ତାଳଚେର,୨୪/୭(ଓଡ଼ିଆ ପୁଅ/ଅଜିତ କୁମାର ବେହେରା) : କୋଲିୟରୀ ଥାନା ଅନ୍ତର୍ଗତ ୧୪ ନଂ ୱାର୍ଡ଼ର ତାଳଚେର ଦେଉଳବେଡ଼ା ରଗୁଡ଼ି ସାହିର ରାଜୁ ନାଏକଙ୍କ ପୁଅ ଅଜୟ ନାଏକ(୨୨)ଙ୍କ ମୃତ୍ୟୁର କାରଣ ସ୍ପଷ୍ଟ କରିଛି ପୋଲିସ । ଖବରରୁ ପ୍ରକାଶ,ବୁଧବାର ସନ୍ଧ୍ୟାରେ ଅଜୟଙ୍କୁ ତାର କିଛି ସାଙ୍ଗ ଘରୁ ଡାକି ନେଇ ଯାଇଥିଲେ । ତେବେ ରାଜୁ ଆଉ ରାତିରେ ଘରକୁ ଫେରି ନଥିଲେ । ଏ ନେଇ ଅଜୟଙ୍କ ମା ଏବଂ ସ୍ତ୍ରୀ ବହୁ ଖୋଜାଖୋଜି କରିଥିଲେ । ତେବେ ଗୁରୁବାର ସକାଳ ପ୍ରାୟ ୮ଟା ବେଳେ ଅଜୟଙ୍କ କ୍ଷତାକ୍ତ ମୃତ ଦେହକୁ ଏକ ଗାଡ଼ି ଯୋଗେ ବୋହି ଆଣି ତାଙ୍କ ଘର ସମ୍ମୁଖସ୍ଥ ରାସ୍ତା ଉପରେ ପକାଇ ଦିଆଯାଇଥିଲା । ଏ ସମ୍ପର୍କରେ କୋଲିୟରୀ ପୋଲିସକୁ ସୂଚନା ମିଳିବା ପରେ ତାଳଚେର ଏସଡିପିଓ,କୋଲିୟରୀ ଆଇଆଇସି ପ୍ରମୁଖ ଘଟଣାସ୍ଥଳକୁ ଆସି ଛାନବିନ୍ କରିବାସହ ଏକ ୟୁଡି କେସ୍ ନଂ ୧୮/୨୦ରେ ଏକ ମାମଲା ରୁଜୁ କରି ବିଭିନ୍ନ ଦିଗକୁ ନେଇ ଖୋଳତାଡ଼ ଆରମ୍ଭ କରିଥିଲେ । ତେବେ ଅଜୟଙ୍କ ମୃତ୍ୟୁ ବିଦ୍ୟୁତ ଆଘାତରେ ହୋଇଥିବାର ପୋଲିସ ସୂଚନା ଦେଇଛି । ପୋଲିସ ସୂଚନା ମୁତାବକ, ଅଜୟ ନିଜ ସାଥୀ ଅମରଜୀତ ସିଂ ଏବଂ ମଦୁ ଓରଫ ବାବୁ ପ୍ରଧାନଙ୍କ ସହ ମୋଟଗାଁ ଅଂଚଳକୁ ଯାଇଥିଲେ । ସେଠାରେ ଏକ ଚିକେନ୍ ଦୋକାନରେ ଚୋରି କରିବା ଉଦ୍ୟମ ବେଳେ ବିଦ୍ୟୁତ ସଂସ୍ପର୍ଶରେ ଆସି ଅଜୟ ଘଟଣାସ୍ଥଳରେ ପ୍ରାଣ ହରାଇଥିଲେ । ଏହାପରେ ଅଜୟଙ୍କ ଦୁଇ ସାଥି ତାର ମୃତ ଦେହକୁ ଟାଟା ଏସି ବୋହି ଆଣି ତାର ଘର ସମ୍ମୁଖରେ ପକାଇ ଦେଇ ପଳାଇଥିଲେ । ଏ ବାବଦରେ ପୋଲିସ ଜଣେ ସାଥିକୁ ଅଟକ ରଖି ପଚରା ଉଚୁରା କରିବାପରେ ସେ ସମସ୍ତ କଥା ପୋଲିସ ନିକଟରେ ପ୍ରକଟ କରିଥିଲା ।
