ଭଦ୍ରକ, ୨୮ା୪ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଜାତୀୟ ମାନବାଧିକାର କମିଶନ (ଏନଏଚଆରସି) ଭାରତରେ ଭିନ୍ନକ୍ଷମ ବ୍ୟକ୍ତି ବିଶେଷକରି ବାକ୍ ବାଧାପ୍ରାପ୍ତ, ବଧିର ଏବଂ ଦୃଷ୍ଟିହୀନ ବ୍ୟକ୍ତିଙ୍କ ନ୍ୟାୟ ପାଇବା ପ୍ରସଙ୍ଗରେ ଏକ କାର୍ଯ୍ୟାନୁଷ୍ଠାନ ରିପୋର୍ଟ ମାଗିଛି। ସର୍ବୋଚ୍ଚ ମାନବାଧିକାର ପ୍ରହରୀ ଆଇନ ଏବଂ ନ୍ୟାୟ ମନ୍ତ୍ରଣାଳୟର ସଚିବ ଏବଂ ସାମାଜିକ ନ୍ୟାୟ ଏବଂ ସଶକ୍ତିକରଣ ମନ୍ତ୍ରଣାଳୟର ଭିନ୍ନକ୍ଷମ ବ୍ୟକ୍ତିଙ୍କ ସଶକ୍ତିକରଣ ବିଭାଗ ସଚିବଙ୍କଠାରୁ ଏହି ଏଟିଆର ମାଗନ୍ତୁ ବୋଲ ମାନବାଧିକାର କର୍ମୀ ଏବଂ ସୁପ୍ରିମକୋର୍ଟର ଓକିଲ ରାଧାକାନ୍ତ ତ୍ରିପାଠିଙ୍କ ଦ୍ୱାରା ଦାଖଲ କରାଯାଇଥିବା ଏକ ଆବେଦନ ଉପରେ କାର୍ଯ୍ୟାନୁଷ୍ଠାନ ନେଇ ଏନଏଚଆରସି ୧୫ ଦିନ ମଧ୍ୟରେ ରିପୋର୍ଟ ମାଗିଛି। ଆବେଦନକାରୀ ଏହି ସମ୍ପର୍କରେ ଆବଶ୍ୟକୀୟ ପଦକ୍ଷେପ ନେବାକୁ ଭାରତର ସିଜେଆଇଙ୍କୁ ଏକ ଚିଠି ମଧ୍ୟ ଲେଖିଥିଲେ। ଶ୍ରୀ ତ୍ରିପାଠି ତାଙ୍କ ଆବେଦନରେ ଭାଷା ପ୍ରତିବନ୍ଧକ ଏବଂ ଅପର୍ଯ୍ୟାପ୍ତ ସମ୍ବଳ ଯୋଗୁଁ ନ୍ୟାୟ ପାଇବାରେ ବଧିର, ମୁକ, ବାକ୍ ବାଧାପ୍ରାପ୍ତ ନାଗରିକମାନେ ସମ୍ମୁଖୀନ ହେଉଥିବା ଚ୍ୟାଲେଞ୍ଜ ବିଷୟରେ ଉଲ୍ଲେଖ କରିଛନ୍ତି। ଏହାର ସମାଧାନ ପାଇଁ, ସେ ଆଇନ, ନିୟମ ଏବଂ ନିୟମାବଳୀର ଭାରତୀୟ ସାଙ୍କେତିକ ଭାଷା (ଆଇଏସ୍ଏଲ୍) ରେ ଅନୁବାଦ, ଏକ ଜାତୀୟ ଆଇନଗତ ସାଙ୍କେତିକ ଭାଷା ସମ୍ବଳ କେନ୍ଦ୍ର ସୃଷ୍ଟି, ଆଇଏସ୍ଏଲ୍ରେ ଆଇନ ଏବଂ ଆଇନଗତ ଦଲିଲ ପ୍ରକାଶନ, ଆଇନଗତ ଶିକ୍ଷାରେ ଆଇଏସ୍ଏଲର ସମନ୍ୱୟ ଏବଂ ନ୍ୟାୟର ଉପଲବ୍ଧତାରେ ଥିବା ବ୍ୟବଧାନକୁ ପୂରଣ କରିବା ସହ ଭିନ୍ନକ୍ଷମ ନାଗରିକଙ୍କ ପାଇଁ ଦେଶର ଆଇନଗତ ବ୍ୟବସ୍ଥାରେ ସମାନ ଅଂଶଗ୍ରହଣ ସୁନିଶ୍ଚିତ କରିବା ଲକ୍ଷ୍ୟରେ ଅନୁବାଦ ପ୍ରକଳ୍ପ ପାଇଁ ସରକାରୀ ପାଣ୍ଠି ଦାବି କରିଛନ୍ତି। ଶ୍ରୀ ତ୍ରିପାଠିଙ୍କ ଦାଖଲକୁ ବିଚାର କରି ଏନଏଚଆରସି ଲକ୍ଷ୍ୟ କରିଛି ଯେ ନ୍ୟାୟର ଉପଲବ୍ଧତାରେ ଥିବା ବ୍ୟବଧାନକୁ ପୂରଣ କରିବା ଏବଂ ଭିନ୍ନକ୍ଷମ ନାଗରିକଙ୍କ ପାଇଁ ଦେଶର ଆଇନଗତ ବ୍ୟବସ୍ଥାରେ ସମାନ ଅଂଶଗ୍ରହଣ ସୁନିଶ୍ଚିତ କରିବା ଲକ୍ଷ୍ୟରେ ଅନୁବାଦ ପ୍ରକଳ୍ପ ପାଇଁ ପଦକ୍ଷେପ ନେବାର ଏକ ଜରୁରୀ ଆବଶ୍ୟକତା ଏବଂ ସୁଯୋଗ ରହିଛି। ତଦନୁସାରେ, ଆବେଦନର ପ୍ରେରିତ କପି ଆଇନ ଏବଂ ନ୍ୟାୟ ମନ୍ତ୍ରଣାଳୟର ସଚିବ ଏବଂ ଭିନ୍ନକ୍ଷମ ବ୍ୟକ୍ତିମାନଙ୍କ ସଶକ୍ତିକରଣ ବିଭାଗ, ସାମାଜିକ ନ୍ୟାୟ ଏବଂ ସଶକ୍ତିକରଣ ମନ୍ତ୍ରଣାଳୟର ସଚିବଙ୍କୁ ସେମାନଙ୍କ ବିଚାର ପାଇଁ ଏବଂ ୧୫ ଦିନ ମଧ୍ୟରେ ଏହି ମାମଲାକୁ ଅତ୍ୟନ୍ତ ଜରୁରୀ ବୋଲି ବିଚାର କରି ଶୀଘ୍ର ମତାମତ ପ୍ରଦାନ କରିବା ପାଇଁ ପଠାଯାଇଛି।
