ନୂଆଦିଲ୍ଲୀ ୯-୧୨ (ଓଡ଼ିଆ ପୁଅ) ଦକ୍ଷିଣ ପଶ୍ଚିମ ବଙ୍ଗୋପସାଗରରେ ସୃଷ୍ଟି ହୋଇଥିବା ଘୂର୍ଣ୍ଣିବଳୟ ଏବେ ବାତ୍ୟାର ରୂପ ନେଇଛି। ଏହାର ନାମକରଣ ‘ମାଣ୍ଡୋସ୍’ ରଖାଯାଇଛି। ଏହି ସାମୁଦ୍ରିକ ଝଡ଼ କାରଣରୁ ଆଜି ତାମିଲନାଡୁର ଉପକୂଳବର୍ତ୍ତୀ ଜିଲ୍ଲାର କେତେକ ସ୍ଥାନରେ ପ୍ରବଳରୁ ପ୍ରବଳ ବର୍ଷା ହୋଇପାରେ। ଆନ୍ଧ୍ରପ୍ରଦେଶର ଦକ୍ଷିଣ ତଟ, ଆଭ୍ୟନ୍ତରୀଣ ତାମିଲନାଡୁ ଏବଂ ଆଣ୍ଡାମାନ ଏବଂ ନିକୋବର ଦ୍ୱୀପପୁଞ୍ଜରେ ହାଲୁକାରୁ ମଧ୍ୟମ ବର୍ଷା ହେବାର ସମ୍ଭାବନା ରହିଛି। ପାଣିପାଗ ବିଭାଗର ଆକଳନ ଅନୁଯାୟୀ ଏହି ଝଡ଼ ଆସନ୍ତା କିଛି ଘଣ୍ଟା ମଧ୍ୟରେ ଭୟଙ୍କର ରୂପ ନେଇପାରେ। ପ୍ରବଳ ବର୍ଷା ଏବଂ ଘୂର୍ଣ୍ଣିବଳୟ ସତର୍କତାକୁ ଦୃଷ୍ଟିରେ ରଖି ଆଜି ଚେନ୍ନାଇ, କୁଡାଲୋର, ଭିଲୁପୁରମ୍ ଏବଂ କାଞ୍ଚିପୁରାମର ସ୍କୁଲ ଏବଂ କଲେଜ ପାଇଁ ଛୁଟି ଘୋଷଣା କରାଯାଇଛି। ପାଣିପାଗ ବିଭାଗ ଅନୁଯାୟୀ ଏହି ବର୍ଷାର ପ୍ରଭାବ ଦୁଇ ଦିନ ପର୍ଯ୍ୟନ୍ତ ଦେଖାଯିବ। ଉପକୂଳ ତାମିଲନାଡୁ, ପୁଡୁଚେରୀ, କରାଇକାଲ, ଆନ୍ଧ୍ରପ୍ରଦେଶର ଦକ୍ଷିଣ ଭାଗ ଏବଂ ରୟାଲାସିମାରେ ୯ ଏବଂ ୧୦ ଡିସେମ୍ବରରେ ବିଚ୍ଛିନ୍ନ ସ୍ଥାନଗୁଡିକରେ ହାଲୁକା ରୁ ମଧ୍ୟମ ବୃଷ୍ଟିପାତ ହେବାର ସମ୍ଭାବନା ରହିଛି।
