ହାଟଡିହି ୨୭ । ୭ : (ଓଡିଆପୁଅ / ବିକାଶ ବିଶ୍ୱାଳ) କେନ୍ଦୁଝର ଜିଲ୍ଲା ହାଟଡିହି ବ୍ଲକରେ ଆଜି ପୁଣି ୪ଜଣ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ଏମାନେ ଶାଳଣିଆଁ ପଞ୍ଚାୟତର ସୋଲପଟା ଗ୍ରାମର ବୋଲି ଜଣାପଡିଛି ।ଗତ କିଛିଦିନ ଧରି ସୋଲପଟା ଗ୍ରାମରେ କରୋନା ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି । ଏମାନେ ସମସ୍ତେ ଡଅଁର ଗ୍ରାମର ଜଣେ କରୋନା ଆକ୍ରାନ୍ତ ଯୁବତୀଙ୍କ ସଂଷ୍ପର୍ଶରେ ଆସିଥିଲେ । ଆଜି ଆକ୍ରାନ୍ତ ମାନଙ୍କ ମଧ୍ୟରେ ଜଣେ ଯୁବତୀ ଥିବାବେଳେ ଅନ୍ୟ ତିନିଜଣ ପୁରୁଷ ବୋଲି ଜଣାଯାଇଛି । ଏମାନଙ୍କ ବୟସ ୩୮ରୁ ୫୮ମଧ୍ୟରେ । ଆଜି ଏହି ୪ଜଣ ପଜେଟିଭି ଚିହ୍ନଟ ହେବାପରେ ସେମାନଙ୍କୁ କୋଭିଡ-୧୯ ହସପିଟାଲକୁ ପଠାଇ ଦିଆଯାଇଛି । ଅନ୍ୟପକ୍ଷରେ ସୋଲପଟାରେ ସଂକ୍ରମଣଙ୍କ ସଂଖ୍ୟା ବୃଦ୍ଧି ପାଉଥିବା ଦେଖି ପ୍ରଶାସନ ପକ୍ଷରୁ ଏଠାରେ ସର୍ଟଡାଉନ ଘୋଷଣା କରାଯାଇଥିଲେ ମଧ୍ୟ ଲୋକମାନେ ଏହାକୁ ଠିକ ଭାବେ ମାନୁ ନଥିବା ଦେଖିବାକୁ ମିଳିଛି । ସେହିପରି ଗତକାଲି ଶାଳଣିଆଁ ବଜାରରେ ଔଷଧ ବ୍ୟବସାୟ କରୁଥିବା ଜଣେ ବ୍ୟକ୍ତି ଓ ତାଙ୍କ ପତ୍ନୀ କରୋନା ସଂକ୍ରମିତ ଜଣାପଡିବାପରେ ସମଗ୍ର ଅଞ୍ଚଳରେ କୋକୁଆଭୟ ଖେଳିଯାଇଛି । ଅନେକ ବ୍ୟକ୍ତି ତାଙ୍କ ଦୋକାନରୁ ଔଷଧପତ୍ର କିଣାକିଣି କରିଥିବାରୁ ଲୋକମାନେ ଭୟଭିତ ହୋଇପଡିଛନ୍ତି ।
