ନୂଆ ଦିଲ୍ଲୀ ୪ -୧୦ (ଓଡ଼ିଆ ପୁଅ) ଗୋଟିଏ ପଟେ ଯୋଗୀ ସରକାର ଲକ୍ଷ୍ମୀପୁର ହିଂସାକୁ ନେଇ ବିରୋଧୀ ଦଳଗୁଡ଼ିକର ଦୃଢ଼ ବିରୋଧର ସମ୍ମୁଖୀନ ହେଉଥିବା ବେଳେ ବର୍ତ୍ତମାନ ବିଜେପି ସାଂସଦ ବରୁଣ ଗାନ୍ଧୀ ମଧ୍ୟ ଏହି ପ୍ରସଙ୍ଗରେ ସିଏମ ଯୋଗୀଙ୍କୁ ଚିଠି ଲେଖି ଦୁଃଖ ପ୍ରକାଶ କରିଛନ୍ତି। ଏହି ଚିଠିକୁ ତାଙ୍କ ଟ୍ୱିଟର ହ୍ୟାଣ୍ଡେଲରେ ପୋଷ୍ଟ କରି ବରୁଣ ଗାନ୍ଧୀ ଲେଖିଛନ୍ତି- ‘ମୁଁ ଲକ୍ଷ୍ମୀପୁର ଖେରୀର ହୃଦୟ ବିଦାରକ ଘଟଣାରେ ସହିଦ ହୋଇଥିବା କୃଷକମାନଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରୁଛି। ମୁଁ ଉତ୍ତରପ୍ରଦେଶର ମୁଖ୍ୟମନ୍ତ୍ରୀଙ୍କୁ ଏହି ପ୍ରସଙ୍ଗରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଅନୁରୋଧ କରୁଛି।
ସିଏମ୍ ଯୋଗୀଙ୍କୁ ଦେଇଥିବା ଚିଠିରେ ବରୁଣ ଗାନ୍ଧୀ ଲେଖିଛନ୍ତି ଯେ, ଆନ୍ଦୋଳନରତ ଚାଷୀଙ୍କୁ ଅତି ନିର୍ମମ ଭାବେ ଦମନ କରିବାର ହୃଦୟ ବିଦାରକ ଘଟଣା ସମଗ୍ର ଦେଶର ନାଗରିକଙ୍କ ମଧ୍ୟରେ ଅସନ୍ତୋଷ ଓ କ୍ରୋଧ ସୃଷ୍ଟି କରିଛି। ଏହି ଘଟଣାର ଗୋଟିଏ ଦିନ ପୂର୍ବରୁ ଦେଶ ଅହିଂସାର ପୂଜାରୀ ମହାତ୍ମା ଗାନ୍ଧୀଙ୍କ ଜନ୍ମ ବାର୍ଷିକୀ ପାଳନ କରିଥିଲା। ପରଦିନ ଲକ୍ଷ୍ମୀପୁର ଖେରୀରେ ଆମର ଅନ୍ନଦାତାଙ୍କୁ ହତ୍ୟା କରାଯିବା ଘଟଣା କୌଣସି ସଭ୍ୟ ସମାଜରେ କ୍ଷମଣୀୟ ନୁହେଁ।
ବରୁଣ ଗାନ୍ଧୀ ଆହୁରି ଲେଖିଛନ୍ତି ଯେ ଆନ୍ଦୋଳନକାରୀ କୃଷକ ଭାଇମାନେ ଆମର ନାଗରିକ। ଯଦି କୃଷକ ଭାଇମାନେ କିଛି ପ୍ରସଙ୍ଗରେ କଷ୍ଟ ଭୋଗୁଛନ୍ତି ଏବଂ ସେମାନଙ୍କର ଗଣତାନ୍ତ୍ରିକ ଅଧିକାର ଅଧୀନରେ ବିରୋଧ କରୁଛନ୍ତି, ତେବେ ଆମେ ସେମାନଙ୍କ ପ୍ରତି ଅତ୍ୟଧିକ ସଂଯମତା ଏବଂ ଧୈର୍ଯ୍ୟର ସହ ମୁକାବିଲା କରିବା ଉଚିତ୍। ଯେକୌଣସି ପରିସ୍ଥିତିରେ, ଆମେ ଆମର କୃଷକମାନଙ୍କୁ ସମ୍ବେଦନଶୀଳତା ସହିତ ବ୍ୟବହାର କରିବା ଉଚିତ ଏବଂ କେବଳ ଗାନ୍ଧୀଗାଦୀ ଚିନ୍ତାଧାରା ଏବଂ ଗଣତାନ୍ତ୍ରିକ ଉପାୟରେ ଆଇନର ଆଭିମୁଖ୍ୟ ମଧ୍ୟରେ ସମସ୍ତ ସମସ୍ୟାର ସାଧାନ ହେବା ଉଚିତ। ଏହି ଘଟଣାରେ ସହିଦ ହୋଇଥିବା କୃଷକ ଭାଇମାନଙ୍କୁ ଶ୍ରଦ୍ଧାଞ୍ଜଳି ଜଣାଉଛି ଏବଂ ମୁଁ ସେମାନଙ୍କ ପରିବାର ପ୍ରତି ସମବେଦନା ଜଣାଉଛି।
ଏହି ଘଟଣାରେ ଅଭିଯୁକ୍ତମାନଙ୍କୁ ତୁରନ୍ତ ଚିହ୍ନଟ କରିବାକୁ ଏବଂ ଆଇପିସିର ଧାରା ୩୦୨ ଅନୁଯାୟୀ ହତ୍ୟା ମାମଲା ପଞ୍ଜିକରଣ କରି କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସିଏମ ଯୋଗୀଙ୍କ ନିକଟରେ କିଛି ବିଜେପି ସାଂସଦ ଦାବି କରିଛନ୍ତି। ସେ କହିଛନ୍ତି ଯେ, ସୁପ୍ରିମକୋର୍ଟଙ୍କ ତତ୍ତ୍ୱାବଧାନରେ ଧାର୍ଯ୍ୟ ସମୟସୀମା ମଧ୍ୟରେ ସିବିଆଇ ଦ୍ୱାରା ଏହି ସମଗ୍ର ଘଟଣାର ଅନୁସନ୍ଧାନ କରାଯିବା ଉଚିତ। ଏଥିସହ ପୀଡିତଙ୍କ ପରିବାରକୁ ପ୍ରତ୍ୟେକଙ୍କୁ ଏକ ଏକ କୋଟି ଟଙ୍କା କ୍ଷତିପୂରଣ ଦେବାକୁ ସେ ଦାବି କରିଛନ୍ତି। ଭବିଷ୍ୟତରେ କୃଷକମାନଙ୍କ ପ୍ରତି ଏହି ପ୍ରକାର ନିଷ୍ଠୁରତା ଯେପରି ନହୁଏ ସେଥିପାଇଁ ସରକାର ନିଶ୍ଚିତ କରିବା ଉଚିତ ବୋଲି ସେ କହିଛନ୍ତି।
