ଭଦ୍ରକ, ୩୧ା୩ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଓଡ଼ିଶା ସରକାରଙ୍କ ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତିକରଣ ବିଭାଗ ଆନୁକୂଲ୍ୟରେ ଭଦ୍ରକ ଜିଲ୍ଲାସ୍ତରୀୟ ଆନ୍ତର୍ଜାତିକ ଟ୍ରାନ୍ସଜେଣ୍ଡର ଦିବସ ପାଳିତ ହୋଇଯାଇଛି । ଜିଲ୍ଲାପାଳ ଦିଲୀପ ରାଉତରାଏ ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗ ଦେଇ ଟ୍ରାନ୍ସଜେଣ୍ଡରଙ୍କ ନିମନ୍ତେ ଅଭିନବ ଯୋଜନା ସ୍ୱିକୃତି ପରିକଳ୍ପନା ସମ୍ବନ୍ଧରେ ଆଲୋକପାତ କରିବା ସହିତ ଟ୍ରାନସ୍ଜେଣ୍ଡର ମାନଙ୍କୁ ସ୍ୱାବଲମ୍ବୀ କରି ସାମାଜିକ ମୁଖ୍ୟ ସ୍ରୋତରେ ସାମିଲ କରିବା ଦିଗରେ ଏସବୁ କେତେ ଉପଯୋଗୀ ଦର୍ଶାଇଥିଲେ । ଆଗଭଳି ସେମାନଙ୍କ ପ୍ରତି ଅବିଚାର, ଅବହେଳା ମନୋଭାବର ସାମାଜିକ ଚିତ୍ର ବଦଳି ଯାଇଛି । ଆଗକୁ ଏହି ପରିବର୍ତନ ପାଇଁ ସାମଗ୍ରୀକ ପ୍ରୟାସ ନିହାତି ଆବଶ୍ୟକ ବୋଲି ସେ ପ୍ରକାଶ କରିଥିଲେ । ଅନ୍ୟତମ ସମ୍ମାନିତ ଅତିଥି ଭାବେ ଅତିରିକ୍ତ ଜିଲ୍ଲାପାଳ ସରୋଜ କୁମାର ଦତ, ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଡ଼ା. ସୁଧାଂଶୁ ଶେଖର ବଳ, ଭଦ୍ରକ ପୌରପାଳିକା / ନିର୍ବାହୀ ଅଧିକାରୀ ତାପସ ରଞ୍ଜନ ସାମଲ ପ୍ରମୁଖ ଯୋଗ ଦେଇ ଟ୍ରାନସ୍ଜେଣ୍ଡର ମାନଙ୍କ ଶିକ୍ଷା, ସ୍ୱାସ୍ଥ୍ୟ, ସାମାଜିକ ସୁରକ୍ଷା ଦିଗରେ ଉଦ୍ଦିଷ୍ଟ ସମସ୍ତ ସରକାରୀ ବ୍ୟବସ୍ଥା ସମ୍ବନ୍ଧରେ ସୂଚନା ପ୍ରଦାନ କରିଥିଲେ । ଜିଲ୍ଲା ସୂଚନା ଓ ଲୋକସମ୍ପର୍କ ଅଧିକାରୀ ରମେଶ ଚନ୍ଦ୍ର ନାୟକ ମଂଚ ପରିଚାଳନା କରିଥିଲେ । କାର୍ଯ୍ୟକ୍ରମର ସଂଯୋଜକ ଜିଲ୍ଲା ସାମାଜିକ ସୁରକ୍ଷା ଅଧିକାରୀ ପବିତ୍ର କୁମାର ଦାସ ସ୍ୱୀକୃତି ଯୋଜନାରେ ଉପଲବ୍ଧ ସମସ୍ତ ସୁବିଧା ସୁଯୋଗ ବିଷୟରେ ଆଲୋକପାତ କରିଥିଲେ । ଉପଖଣ୍ଡ ସାମାଜିକ ସୁରକ୍ଷା ଅଧିକାରୀ ସୁବାସ ଚନ୍ଦ୍ର ନାୟକ, ଭଣ୍ଡାରିପୋଖରୀ ବି.ଏସ୍.ଏସ୍. ଓ ଶାନ୍ତ୍ୱନା ଦାସ, ଟ୍ରାନ୍ସଜେଣ୍ଡର ସୌମ୍ୟା ଦାସ, ଶ୍ରାବଣୀ ମଲ୍ଲିକ୍ ଏହି ଦିବସ ପାଳନ ସମ୍ବନ୍ଧରେ ବକ୍ତବ୍ୟ ରଖିଥିଲେ । ଦୂରଦର୍ଶନର ଜଣା ଅଜଣାରେ ଏବେର ଜିଲ୍ଲାପାଳ ଦିଲୀପ ରାଉତରାଏଙ୍କ ପରିଚାଳନାରେ ପୂର୍ବରୁ ପ୍ରସାରିତ ଟ୍ରାନ୍ସଜେଣ୍ଡର ସମାଜ ଉପରେ ଆଧାରିତ ଏକ କାର୍ଯ୍ୟକ୍ରମକୁ ଦୃଶ୍ୟ ଫଳକ ଦ୍ୱାରା ସମସ୍ତଙ୍କ ଉଦ୍ଦେଶ୍ୟରେ ମଂଚରେ ପ୍ରଦର୍ଶିନ କରାଯାଇଥିଲା । ଟ୍ରାନ୍ସଜେଣ୍ଡର ରଶ୍ମିରଞ୍ଜନ ବେହେରା ଓ ମାନସୀ ଟୁଡ଼ୁଙ୍କୁ ପ୍ରମାଣ ପତ୍ର ଓ ପରିଚୟ ପତ୍ର ବଂଟନ କରାଯିବା ସହ ଲୋକସମ୍ପର୍କ ଅଧିକାରୀ ରମେଶ ଚନ୍ଦ୍ର ନାୟକଙ୍କ ଚାକିରୀରୁ ଅବସର ଦିନ ଥିବାରୁ ଜିଲ୍ଲା ସାମାଜିକ ସୁରକ୍ଷା କାର୍ଯ୍ୟାଳୟ ତରଫରୁ ଉପଢ଼ୌକନ ପ୍ରଦାନ ପୂର୍ବକ ତାଙ୍କୁ ସମ୍ବର୍ଦ୍ଧିତ କରାଯାଇଥିଲା ।
