ଭଦ୍ରକ, ୨ା୪ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଭଦ୍ରକ ଟାଉନ ଥାନା ପୁଲିସ ମୋଟେଲ ଛକ ଠାରୁ ଜଣେ ଯୁବକ ନିକଟରୁ ୧୪ ଗ୍ରାମର ବ୍ରାଉନ ସୁଗାର ଜବତ କରିଛି । ଯୁବକଙ୍କୁ ଗିରଫ କରିବା ସହିତ ତାଙ୍କ ନିକଟରୁ ୨ଟି ମୋବାଇଲ, ଗୋଟିଏ ବାଇକ ଜବତ କରିଛି । ଗିରଫ ହୋଇଥିବା ଯୁବକ ଧୁଷୁରୀ ଥାନା ବାଲିପାଟଣା ଗ୍ରାମର ପ୍ରଦିପ କୁମାର ମହାନ୍ତି । ପ୍ରଦିପ ଭଦ୍ରକର ଚରମ୍ପା ଅଞ୍ଚଳର ଜନୈକ ବ୍ୟବସାୟୀଙ୍କଠାରୁ ନିୟମିତ ବ୍ରାଉନ ସୁଗାର ନେଇ ଧୁଷୁରୀ ଅଞ୍ଚଳରେ ବିକ୍ରି କରିଥାନ୍ତି । କୌଣସି ସୂତ୍ରରୁ ଖବର ପାଇ ଭଦ୍ରକ ଟାଉନ ପୁଲିସ ୧୬ ନମ୍ବର ଜାତୀୟ ରାଜପଥର ମୋଟେଲ ଛକଠାରେ ପ୍ରଦିପ ବାଇକରେ ଯାଉଥିବା ବେଳେ ତାଙ୍କୁ ଅଟକାଇ ତଲାସି ନେବାରୁ ତାଙ୍କଠାରୁ ବ୍ରାଉନ ସୁଗାର ମିଳିଥିଲା । ଜବତ ବ୍ରାଉନ ସୁଗାରର ମୂଲ୍ୟ ୧ଲକ୍ଷ ୪୦ ହଜାର ଟଙ୍କା ହେବ ବୋଲି ପୁଲିସ କହିଛି । ଏହି ଘଟଣାରେ ପ୍ରଦିପଙ୍କୁ କୋର୍ଟ ଚାଲାଣ କରାଯାଇଛି ।
