ବାଲିଗୁଡା, ୨୫/୧୨.(ଓଡ଼ିଆ ପୁଅ/ସଞ୍ଜୟ କୁମାର ପାଣିଗ୍ରାହୀ) ଓଡ଼ିଶାର କଶ୍ମୀର କୁହାଯାଉଥିବା କନ୍ଧମାଳ ଜିଲ୍ଲା ବାଲିଗୁଡା ଉପଖଣ୍ଡ ଅନ୍ତର୍ଗତ ଦାରିଙ୍ଗବାଡ଼ିରେ ଏବେ ପର୍ଯ୍ୟଟକଙ୍କ ଭିଡ଼ ଜମୁଛି। ତେବେ ପର୍ଯ୍ୟଟନ କେନ୍ଦ୍ରଗୁଡ଼ିକରେ ଗାଡ଼ି ପାର୍କିଂ ପାଇଁ ଶହ ଶହ ଟଙ୍କା ଆଦାୟ କରାଯାଉଥିବାରୁ ଅସନ୍ତୋଷ ପ୍ରକାଶ ପାଉଛି। ଏହାକୁ ନେଇ କେଉଁଠି ଯୁକ୍ତିତର୍କ ହେଉଛି ତ କେଉଁଠି ପର୍ଯ୍ୟଟନକେନ୍ଦ୍ରକୁ ନ ଯାଉ ନିରାଶରେ ପର୍ଯ୍ୟଟକ ଫେରୁଥିବା ଦେଖାଯାଉଛି। ମିଡ଼ିୟୁବାନ୍ଦା ଜଳପ୍ରପାତ ସମେତ କିରିକୁଟିଠାରେ ଥିବା ନେଚର ଲଭର୍ସ ପଏଣ୍ଟ, ଡୁଲୁରୀ ପାଇନ ବଣରେ ବେଆଇନ ଭାବେ ପାର୍କି ପାଇଁ ଅର୍ଥ ସଂଗ୍ରହ କରି ପର୍ଯ୍ୟଟକଙ୍କୁ ଶୋଷଣ କରାଯାଉଥିବା ଅଭିଯୋଗ ହେଉଛି। ବୁଦ୍ଧିଜୀବୀ, ଅଟୋ ସଂଘ, ଟ୍ୟାକ୍ସିଂ ସଂଘ, ହୋଟେଲ ମାଲିକ ସଂଘ ପକ୍ଷରୁ ଏହାକୁ ବିରୋଧ କରାଯାଉଛି। ଏହି ସମସ୍ୟାର ସମାଧାନ କରାନଗଲେ ଆଗକୁ ପର୍ଯ୍ୟଟକଙ୍କ ସଂଖ୍ୟା ହ୍ରାସ ପାଇବ ବୋଲି ଆଲୋଚନା ହେଉଛି। ଦାସିଂବାଡ଼ିରେ ଥିବା ମିଡ଼ିୟୁବାନ୍ଦା ଜଳପ୍ରପାତର ୫ଶହ ମିଟର ଦୂରରୁ ସ୍ଥାନୀୟ ମହିଳା ସ୍ବୟଂ ସହାୟକ ଗୋଷ୍ଠୀ ପକ୍ଷରୁ ଗତ ୪ ବର୍ଷ ହେଲା ପାର୍କିଂ ଫି ସଂଗ୍ରହ କରାଯାଉଛି। ଏଥିପାଇଁ ପ୍ରଶାସନ ପକ୍ଷରୁ କୌଣସି ଅନୁମତି ଦିଆଯାଇ ନ ଥିବା କିମ୍ବା ଦରଧାର୍ଯ୍ୟ କରାଯାଇ ନ ଥିବା ଜଣାପଡିଛି। ସ୍ବୟଂ ସହାୟକ ଗୋଷ୍ଠୀ ପକ୍ଷରୁ ପଞ୍ଚାୟତକୁ ବାର୍ଷିକ ୧୨ ହଜାର ଟଙ୍କା ପ୍ରଦାନ କରିବାକୁ ଚୁକ୍ତିନାମା କରାଯାଇଥିବା ଅଭିଯୋଗ ହେଉଛି। ଏଠାରେ ବାଇକ ପିଚ୍ଛା ୨୦ ଟଙ୍କା ଆଦାୟ କରାଯାଉଥିବା ବେଳେ ଅଟୋ ୪୦ ଟଙ୍କା, ଚାରିଚକିଆ ଯାନ ପାଇଁ ୬୦ ଟଙ୍କା ଏବଂ ବସ୍ପାର୍କିଂ ବାବଦକୁ ଶହେ ଟଙ୍କା ପର୍ଯ୍ୟନ୍ତ ଆଦାୟ କରାଯାଉଛି। ହେଲେ ଗାଡି ରଖିବା ପାଇଁ କୌଣସି ବ୍ୟବସ୍ଥା କରାଯାଇ ନ ଥିବା ପର୍ଯ୍ୟଟକଙ୍କ ସମେତ ଗାଡ଼ି ମାଲିକମାନେ ଅଭିଯୋଗ କରିଛନ୍ତି। ଏ ନେଇ ମହିଳା ସ୍ବୟଂ ସହାୟକ ଗୋଷ୍ଠୀ ସଦସ୍ୟା ତଥା ପଞ୍ଚାୟତ ସ୍ତରୀୟ ମହିଳା ମହାସଂଘର ସମ୍ପାଦିକା ବିଷ୍ଣୁପ୍ରିୟା ମୁଠାମାଝି କହିଛନ୍ତି, ମୋଟ ୩୨ଟି ମହିଳା ସଂଘ ଏହି ପାର୍କିଂ ଫି’ ଆଦାୟ ଦାୟିତ୍ୱରେ ରହିଛନ୍ତି। ହେଲେ ବର୍ଷକୁ ଥରେ ପରିବର୍ତ୍ତନ କରାଯାଇ ମାତ୍ର ୯ଟି ଗ୍ରୁପରୁ ଜଣେ ଲେଖାଏ ୯ ଜଣ ଦୈନିକ ଏହି ଫି’ ଆଦାୟ ଦାୟିତ୍ୱରେ ରହି କାର୍ଯ୍ୟ କରୁଛନ୍ତି। ପାର୍କିଂ ଫି’ ଧାର୍ଯ୍ୟ କରିବାକୁ ମହିଳା ସଂଘ ପକ୍ଷରୁ ବାରମ୍ବାର ପ୍ରଶାସନକୁ ଅବଗତ କରାଯାଇଥିଲେ ମଧ୍ୟ କୌଣସି ପଦକ୍ଷେପ ନିଆଗଲାନି। ତେଣୁ ସରପଞ୍ଚ ସଙ୍ଗୀତା ମଲ୍ଲିକଙ୍କ ଅଧ୍ୟକ୍ଷତାରେ ବୈଠକ କରି ଦର ଧାର୍ଯ୍ୟ କରାଯାଇଛି। ପଞ୍ଚାୟତକୁ ମହିଳା ସଂଘ ବାର୍ଷିକ ୧୨ ହଜାର ଟଙ୍କା ପ୍ରଦାନ କରିବ ବୋଲି ନିଷ୍ପତ୍ତି ହୋଇଛି। ଅନ୍ୟପକ୍ଷରେ ମହିଳା ସଂଘ ପାର୍କିଂ ବାବଦକୁ ସଂଗ୍ରହ କରୁଥିବା ଅର୍ଥରୁ ପର୍ଯ୍ୟଟନକେନ୍ଦ୍ର ସଫେଇ ଓ ସେମାନଙ୍କ ପାରିଶ୍ରମିକ ବାବଦକୁ ଖର୍ଚ୍ଚ ହେଉଛି ବୋଲି ବିଷ୍ଣୁପ୍ରିୟା କହିଛନ୍ତି। ରବିବାର ଛୁଟି ଦିନ ଥିବାରୁ ୧୫ ହଜାରରୁ ଉର୍ଦ୍ଧ୍ୱ ଟଙ୍କା ଆଦାୟ ହୋଇଥିବା ମହିଳା ସଂଘ ପକ୍ଷରୁ କୁହାଯାଇଛି। ସୂଚନାଯୋଗ୍ୟ ଯେ ଦାରିଙ୍ଗବାଡ଼ି ର କେବଳ ନେଚର ପାର୍କ ଜଙ୍ଗଲ ଓ ପରିବେଶ ବିଭାଗ ହାତରେ ରହିଛି। ଅନ୍ୟ ସମସ୍ତ ପର୍ଯ୍ୟଟନ କେନ୍ଦ୍ର ପଞ୍ଚାୟତ ସମିତି ଅଧୀନରେ ଅଛି। ୨୦୧୫ ମସିହାରୁ ସମସ୍ତ ପର୍ଯ୍ୟଟନ କେନ୍ଦ୍ରର ବିକାଶ ପାଇଁ ଏକ ସାଞ୍ଜାସରୁ ଉନ୍ନୟନ ଟ୍ରଷ୍ଟ ଗଠନ କରାଯାଇଛି। ବାଲିଗୁଡ଼ା ଉପଜିଲାପାଳ ଏହାର ଅଧ୍ୟକ୍ଷ ଏବଂ ସମ୍ପାଦକ ସ୍ଥାନୀୟ ବିଡିଓ ରହିଛନ୍ତି। ତହସିଲଦାରଙ୍କ ସମେତ ଆଇଆଇସି, ବ୍ଲକ ଅଧ୍ୟକ୍ଷ, ସ୍ଥାନୀୟ ସରପଞ୍ଚ, ବଣିକ ସଂଘ, ଖବରଦାତା ସଂଘ ସାଂସ୍କୃତିକ ବିଭାଗ, ସ୍ବେଚ୍ଛାସେବୀ ଅନୁଷ୍ଠାନ ସଦସ୍ୟ ହୋଇଛନ୍ତି। ହେଲେ କେଉଁ ପରିସ୍ଥିତିରେ ସାଞ୍ଜାସରୁ ଟ୍ରଷ୍ଟ ବଦଳରେ ପଞ୍ଚାୟତ କିମ୍ବା ବିନା ଅନୁମତିରେ ସ୍ବୟଂ ସହାୟକ ଗୋଷ୍ଠୀ ଏଭଳି ପାର୍କିଂ ଅର୍ଥ ସଂଗ୍ରହ କରୁଛନ୍ତି ତାହା ପ୍ରଶ୍ନବାଚୀ ହୋଇଛି। ଏ ନେଇ ସାଞ୍ଜାସରୁ ଟ୍ରଷ୍ଟର ନୋଡାଲ ଅଫିସର ତଥା ବ୍ଲକ ମଙ୍ଗଳ ସଂପ୍ରସାରଣ ଅଧିକାରୀ ବୁରୁ ମାଝି ପଡ୍ରା ସମସ୍ୟା ରହିଥିବା ଶୁଣି ସେ ତଦନ୍ତ କରି ବିଡିଓଙ୍କୁ ରିପୋର୍ଟ ଦେଇଥିବା କହିଛନ୍ତି। ଶୀଘ୍ର ସମସ୍ୟାର ସମାଧାନ କରାଯିବ ବୋଲି ସେ କହିଛନ୍ତି।
