ହାଟଡିହି-୨୫ /୧୨ (ଓଡିଆପୁଅ / ବିକାଶ ବିଶ୍ୱାଳ) ହାଟଡିହି ବ୍ଲକ ସଢ଼ା ସମବାୟ ସମିତିରେ ଧାନମଣ୍ଡି ଉଦଘାଟିତ ହୋଇଯାଇଛି । ଆନନ୍ଦପୁର ବିଧାୟକ ଭାଗିରଥି ସେଠୀ ମୁଖ୍ୟ ଅତିଥି ଭାବେ ଯୋଗଦେଇ ଏହାକୁ ଆନୁଷ୍ଠାନିକ ଭାବେ ଉଦଘାଟନ କରିବା ସହିତ ମଣ୍ଡି କର୍ତ୍ତୁପକ୍ଷ ଚାଷୀ ମାନଙ୍କୁ ଯେପରି ହଇରାଣ ନକରନ୍ତି ସେଥିପ୍ରତି ଚେତାଇ ଦେଇଛନ୍ତି । ଚାଷୀମାନେ ମଣ୍ଡିକୁ ଧାନ ଆଣି ୧୦/୧୫ଦିନ ପର୍ୟ୍ୟନ୍ତ ପକାଇ ରଖିବା, ଧାନରୁ ୧୦/୧୨ପରସେଣ୍ଟ କାଟିବା, ଚାଷୀମାନଙ୍କ ପାଖରୁ ଅନଲୋଡିଂ ଓ ବସ୍ତା ପଇସା ଆଦି ନକାଟିବା ପାଇଁ ସେ ସମିତିର ସମ୍ପାଦକଙ୍କୁ ଚେତାବନୀ ଦେଇଥିଲେ । ଚାଷୀମାନେ ଯେପରି ସହଜରେ ଓ ଉଚିତ ମୁଲ୍ୟରେ ଧାନ ବିକ୍ରୀକରିପାରିବେ ସେନେଇ ଆବଶ୍ୟକ ପଦକ୍ଷେପ ନେବାକୁ ସେ ପରାମର୍ଶ ଦେଇଥିଲେ । ସମିତିର ସମ୍ପାଦକ ଦୀନବନ୍ଧୁ ଜେନାଙ୍କ ସଂଯୋଜନାରେ ଅନୁଷ୍ଠିତ ଏହି କାର୍ୟ୍ୟକ୍ରମରେ ସହକାରୀ ଉପନିବନ୍ଧକ କୈଳାଶ ଚନ୍ଦ୍ର ନାୟକ, ସହ ସମ୍ପାଦକ ଶୁକଦେବ ରାଉତ, ଡିଇଓ ମନୋଜ ନାୟକ, ଅବିନାଶ ମଣ୍ଡଳ, ଆର.ଏମ.ସି କର୍ମଚାରୀ ବସନ୍ତ କୁମାର ମଲ୍ଲିକ, ଚାଷୀ କମିଟି ସଦସ୍ୟ ଶଙ୍କର୍ଷଣ ମଲ୍ଲିକ, ଗୌତ୍ତମ ବଳ, ଶ୍ରୀଧର ଜେନା, ଖଗେଶ୍ୱର ବେହେରା, ଚାଷୀ ରବିନ୍ଦ୍ର ସାହୁ, ବିକ୍ରମ କେଶରୀ ବିଶ୍ୱାଳ ପ୍ରମୁଖ ଉପସ୍ଥିତ ରହି ଏହାର ଶୁଭାରମ୍ଭ କରିଥିଲେ । ପୁର୍ବତନ ସରପଞ୍ଚ ବୈଦ୍ୟନାଥ ସାମଲ, ବିଜୟ କୁମାର ରାଉତ, ଅଲେଖ ଚନ୍ଦ୍ର ମଲ୍ଲିକ, ସୁରେନ୍ଦ୍ର କୁମାର ଜେନା, ଜମ୍ଭୀରା ପଞ୍ଚାୟତର ସମିତିସଭ୍ୟ ପ୍ରଭାତ ରାଉତଙ୍କ ସମେତ ବହୁ ମାନ୍ୟଗଣ୍ୟ ବ୍ୟକ୍ତି ଯୋଗଦେଇ ଚାଷୀଙ୍କ ବିଭିନ୍ନ ସମସ୍ୟା ଉପରେ ଆଲୋକପାତ କରିବାସହ ତାହାର ସମାଧାନ ଉପରେ ଆଲୋଚନା କରିଥିଲେ । ଏହି ମଣ୍ଡିରେ ୧୩୦୫ଜଣ ଚାଷୀ ନାମ ପଞ୍ଜିକୃତ କରିଥିବା ବେଳେ ୧୦୩୦ଜଣଙ୍କ ନାମ ଯାଞ୍ଚ ହୋଇଛି । ୧୦୩୦ଜଣ ଚାଷୀଙ୍କ ଠାରୁ ୪୧ହଜାର ୫୭କୁିଣ୍ଟାଲ ଧାନ କ୍ରୟ କରାଯିବାର ଲକ୍ଷ ଧାର୍ୟ୍ୟ ହୋଇଥିବାବେଳେ ୩୦୫ଜଣଙ୍କୁ ଟୋକନ ଇସୁ କରାଯାଇଥିବା ସମ୍ପାଦକ ସୁଚନା ଦେଇଥିଲେ । ସୁଧାକର ଜେନା କାର୍ୟ୍ୟକ୍ରମ ପରିଚାଳନା କରିଥିଲେ ।
