ଭଦ୍ରକ, ୯ା୬ (ଓଡିଆ ପୁଅ / ସ୍ନିଗ୍ଧା ରାୟ) -ପ୍ରଶାସନିକ ଉତ୍କର୍ଷତାର ଏକ ଗୁରୁତ୍ୱପୂର୍ଣ୍ଣ ସ୍ୱୀକୃତିସ୍ୱରୂପ ଭଦ୍ରକ ଜିଲା ‘ରାଜସ୍ୱ ପ୍ରଶାସନରେ ସାମଗ୍ରିକ ପ୍ରଦର୍ଶନ’ ପାଇଁ ଓଡ଼ିଶାର ସମସ୍ତ ୩୦ ଟି ଜିଲା ମଧ୍ୟରେ ପ୍ରଥମ ସ୍ଥାନ ହାସଲ କରିଛି। ଏଥି ଉପଲକ୍ଷେ ଭୁବନେଶ୍ୱରସ୍ଥିତ ଲୋକସଭା ଭବନ କନଭେନସନ ସେଂଟରରେ ଦୁଇଦିନ ଧରି ଅନୁଷ୍ଠିତ ରାଜସ୍ୱ ଅଧିକାରୀ ସମ୍ମିଳନୀ ସହ କର୍ମଶାଳାରେ ଭଦ୍ରକ ଜିଲାକୁ ଉକ୍ତ ମର୍ଯ୍ୟାଦାଜନକ ଉତ୍କର୍ଷତା ପ୍ରମାଣପତ୍ର ପ୍ରଦାନ କରାଯାଇଛି। ତେବେ ରାଜସ୍ୱ ଏବଂ ବିପର୍ଯ୍ୟୟ ପରିଚାଳନା ବିଭାଗ ଦ୍ୱାରା ପ୍ରଥମଥର ପାଇଁ ଆୟୋଜିତ ଏହି କାର୍ଯ୍ୟକ୍ରମରେ ସମଗ୍ର ଓଡ଼ିଶାରୁ ତହସିଲଦାର, ଉପଜିଲାପାଳ ଏବଂ ଅତିରିକ୍ତ ଜିଲାପାଳ (ରାଜସ୍ୱ) ଙ୍କ ସମେତ ପ୍ରମୁଖ କ୍ଷେତ୍ରସ୍ତରୀୟ କର୍ମକର୍ତାମାନେ ଅଂଶଗ୍ରହଣ କରିଥିଲେ। ଏହି ଉତ୍ସବର ଉଦ୍ଘାଟନୀ ଅଧିବେଶନରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, ରାଜସ୍ୱ ଏବଂ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ, ଅତିରିକ୍ତ ମୁଖ୍ୟ ସଚିବ ଦେଓରଂଜନ କୁମାର ସିଂହ ପ୍ରମୁଖ ଯୋଗଦେଇଥିଲେ। ଏହି ଅବସରରେ ମୁଖ୍ୟମନ୍ତ୍ରୀ ଶ୍ରୀ ମାଝୀ ଜନସାଧାରଣଙ୍କ ସେବା ପ୍ରଦାନ ଏବଂ ଓଡ଼ିଶା ଜନସେବା ଅଧିକାର ଆଇନ୍ କାର୍ଯ୍ୟକାରୀ କରିବାରେ ରାଜସ୍ୱ ଅଧିକାରୀମାନଙ୍କ ଗୁରୁତ୍ୱପୂର୍ଣ୍ଣ ଭୂମିକା ଉପରେ ଆଲୋକପାତ କରିଥିଲେ। ସେ ତୃଣମୂଳ ସ୍ତରରେ ଶାସନକୁ ସୁଦୃଢ କରିବା ଏବଂ ସମେୟାଚିତ ସେବା ପ୍ରଦାନ ସୁନିଶ୍ଚିତ କରିବା ପାଇଁ ସେମାନଙ୍କର ଉତ୍ସର୍ଗତାକୁ ପ୍ରଶଂସା କରିଥିଲେ। ଏହି ଉତ୍ସବରେ ୩୦ ଟି ଜିଲାରୁ ଗୋଟିଏ ଜିଲାର ମୂଲ୍ୟାଙ୍କନ କ୍ଷେତ୍ରରେ ଜିଲାସ୍ତରୀୟ କାର୍ଯ୍ୟଦକ୍ଷତାର ୨ଟି ପ୍ରମୁଖ ପାରା ମିଟର ଯାହା ପ୍ରଭାବଶାଳୀ କାର୍ଯ୍ୟାନ୍ୱୟନ ଏବଂ ସେବା ପ୍ରଦାନ ରହିଥିଲା। ଅଧିକାର ରେକର୍ଡର ସ୍ତମ୍ଭ ଦୁଇଟିରେ ଅଗ୍ରଗତି, ନାଗରିକ ମାନଙ୍କୁ ସ୍ୱଚ୍ଛତା ଏବଂ ସେବାର ସହଜତା ସୁନିଶ୍ଚିତ କରିବା ପାଇଁ ସଠିକ୍ ଜମି ରେକର୍ଡ ବଜାୟ ରଖିବାରେ ଏହା ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ । ତେବେ ରାଜସ୍ୱ ପ୍ରଶାସନକୁ ସୁବ୍ୟବସ୍ଥିତ କରିବାରେ ଉଲ୍ଲେଖନୀୟ ଦକ୍ଷତା ଏବଂ ପ୍ରତିବଦ୍ଧତା ପ୍ରଦର୍ଶନ କରି ଭଦ୍ରକ ଜିଲା ଉଭୟ ବର୍ଗରେ ଶ୍ରେଷ୍ଠ ପ୍ରଦର୍ଶନକାରୀ ଭାବେ ଉଭା ହୋଇଛି। ଭଦ୍ରକର ରାଜସ୍ୱ ଅଧିକାରୀଙ୍କ ଏକ ଦଳଙ୍କ ଉପସ୍ଥିତିରେ ଜିଲାପାଳ ଦିଲ୍ଲୀପ ରାଉତରାୟଙ୍କ ପକ୍ଷରୁ ଅତିରକ୍ତ ଜିଲାପାଳ (ରାଜସ୍ୱ) ଶାନ୍ତନୁ କୁମାର ମହାନ୍ତି ଏହି ପୁରସ୍କାର ଗ୍ରହଣ କରିଥିଲେ। ଏହି ମାନ୍ୟତା ଜିଲାପାଇଁ ଏକ ଗର୍ବର ମୁହୁର୍ତ ଏବଂ ରାଜ୍ୟରେ ସାଧାରଣ ସେବା ପ୍ରଦାନ, ରେକର୍ଡ ପରିଚାଳନା ଏବଂ ପ୍ରଶାସନିକ ସ୍ୱଚ୍ଛତାରେ ଏକ ମାନଦଣ୍ଡ ସ୍ଥାପନ କରେ।
