ଉନ୍ନାଓ ୧୬-୫ (ଓଡ଼ିଆ ପୁଅ) ୟୁପିର ଅରାୟାରେ ଘଟିଥିବା ଭୟଙ୍କର ସଡ଼କ ଦୁର୍ଘଟଣାରେ ଆଜି ୨୪ ଜଣ ପ୍ରବାସୀ ଶ୍ରମିକଙ୍କର ମୃତ୍ୟୁ ହୋଇଛି। ଏହା ପରେ ମଧ୍ୟପ୍ରଦେଶରେ ମଧ୍ୟ ଘରକୁ ଫେରୁଥିବା କିଛିପ୍ରବାସୀ ଶ୍ରମିକଙ୍କ ମଧ୍ୟରୁ ୫ ଜଣଙ୍କର ଟ୍ରକ ଓଲଟି ପଡ଼ିବାରୁ ମୃତ୍ୟୁ ଘଟିଛି। କିନ୍ତୁ ଏହାପରେ ଆଜି ଆଗ୍ରା-ଲକ୍ଷ୍ନୌ ଏକ୍ସପ୍ରେସୱେରେ ଏକ ଅଟୋ ଏବଂ ହାଇସ୍ପିଡ୍ ଲୋଡର୍ ଧକ୍କା ହେବା ଫଳରେ ଏକ ଦମ୍ପତିଙ୍କ ମୃତ୍ୟୁ ଘଟିଛି। ଏହି ପ୍ରବାସୀ ଦମ୍ପତି ନିଜ ୫ ବର୍ଷର ସନ୍ତାନଙ୍କ ସହ ନିଜ ଅଟୋରେ ବିହାର ଯାଉଥିଲେ। କିନ୍ତୁ ଅଟୋରେ ପେଟ୍ରୋଲ ଭରିବାକୁ ଯିବା ସମୟରେ ପଛପଟୁ ଏକ ଲୋଡର ପ୍ରବଳ ବେଗରେ ଧକ୍କା ଦେଇଥିଲା। ଘଟଣାସ୍ଥଳରେ ହିଁ ଦମ୍ପତ୍ତିଙ୍କର ମୃତ୍ୟୁ ହୋଇଛି। ସୂଚନାଯୋଗ୍ୟଯେ, ଏହି ପରିବାର ଏକ ଅଟୋ ଚଳାଇ ହରିୟାଣାରେ ନିଜର ପରିବାର ଭରଣ ପୋଷଣ କରୁଥିଲା କିନ୍ତୁ ଲକଡାଉନ କାରଣରୁ ଅଟୋ ଚାଲିପାରୁନଥିଲା। ତେଣୁ ସେମାନେ ବିହାର ନିଜଘରକୁ ଯିବାପାଇଁ ସ୍ଥିର କଲେ। କିନ୍ତୁ କିଏ ଜାଣିଥିଲାଯେ, ପେଟ ପୋଷିବାକୁ ବିହାରରୁ ଆସିଥିଲେ କିନ୍ତୁ ଶବ ହୋଇ ଫେରିବେ। ତେବେ ତାଙ୍କର ୫ ବର୍ଷର ସନ୍ତାନ ଏବେ ବଞ୍ଚିଯାଇଛି। ଦୁର୍ଘଟଣା ପରେ ପୋଲିସ ମୃତଦେହକୁ ପୋଷ୍ଟମର୍ଟମ ପାଇଁ ପଠାଇଛି।
ଏହି ଘଟଣା ଆଗ୍ରା-ଲକ୍ଷ୍ନୌ ଏକ୍ସପ୍ରେସୱେରେ ବଙ୍ଗରମାଉ ଥାନା ଅଞ୍ଚଳରେ ଘଟିଛି। ଏହି ଦୁର୍ଘଟଣାରେ ପ୍ରାଣ ହରାଇଥିବା ୩୫ ବର୍ଷୀୟ ଅଶୋକ ଚୌଧୁରୀ ଏବଂ ତାଙ୍କ ପତ୍ନୀ ଛୋଟି (୩୦ ବର୍ଷ) ବିହାରର ଦାରବଙ୍ଗାସ୍ଥିତ ବାହେରା ବାସିନ୍ଦା ଥିଲେ। ସେ ହରିୟାଣାର ଝଜରର ସୁଭାଷ ନଗରରେ ରହୁଥିଲେ। ଅଶୋକ ଚୌଧୁରୀ ତାଙ୍କ ପରିବାର ସହିତ ଝଜରରେ ଏକ ଅଟୋ ଚଳାଇ ରହୁଥିଲେ। ଲକଡାଉନ କାରଣରୁ ଗତ କିଛି ଦିନ ହେବ କାମ ବନ୍ଦ ହୋଇଯାଇଥିଲା ତେଣୁ ସେ ତାଙ୍କ ପରିବାର ସହିତ ଦରଭଙ୍ଗା ଯାଉଥିଲେ।
ଆଗ୍ରା-ଲକ୍ଷ୍ନୌ ଏକ୍ସପ୍ରେସୱେରେ ଏହି ଯନ୍ତ୍ରଣାଦାୟକ ଦୁର୍ଘଟଣାରେ ସ୍ଥାନୀୟ ଲୋକ କହିଛନ୍ତି ଯେ ଏହି ଧକ୍କା ଏତେ ଶକ୍ତିଶାଳୀ ଥିଲା ଯେ ଅଟୋ ପାର୍ଟସ୍ ବିସ୍ଫୋରଣ ହୋଇଥିଲା। ହାଇ ସ୍ପିଡ୍ ପିକଅପ୍ ଲୋଡର୍ ସହିତ ଧକ୍କା ହେତୁ ଅଟୋ ରାସ୍ତାରେ ଟାଣି ହୋଇଗଲା। ଥାନା ମୁଖ୍ୟ ଶ୍ୟାମ କୁମାର ପାଲ ତୁରନ୍ତ ଏକ୍ସପ୍ରେସୱେରେ ଦୁର୍ଘଟଣାର ସୂଚନା ପାଇ ଘଟଣାସ୍ଥଳରେ ପହଞ୍ଚି ଉଭୟ ମୃତଦେହକୁ ନେଇ ପୋଷ୍ଟମର୍ଟମ ପାଇଁ ଜିଲ୍ଲା ଡାକ୍ତରଖାନାକୁ ପଠାଇଥିଲେ। ପୋଲିସ କହିଛି ଯେ ଦମ୍ପତିଙ୍କ ସମ୍ପର୍କୀୟଙ୍କୁ ଫୋନ୍ ଯୋଗେ ସୂଚନା ଦିଆଯାଇଛି।
