ଭଦ୍ରକ, ୨୯ା୩ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଏହି ଜିଲ୍ଲାର ଧାମନଗର ତହସିଲ ଅଧିନସ୍ତ ଗୋବିନ୍ଦପୁର ଗ୍ରାମଟିର ୩ଗୋଟି ୱାର୍ଡ ରେ ପ୍ରାୟ ୨ହଜାର ଭଳି ଗ୍ରାମବାସୀ ବସବାସ କରୁଛନ୍ତି। ଶସ୍ୟ ଶ୍ୟାମଳା ରେ ଭରପୁର ଏହି ଗ୍ରାମରେ ଏବେ ଗୋଚାରଣ ପାଇଁ ଗୋଚର ଜମିର ଅଭାବ ଦେଖାଦେଇଛି।ସୂଚନା ଯୋଗ୍ୟ ଏହି ଗ୍ରାମରେ ୧୪ଏକର ଗ୍ରାମ୍ୟ ଜଙ୍ଗଲ ଥିଲେ ମଧ୍ୟ ଏବେ ମାତ୍ର ୨ ଏକର ରହିଛି। ଏହି ଗ୍ରାମରେ ଶ୍ମଶାନ ଓ ଖେଳପଡିଆ ପାଇଁ ସ୍ଥାନର ଅଭାବ ପରିଲକ୍ଷିତ ହୋଇଛି।ଯାହା ବି ଅଛି ତାହା କ୍ରମଶଃ କିଛି ଅସାଧୁ ମୁଷ୍ଟିମେୟ ଲୋକଙ୍କ ଜବର ଦଖଲକୁ ଚାଲିଯାଇଛି। ଏହା କ୍ରମାଗତ ଭାବେ ଦିନକୁଦିନ ହ୍ରାସ ପାଇବାରେ ଲାଗିଛି। ନିଜ ମନ ମୁତାବକ କିଏ କୃତ୍ରିମ ପୋଖରୀ ଖୋଳିଛି ତ ଆଉ କିଏ ଜବର ଦଖଲ କରି ବାଡ଼ ଘେରାଉ କରି ନିଜ ଜମିର ବିସ୍ତାର କରିବାରେ ଲାଗିଛି। ଏହି କାରଣରୁ ବିଶେଷ କରି ଗୋରୁ ଗାଈମାନଙ୍କୁ ବହୁ ଅସୁବିଧାର ସମ୍ମୁଖୀନ ହେବାକୁ ପଡୁଛି। ଗୋଚାରଣ ଭୂମି ର ଅଭାବ ଯୋଗୁଁ ଗୋ ସମ୍ପଦ ଏଥିପାଇଁ କ୍ଷତି ସହୁଛି। ଦିନକୁ ଦିନ ଗୋରୁଗାଈଙ୍କ ସଂଖ୍ୟା କମିବାରେ ଲାଗିଲାଣି । ଗୋଚାରଣ ଭୂମି ନ ଥିବାରୁ କେହି ଗୋରୁ ଗାଈମାନଙ୍କୁ ରଖିବାକୁ ପସନ୍ଦ କରୁ ନାହାନ୍ତି। ପୁଣି ଜବରଦଖଲକାରୀଙ୍କ ପ୍ରଭାବ ଯୋଗୁ କେବଳ ଗୋ ଚାରଣ ଭୂମି ନୁହଁ,ଗାଁ ଖେଳ ପଡିଆ ବି ବଳି ପଡ଼ିଛି । ଖେଳ ପଡିଆ ଚାରି ପଟେ ଲୋକ ମାନେ ଜାଗା ମାଡ଼ି ବସି ଥିବାରୁ ଖେଳିବାରେ ପିଲା ମାନଙ୍କୁ ଅସୁବିଧା ହେଉଛି ।ପୁଣି ଗାଁ ରେ ଶ୍ମଶାନ ପାଇଁ ମଧ୍ୟ ଜାଗା ନାହିଁ । ମାତ୍ର ଏହା ଏତେ ମାତ୍ରା ରେ ବଢ଼ି ଚାଲିଛି ଯେ ଗ୍ରାମ୍ୟ ଜଙ୍ଗଲ ଓ ଚାରଣ ଭୂମି ୧୪ଏକର ଯାହା ପ୍ଲଟ ନମ୍ବର ୫୪୧, ଖାତା ନମ୍ବର ୪୩୮ ରୁ ଆସି ୨ ଏକର ରେ ପହଞ୍ଚିଛି। ଏହା ନିହାତି ଏବେ ଚିନ୍ତାର ବିଷୟ ହୋଇଥିବାବେଳେ ପ୍ରଶାସନ ସାଜିଛି ନିରବ ଦ୍ରଷ୍ଟା। ଆଗାମୀ ଦିନରେ ପ୍ରଶାସନ ଏହି ଜବର ଦଖଲକାରୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ ନ କଲେ ଗ୍ରାମ ବାସୀ ରାଜରାସ୍ତାକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି।
