ଭୁବନେଶ୍ୱର, ୦୬/୦୫ (ଓଡ଼ିଆ ପୁଅ) : ଚାଷୀ ଅନ୍ନଦାତା। କରୋନା ମହାମାରୀ ଲଢେଇରେ ଆମ ଚାଷୀ ଭାଇ ମଧ୍ୟ ଜଣେ ଜଣେ ଯୋଦ୍ଧା ଓ ଲଢେଇର ସାରଥୀ। ସେମାନଙ୍କ କାରଣରୁ ସମସ୍ତଙ୍କ ଘରେ ଚୁଲି ଜଳେ। ଚଳିତବର୍ଷ ଖରିଫ୍ ଋତୁରେ ଧାନ କିଣିବାର ନିର୍ଦ୍ଧାରିତ ତାରିଖ ପୂର୍ବରୁ ଲକ୍ଡାଉନ୍ ଘୋଷଣା ହେବା ଏବଂ ଟକୋନ୍ ସମସ୍ୟା କାରଣରୁ ଧାନ ବିକ୍ରିରୁ ବଂଚିତ ହୋଇ ରାଜ୍ୟର ଅନେକ ଚାଷୀ ଭାଇ ଓ ଭଉଣୀ ଆର୍ଥିକ ଅନାଟନ ଦେଇ ଗତି କରୁଛନ୍ତି। ଏଭଳି ପରିସ୍ଥିତିରେ ରାଜ୍ୟରେ ଧାନ କିଣାରେ ଅହେତୁକ ବିଳମ୍ବ ପରିଲକ୍ଷିତ ହୋଇଛି ଏବଂ ରାଜ୍ୟ ସରକାର ଏ ନେଇ କୌଣସି ସ୍ପଷ୍ଟିକରଣ ରଖିିନାହାନ୍ତି। ରାଜ୍ୟ ସରକାର ଚାଷୀଙ୍କ ପ୍ରତି ସମ୍ବେଦନଶୀଳ ମନୋଭାବ ପଷୋଣ କରି ତୁରନ୍ତ ସେମାନଙ୍କ ଠାରୁ ଖରିଫ ଧାନ କିଣିବାର ବ୍ୟବସ୍ଥା କରିବାକୁ ବିଜେପି କୃଷକ ମୋର୍ଚ୍ଚା ତରଫରୁ ରାଜ୍ୟ ସରକାରଙ୍କୁ ଅନୁରୋଧ କରାଯାଇଛି।
ବିଜେପି କୃଷକ ମୋର୍ଚ୍ଚା ରାଜ୍ୟ ସାଧାରଣ ସଂପାଦକ ଶ୍ରୀ ସୁରଥ୍ ବିଶ୍ୱାଳ କହିଛନ୍ତି ଯେ, ଏବର୍ଷ ମାର୍ଚ୍ଚ ୩୧ ତାରିଖ ସୁଦ୍ଧା ଖରିଫ ଧାନ ମଣ୍ଡିରେ ବିକ୍ରି ହେବା ନେଇ କେନ୍ଦ୍ର ଓ ରାଜ୍ୟ ସରକାର ଘୋଷଣା କରିଥିଲେ। ତେବେ ନିର୍ଦ୍ଧାରିତ ସମୟ ପୂର୍ବରୁ କରୋନା ଭୂତାଣୁ ସଂକଟ ସମସ୍ୟା ପାଇଁ କେନ୍ଦ୍ର ସରକାରଙ୍କ ପକ୍ଷରୁ ଲକ୍ଡାଉନ୍ ଘୋଷଣା ହେବା କାରଣରୁ ରାଜ୍ୟର ଲକ୍ଷାଧିକ ଚାଷୀ ଖରିଫ ଧାନ ବିକ୍ରି କରିପାରିନାହାନ୍ତି। ମଣ୍ଡି ସମସ୍ୟା ଓ ଟୋକନ ବ୍ୟବସ୍ଥା ମଧ୍ୟ ଖରିଫ ଧାନ ସଂଗ୍ରହରେ ବାଧା ହୋଇଛି।
ରାଜ୍ୟର ପ୍ରାୟ ସମସ୍ତ ଚାଷୀ ଖରିଫ୍ ଧାନ ବିକ୍ରୟ ଉପରେ ନିର୍ଭର କରନ୍ତି। ଚାଷୀମାନଙ୍କର ରୋଜଗାରର ମୂଳ ପନ୍ଥା ହେଲା ଖରିଫ ଧାନ। ଏହି ସମୟରେ ସେମାନେ ଧାନ ବିକ୍ରି କରି ବର୍ଷଯାକର ଗୁଜୁରାଣ ମେଂଟାନ୍ତି। ମାତ୍ର ଚଳିତବର୍ଷ କରୋନା ତଥା ଲକ୍ଡାଉନ୍ ସମୟରେ ରାଜ୍ୟ ସରକାରଙ୍କ ପକ୍ଷରୁ ଧାନ ବିକ୍ରୟ ପାଇଁ କୌଣସି ସ୍ପଷ୍ଟୀକରଣ ଦିଆଯାଇନାହିଁ। ଫଳରେ ଚାଷୀମାନଙ୍କର ଧାନ ମଣ୍ଡି ବା ନିଜ ଘରେ ପଡି ରହିଥିବା ବେଳେ ସେମାନେ ବାହାର ବ୍ୟବସାୟଙ୍କୁ ବିକ୍ରି କରିପାରିନାହାନ୍ତି। ଏହା ଚାଷୀଙ୍କ ବୋଝ ଉପରେ ନଳିତା ବିଡା ସଦୃଶ ହୋଇଛି ବୋଲି ଶ୍ରୀ ବିଶ୍ୱାଳ କହିଛନ୍ତି।
ଲକ୍ଡାଉନ କାରଣରୁ ଚାଷୀମାନେ ଆର୍ଥିକ ସଙ୍କଟ ଦେଇ ଗତି କରୁଥିବା କାରଣରୁ ଚାଷୀମାନେ ଘର ଚଳାଇବାକୁ ଅସମର୍ଥ ହୋଇଛନ୍ତି। ବର୍ତମାନ ଲକ୍ଡାଉନ୍ ସମୟରେ ଚାଷୀର ରୋଜଗାରର ଅନ୍ୟ ପନ୍ଥା ନଥିବାରୁ ଅନେକ ଚାଷୀମାନେ ହନ୍ତସନ୍ତ ହେଉଛନ୍ତି। ସେମାନଙ୍କ ଆର୍ଥିକ ସ୍ଥିତି ସମ୍ପୂର୍ଣ୍ଣ ରୂପେ ଭୁଷୁଡି ପଡିଛି। ଚାଷୀମାନେ ସ୍ୱଳ୍ପମିଆଦି ଋଣ ଶୁଝିବାରେ ମଧ୍ୟ ସମସ୍ୟାର ସମ୍ମୁଖୀନ ହେଉଛନ୍ତି ବୋଲି ଶ୍ରୀ ବିଶ୍ୱାଳ କହିଛନ୍ତି।
କେନ୍ଦ୍ର ସରକାର ଚାଷୀଙ୍କଠାରୁ ଖରିଫ୍ ଧାନ କ୍ରୟ କରିବା ପାଇଁ ଏମଏସପିର ବ୍ୟବସ୍ଥା କରିଛନ୍ତି। ମାତ୍ର ଓଡିଶାରେ ଧାନକିଣାରେ ମିଲରଙ୍କ ଦୁର୍ନୀତି କାରଣରୁ ଚାଷୀ ତାଙ୍କ ପ୍ରାପ୍ୟ ପାଉନାହିଁ। କରୋନା ପାଇଁ ଲକ୍ ଡାଉନ ହେବା କାରଣରୁ ଧାନ କିଣା ପୂରା ଠପ୍। ଯଦ୍ୱାରା ଚାଷୀ ମୁଣ୍ଡରେ ହାତ ଦେଇବସିଛି। ମହାବିପତି ସମୟରେ ଚାଷୀ ମାନଙ୍କ ଭବିଷ୍ୟତକୁ ଦୃଷ୍ଟିରେ ରଖି ରାଜ୍ୟର ପ୍ରାୟ ସମସ୍ତ ଚାଷୀ ଖରିଫ୍ ଧାନ ବିକିବା ନେଇ ରାଜ୍ୟ ସରକାର ଉଚିତ୍ ପଦକ୍ଷେପ ଗ୍ରହଣ କରିବାକୁ ଶ୍ରୀ ବିଶ୍ୱାଳ ଅନୁରୋଧ କରିଛନ୍ତି।
ରାଜ୍ୟ ସରକାର ଚାଷୀକୂଳ ପ୍ରତି ସମ୍ବେଦନଶୀଳ ହୁଅନ୍ତୁ ଏବଂ ଖରିଫ ଧାନ କ୍ରୟ ନେଇ ସ୍ପଷ୍ଟୀକରଣ ରଖିବା ସହ ଆବଶ୍ୟକୀୟ ପଦକ୍ଷେପ ଗ୍ରହଣ କରନ୍ତୁ। ଏହାସହ ଚାଷୀଙ୍କ ସୁରକ୍ଷାକୁ ଦୃଷ୍ଟିରେ ରଖି ଧାନ ସଂଗ୍ରହ କରିବା ସମୟରେ କେନ୍ଦ୍ର ସରକାରଙ୍କ ବିଭିନ୍ନ ଗାଇଡଲାଇନର ଅନୁପାଳନ ଯଥା ସାମାଜିକ ଦୂରତା ମାନିବା, ମାସ୍କ ପିନ୍ଧିବା ଉପରେ ଗୁରୁତ୍ୱ ଦେବାକୁ ଶ୍ରୀ ବିଶ୍ୱାଳ ରାଜ୍ୟ ସରକାରଙ୍କ ଦୃଷ୍ଟି ଆକର୍ଷଣ କରିଛନ୍ତି।
