ଭଦ୍ରକ, ୧୯ା୨ (ଓଡ଼ିଆ ପୁଅ / ସ୍ନିଗ୍ଧା ରାୟ) – ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ଆଜି ଭଦ୍ରକ ବିଧାୟକ ସୀତାଂଶୁ ଶେଖର ମହାପାତ୍ର ସାକ୍ଷାତ କରି ଭଦ୍ରକ ଜିଲ୍ଲାର ସମଗ୍ର ଓ ଦୂରଦର୍ଶୀ ଉନ୍ନତି ପାଇଁ ବିସ୍ତୃତ ପ୍ରସ୍ତାବ ପ୍ରଦାନ କରିଛନ୍ତି। ବିଶେଷକରି ଭଦ୍ରକର ଆସ୍ଥାକେନ୍ଦ୍ର ମା ଭଦ୍ରକାଳୀଙ୍କ ପୀଠକୁ ପରିକ୍ରମା ପ୍ରକଳ୍ପ ମାଧ୍ୟମରେ ଆଧୁନିକ ଓ ସୁସଂଗଠିତ ତୀର୍ଥକ୍ଷେତ୍ରରେ ପରିଣତ କରିବା,କୋରକୋରାରେ ୮୦ ଫୁଟ ଉଚ୍ଚ ଶ୍ରୀ ରାମଙ୍କ ପ୍ରତିମା ସହ ରାମାୟଣ ଆଧାରିତ ଥିମ୍ ପାର୍କ ଓ ଲାଇଟ୍ ଆଣ୍ଡ ସାଉଣ୍ଡ ଶୋ ମାଧ୍ୟମରେ ଭଦ୍ରକକୁ ଧାର୍ମିକ ପର୍ଯ୍ୟଟନରେ ସ୍ଥାନ ଦେବା, ଅଟଳ ବସଷ୍ଟାଣ୍ଡ ଓ ଚରମ୍ପା ରେଲୱେ ଷ୍ଟେସନର ଆଧୁନିକ ସୁବିଧା ସହ ଉନ୍ନତିକରଣ ଓ ସହର ମଧ୍ୟ ଦେଇ ପ୍ରବାହିତ ସାଳନ୍ଦୀ ନଦୀର ନଦୀତଟ ସୌନ୍ଦର୍ଯ୍ୟକରଣ, ଚରମ୍ପା କୃଷି ବିଜ୍ଞାନ କେନ୍ଦ୍ରରେ କୃଷି ବିଶ୍ୱବିଦ୍ୟାଳୟ ସ୍ଥାପନା, ଭଦ୍ରକ ନଳାଙ୍ଗ ବାଇପାସ ରିଂ ରୋଡ଼ ପ୍ରକଳ୍ପର ନିର୍ମାଣ ଓ ପୂର୍ବ ଘୋଷିତ ଭଦ୍ରକ ମେଡିକାଲ କଲେଜ ଓ ଭଦ୍ରକ ବିଶ୍ୱବିଦ୍ୟାଳୟ ନିର୍ମାଣର ଶୁଭ ଶିଳାନ୍ୟାସ ପାଇଁ ବିଧାୟକ ଶ୍ରୀ ମହାପାତ୍ର ନିବେଦନ କରିଛନ୍ତି। ଏହି ସାକ୍ଷାତ୍ ଓ ପ୍ରସ୍ତାବ ପ୍ରଦାନ କାଳରେ ମୁଖ୍ୟମନ୍ତ୍ରୀ ଶ୍ରୀ ମାଝୀ ଦୃଢ଼ ଆଶ୍ୱାସନ ଦେଇ ପୂର୍ବ ଘୋଷିତ ଦୁଇ ପ୍ରକଳ୍ପର ଶୁଭ ଶିଳାନ୍ୟାସ ଖୁବ ଶୀଘ୍ର ହେବାକୁ ଯାଉଥିବାବେଳେ “ଭଦ୍ରକ ଜିଲ୍ଲାର ଉନ୍ନତି ପାଇଁ ଅର୍ଥ କେବେ ପ୍ରତିବନ୍ଧକ ସାଜିବ ନାହିଁ ବୋଲି କହିଛନ୍ତି।
