ଭଦ୍ରକ, ୩୦ା୮ (ଓଡିଆ ପୁଅ / ସ୍ନିଗ୍ଧା ରାୟ) – ଚଳିତ ଲଘୁଚାପ ଜନିତ ବନ୍ୟାଘେରରେ ରହି ପ୍ରସବ ଯନ୍ତ୍ରଣାରେ ଛଟପଟ ହେଉଥିବା ଜଣେ ଜନନୀ କ୍ଷେତ୍ରରେ ଦେବଦୂତ ସାଜି ଉଦ୍ଧାର କରିଛି ଅଗ୍ନିଶମ ବାହିନୀ । ଏହି ଘଟଣା ସଂପର୍କରେ ମିଳିଥିବା ତଥ୍ୟ ଅନୁସାରେ ଏହି ଜିଲାର ଧାମନଗର ବ୍ଲକ୍ ବୟାଙ୍ଗଡିହ ପଂଚାୟତ ଗୋଠିଣା ଗ୍ରାମର ହିମାଂଶୁ ରାଉତଙ୍କ ପତ୍ନୀ ଗର୍ଭବତୀ ଥାଇ ଅସହ୍ୟ ଯନ୍ତ୍ରଣା ପାଇଆସୁଥିଲେ । ମାତ୍ର ସଂପୂର୍ଣ୍ଣ ଗ୍ରାମଟି ବନ୍ୟାଘେରରେ ବୁଡି ରହି ବାହ୍ୟ ଜଗତରୁ ବିଚ୍ଛିନ୍ନ ହୋଇଯାଇଥିବାରୁ ମହିଳା ଜଣକୁ ଡାକ୍ତରଖାନା ନିଆଯାଇପାରିନଥିଲା । ମାତ୍ର ଅଗ୍ନିଶମ ବାହିନୀ ଏହି ଖବର ପାଇ ଜଳଘେରବନ୍ଦୀରେ ଥିବା ଉପରୋକ୍ତ ମହିଳାକୁ ଉଦ୍ଧାର କରି ଧାମନଗର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ପହଞ୍ଚାଇଥିଲେ । ତାଙ୍କର ସ୍ୱାସ୍ଥ୍ୟ ଅବସ୍ଥା ଏବେ ସ୍ଥିର ଥିବା ଜଣାପଡିଛି ।
