ଭଦ୍ରକ, ୨୮ା୭ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଆଜି ଭଦ୍ରକ ରାନ୍ଦିଆ ଫେକର ଗେଟ୍ ସମ୍ମୁଖରେ ଥିବା ଶ୍ରୀରାମ ଟ୍ରକ୍ ମାଲିକ ସଂଘ ଆନୁକୂଲ୍ୟରେ ଏକ ରକ୍ତଦାନ ଶିବିର ଅନୁଷ୍ଠିତ ହୋଇଯାଇଛି । ଏଥିରେ ମୁଖ୍ୟଅତିଥି ଭାବେ ଭଦ୍ରକ ବିଧାୟକ ସୀତାଂଶୁ ଶେଖର ମହାପାତ୍ର ଯୋଗଦେଇଥିଲେ । ପ୍ରଥମେ ବିଧାୟକ ଶ୍ରୀ ମହାପାତ୍ରଙ୍କୁ କର୍ମକର୍ତାମାନେ ଏକ ବିଶାଳ ଶୋଭାଯାତ୍ରାରେ ରାନ୍ଦିଆ ମାର୍କେଟ୍ ଛକରୁ ଫେକର ଗେଟ୍ ପର୍ଯ୍ୟନ୍ତ ନେବା ପରେ ସେ ଫିତାକାଟି ରକ୍ତଦାନ ଶିବିରର ଶୁଭାରମ୍ଭ କରିଥିଲେ । ଏହି ରକ୍ତଦାନ ଶିବିରରେ ବିଧାୟକ ଶ୍ରୀ ମହାପାତ୍ର ‘ ରକ୍ତଦାନ ମହାପୂଣ୍ୟ’ ବୋଲି ଦର୍ଶାଇ ସମସ୍ତେ ଭଦ୍ରକ ଜିଲା ମୁଖ୍ୟ ଚିକିତ୍ସାଳୟରେ ଥିବା ରକ୍ତଦାନ କେନ୍ଦ୍ରର ରକ୍ତ ଅଭାବକୁ ପୂରଣ କରିବାକୁ ଆଗେଇ ଆସିବାକୁ ଆହ୍ୱାନ ଦେଇଥିଲେ । ଏହାପରେ ସେ ନିକଟରେ ଥିବା ଶ୍ରୀରାମ ମନ୍ଦିରକୁ ଯାଇ ସେଠାରେ ସମସ୍ତଙ୍କର ଶୁଭ ମନାସିଥିଲେ । ଆଜିର ଏହି ରକ୍ତଦାନ ଶିବିରରେ ୫୩ ୟୁନିଟ୍ ରକ୍ତ ସଂଗ୍ରହ ହୋଇଥିଲା ।
