ଭଦ୍ରକ, ୩୦ା୧୨ (ଓଡ଼ିଆ ପୁଅ / ସ୍ନିଗ୍ଧା ରାୟ) – ତାଏକ୍ୱୋଣ୍ଡୋ ଆସୋସିଏସନ୍ ଅଫ୍ ଓଡିଶା’ (ତାଓ) ଆନୁକୂଲ୍ୟରେ ଚରମ୍ପା ସ୍ଥିତ ମହାରାଜା ଅଗ୍ରସେନ ଭବନରେ ଆୟୋଜିତ ୨୧ତମ ଓଡିଶା ରାଜ୍ୟ ତାଏକ୍ୱୋଣ୍ଡୋ ଚମ୍ପିୟନସିପ୍ ରବିବାର ରାତିରେ ଉଦଯାପିତ ହୋଇଛି। ପୂର୍ବ ବର୍ଷ ଭଳି ଏବର୍ଷ ମଧ୍ୟ ତାଏକ୍ୱୋଣ୍ଡୋ ଆସୋସିଏସନ୍ ଅଫ୍ ଭଦ୍ରକ ସର୍ବାଧିକ ୨୦ଟି ସ୍ୱର୍ଣ୍ଣ ପଦକ ହେତୁ ଚମ୍ପିୟନସିପ୍ ମର୍ଯ୍ୟାଦା ହାସଲ କରିଛି। ୧୪ଟି ସ୍ୱର୍ଣ୍ଣ, ୧୨ଟି ରୌପ୍ୟ ଓ ୧୪ଟି ବ୍ରୋଞ୍ଜ ବିଜେତା ଢେଙ୍କାନାଳ ତାଏକ୍ୱୋଣ୍ଡୋ ଆସୋସିଏସନ୍ ପ୍ରଥମ ରନର୍ସ-ଅପ୍ ଆସନ ଅଧିକାର କରିଥିବା ବେଳେ ୧୪ ସ୍ୱର୍ଣ୍ଣ, ୧୨ ରଜତ ଓ ୬ଟି ବ୍ରୋଞ୍ଜ ପଦକ ଜିଣି ବାଲେଶ୍ୱର ଆସୋସିଏସନ୍ ଅଫ୍ ତାଏକ୍ୱୋଣ୍ଡୋ ଦ୍ୱିତୀୟ ରନର୍ସ-ଅପ୍ ମାନ୍ୟତା ପାଇଛି। ଶୃଙ୍ଖଳିତ ଦଳ ଭାବେ ତାଏକ୍ୱୋଣ୍ଡୋ ଆସୋସିଏସନ୍ ଅଫ୍ ଭୁବନେଶ୍ୱର, ଖୋର୍ଦ୍ଧା ଓ ତାଏକ୍ୱୋଣ୍ଡୋ ଆସୋସିଏସନ୍ ଅଫ୍ କଟକ ପ୍ରଶଂସିତ ହୋଇଛନ୍ତି। ଉଦଯାପନ ଉତ୍ସବରେ ଅଧ୍ୟକ୍ଷତା କରିଥିଲେ ‘ତାଓ’ କାର୍ଯ୍ୟକାରୀ ସଭାପତି ଆଇନଜୀବୀ ବିଜୟ କୁମାର ଜେନା। ଅତିଥି ରୂପେ ଭଦ୍ରକର ପୂର୍ବତନ ବିଧାୟକ ନରେନ ପଲାଇ, ଭଦ୍ରକ ସ୍ୱୟଂଶାସିତ ମହାବିଦ୍ୟାଳୟର ଅଧ୍ୟକ୍ଷ ଡ. ଦୁର୍ଗା ଶଙ୍କର ଦାସ, ଆଇ.ଏମ୍.ଏସ୍. ଓ ସମ୍ ହସପିଟାଲ୍ ଗେଷ୍ଟ୍ରୋ-ଲିଭର୍ ବିଭାଗର ଆସୋସିଏଟ୍ ପ୍ରଫେସର୍ ଡାଃ ଅନୁରାଗ ଜେନା, ଲାୟନ୍ସ୍ କ୍ଲବ୍ ର ଚେୟାରମ୍ୟାନ୍ ଅଶୋକ ମହାନ୍ତି ତଥା ହେପ୍ପୀ ହୋମ୍ ସ୍କୁଲ୍ ର ନିର୍ଦ୍ଦେଶିକା ପ୍ରଜ୍ଞା ପାରମିତା ପଲାଇ ଯୋଗ ଦେଇଥିଲେ। ବିବରଣୀ ପ୍ରଦାନ କରିଥିଲେ ସାଧାରଣ ସଂପାଦକ ରବିନାରାୟଣ ପାଣିଗ୍ରାହୀ ଏବଂ ଧନ୍ୟବାଦ ଅର୍ପଣ କରିଥିଲେ ଉପସଭାପତି ରମେଶ ଚନ୍ଦ୍ର ପ୍ରଧାନ। ଭଦ୍ରକର ବହୁ ମାନ୍ୟଗଣ୍ୟ ବ୍ୟକ୍ତି ଯଥା ସ୍ୱତନ୍ତ୍ର ପିପି ଆଇନଜୀବୀ ପବନ କୁମାର ଶର୍ମା, ବିଶିଷ୍ଟ ବ୍ୟବସାୟୀ ଗୌରାଙ୍ଗ ଚରଣ ସାମଲ, ଇଂ ଉତ୍ପଳକାନ୍ତି ଦାସ, ଇଂ ଅନୁପମ ଜେନା, ବିଦ୍ୟାର୍ଥୀ ଇଂଟରନ୍ୟାସନାଲ୍ ସ୍କୁଲର ଅଧ୍ୟକ୍ଷ ସୁନୀଲ କୁମାର ପାଢ଼ୀ, କନକ ଟିଭି ର ଜିଲ୍ଲା ପ୍ରତିନିଧି ଶଶୀଭୂଷଣ ସ୍ୱାମୀ, ମହାରାଜା ଅଗ୍ରସେନ ଟ୍ରଷ୍ଟ୍ ର ସମ୍ପାଦକ ରାଜକୁମାର ଖେରିଆ, ବରିଷ୍ଠ ସଦସ୍ୟ ମଦନ ଲାଲ୍ ଅଗ୍ରୱାଲ୍ ଓ ସଜ୍ଜନ ଅଗ୍ରୱାଲ୍ ପ୍ରମୁଖ ଏହି ଉତ୍ସବରେ ନିମନ୍ତ୍ରିତ ଅତିଥି ରୂପେ ଯୋଗ ଦେଇଥିଲେ। ଏହି ଦ୍ୱିଦିବସୀୟ ପ୍ରତିଯୋଗିତାର ପରିଚାଳନା ଦାୟିତ୍ୱ ସୁଚାରୁ ରୂପେ ସମ୍ପାଦନ କରିଥିଲେ କର୍ଣ୍ଣାଟକ ତାଏକ୍ୱୋଣ୍ଡୋ ଆସୋସିଏସନ୍ ର ସଭାପତି ଏମ୍ ସୁନ୍ଦରମ୍ ଆୟା,ର୍ ବରିଷ୍ଠ ପ୍ରଶିକ୍ଷକ ଅଶୋକ କୁମାର ସାହୁ, ସାମାଜିକ କର୍ମୀ ବିଦ୍ୟାଧର ବାରିକ, ଭୂପେନ୍ଦ୍ର କୁମାର ବେହେରା, ୟୁନାଇଟେଡ୍ କ୍ଲବ୍ ସଂପାଦକ ବିଶାଲ୍ ଗୋପାଲ୍ ଲଖାନୀ, ସବୁଜ କ୍ଲବ୍ ସଂପାଦକ ଅଜୟ କୁମାର ଧଳ, ଯୁଗ୍ମ ସଂପାଦକ ଅଧ୍ୟାପକ ଯୋଗେଶ୍ୱର ମହନ୍ତ, କୋଷାଧ୍ୟକ୍ଷା ସଂଘମିତ୍ରା ନନ୍ଦିନୀ ଦାସ, ଢେଙ୍କାନାଳ ତାଏକ୍ୱୋଣ୍ଡୋ ଆସୋସିଏସନ୍ ସମ୍ପାଦକ ସୁଧାକର ଜେନା, ତାଏକ୍ୱୋଣ୍ଡୋ ଆସୋସିଏସନ୍ ଅଫ୍ ଭଦ୍ରକ ର ସମ୍ପାଦକ ଧନେଶ୍ୱର ଜେନା, ଯୋଗଗୁରୁ ସୁରେଶ ନାୟକ। ଏଠାରେ ଉଲ୍ଲେଖଯୋଗ୍ୟ ଯେ ଶନିବାର ଦିନ ଅନୁଷ୍ଠିତ ଅପରାହ୍ନ ଅଧିବେଶନରେ ଭଦ୍ରକର ଜିଲ୍ଲାପାଳ ଦିଲିପ ରାଉତରାୟ, ଭାରତୀୟ ତାଏକ୍ୱୋଣ୍ଡୋର ଜନକ ଡାଃ ଜିମ୍ମୀ ଜାଗତିଆନି ଓ ଜାତୀୟ ଅପରାଧ ତଦନ୍ତ ବ୍ୟୁରୋ ଓଡିଶା ଶାଖାର ନିର୍ଦ୍ଦେଶକ ସୁଦାମ ଚରଣ ଦାସ ଅତିଥି ରୂପେ ଯୋଗ ଦେଇଥିଲେ। ଏହି ସମୟରେ ଦିବଂଗତ ପ୍ରଧାନମନ୍ତ୍ରୀ ମନମୋହନ ସିଂହ ଙ୍କ ଆତ୍ମାର ସତ୍ ଗତି ନିମନ୍ତେ ୨ ମିନିଟ୍ ପାଇଁ ସାମୁହିକ ନୀରବ ପ୍ରାର୍ଥନା କରାଯାଇଥିଲା।
