍ଲା ରଣପୁର ଅଂଚଳରେ ଲକ୍ଡାଉନ୍ ପରେ କିଛି ଯୁବକ ଜୁଆ ଖେଳକୁ ପେଷା ଭାବରେ ଗ୍ରହଣ କରି ରଣପୁର ଅଂଚଳରେ ଜୁଆ ଖେଳ ଜାରି ରଖିଥିବା ରଣପୁର ପୋଲିସ୍ ନିକଟରେ ଖବର ପହଁଚିଥିଲା । ଖବର ପାଇବା ପରେ ରଣପୁର ଥାନା ଇନିସ୍ପେକ୍ଟର ରଶ୍ମିରଂଜନ ଦାଶ, ସବ୍ ଇନିସ୍ପେକ୍ଟର ପ୍ରିତୀ ପ୍ରକାଶ ନାୟକଙ୍କୁ ନେଇ ଏକ ଟିମ୍ ଗଠନ କରିଥିଲେ । ଏହି ଟିମ୍ ଜୁଆ ଆଡ୍ଡା ଚାଲିଥିବା ରଣପୁର ଖୁଣ୍ଟିଆ ସାହି ବାଡିପଟେ ଏପ୍ରିଲ୍ ୧୩ ତାରିଖ ସଂଧ୍ୟାରେ ଚଢାଉ କରିଥିଲେ । କିନ୍ତୁ ପୋଲିସ୍ ଦେଖି ଜୁଆଡିମାନେ ଫେରାର ହୋଇଯାଇଥିଲେ ।
ତେଣୁ ପୋଲିସ୍ ଏପ୍ରିଲ୍ ୧୪ ତାରିଖ ସଂଧ୍ୟାରେ ସାଧା ପୋଷାକରେ ସେହି ଜୁଆ ଆଡ୍ଡାକୁ ଘେରାଉ କରି ୫ଜଣକୁ ଗିରଫ କରିବାରେ ସକ୍ଷମ ହୋଇଥିବା ବେଳେ ୩ଜଣ ଫେରାର ହୋଇଥିବା ଜଣା ପଡିଛି । ସେମାନଙ୍କଠାରୁ ୧୨୫୦ଟଙ୍କା ନଗଦ କ୍ୟାସ୍ ଓ ୨ମୁଠା ତାସ୍ ଜବତ ହୋଇଛି । ଗିରଫ ଅଭିଯୁକ୍ତଙ୍କ ନାମରେ ଥାନା କେସ୍ ନଂ-୧୦୭/୨୦୨୦ ମାମଲା ଋଜୁ ହୋଇ ଜାମିନ୍ ରେ ଯାଇଥିବା ଜଣା ପଡିଛି । ଫେରାର ହୋଇଥିବା ୩ଜଣଙ୍କୁ ପୋଲିସ୍ ଖୋଜିବାରେ ଲାଗିଛି । ପୋଲିସ୍ ର ଏହିଭଳି ଚଢାଉ ଫଳରେ ଜୁଆଡିଙ୍କ ମନରେ ଭୟ ସୃଷ୍ଟି ହୋଇଛି ।
