ଭଦ୍ରକ, ୨ା୧୦ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଆଜି ହରିପୁର ପଞ୍ଚାୟତର ଏକ ପୋଲ ନିକଟ ସାଳନ୍ଦୀ ନଦୀରେ ଏକ ଅଚିହ୍ନା ଯୁବକର ଶବ ଭାସୁଥିବାର ଦେଖି ସ୍ଥାନୀୟ ଲୋକେ ଗ୍ରାମାଞ୍ଚଳ ଥାନାକୁ ଖବର ଦେଇଥିଲେ । ପରବର୍ତ୍ତୀ ସମୟରେ ସଂପୃକ୍ତ ଯୁବକ ଜଣକ ପୁରୁଣାବଜାର ଥାନା ଅଧୀନସ୍ଥ ଅଲାଲପୁର ନିବାସୀ ନିୟାଜ ମହମ୍ମଦ (୨୦) ବୋଲି ଜଣାପଡିଛି । ତେବେ ପ୍ରାପ୍ତ ଖବରରୁ ଯାହା ଜଣାଯାଏ ନିୟାଜର ପିତା ଦରିଦ୍ର ଶ୍ରେଣୀର ଥାଇ ଏକ ମୋବାଇଲ୍ ଦୋକାନରେ କାମ କରି ପରିବାର ପ୍ରତିପୋଷଣ କରନ୍ତି । ସେ ବହୁକଷ୍ଟରେ ନିୟାଜକୁ ଗ୍ରାଜୁଏସନ ପର୍ଯ୍ୟନ୍ତ ପଢାଇଥିଲେ । ମାତ୍ର ନିୟାଜ ପିଜି କରିବ ବୋଲି ଘରେ ଜିଦ୍ କରିଥିଲା । ଗରିବ ପିତା-ମାତା ଏଥିରେ ରାଜି ନହେବାରୁ ସେ ଗତକାଲି ସନ୍ଧ୍ୟା ୭ଟାରେ ଘରୁ ନିଖୋଜ ଥିଲା । ଏ ସଂପର୍କରେ ପରିବାର ଲୋକେ ସ୍ଥାନୀୟ ଥାନାରେ ଖବର ଦେଇଥିଲେ । ତେବେ ଆଜି ହରିପୁର ପୋଲ ନିକଟ ସାଳନ୍ଦୀ ନଦୀରେ ଭାସୁଥିବା ନିୟାଜର ମୃତଦେହ ଉଦ୍ଧାର ପରେ ଗ୍ରାମାଞ୍ଚଳ ଥାନାରେ ଏକ ଅପମୃତ୍ୟୁ ମାମଲା ରୁଜୁ ହୋଇ ତଦନ୍ତ ଚାଲୁରହିଛି । ପ୍ରାଥମିକ ତଦନ୍ତରୁ ନିୟାଜ ଘରଲୋକେ ତାର ଅଧିକ ପଢା ପାଇଁ ରାଜି ନହେବାରୁ ସେ ସମ୍ଭବତଃ ସାଳନ୍ଦୀ ନଦୀରେ ଡେଇଁ ଆତ୍ମହତ୍ୟା କରିଥାଇପାରେ ବୋଲି ଅନୁମାନ କରାଯାଉଛି ।
