ନୂଆଦିଲ୍ଲୀ ୨୧-୧ (ଓଡିଆ ପୁଅ): ଦେଶରେ କରୋନା ଟୀକାକରଣ ପ୍ରକ୍ରିୟା ଆରମ୍ଭ ହୋଇଯାଇଛି। ବର୍ତ୍ତମାନ ପ୍ରଥମ ପର୍ଯ୍ୟାୟରେ ଦେଶରେ କରୋନା ଟୀକାକରଣ କରାଯାଉଛି। ଯଦିଓ କିଛି ଲୋକଙ୍କର କରୋନା ଟୀକା ଉପରେ ସନ୍ଦେହ ରହିଛି। ଏଥିପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦ୍ୱିତୀୟ ପର୍ଯ୍ୟାୟରେ କରୋନା ଟୀକା ଗ୍ରହଣ କରିବେ।
ଖବରରୁ ପ୍ରକାଶଯେ, ଦ୍ୱିତୀୟ ପର୍ଯ୍ୟାୟରେ ଟୀକାକରଣରେ ପ୍ରଧାନମନ୍ତ୍ରୀ ଏବଂ ରାଜ୍ୟ ମୁଖ୍ୟମନ୍ତ୍ରୀଙ୍କୁ କରୋନା ଟୀକାକରଣ କରାଯିବ। ଏହି ଟୀକା ବିଷୟରେ ସାଧାରଣ ଲୋକଙ୍କ ମଧ୍ୟରେ ଆତ୍ମବିଶ୍ୱାସ ବଢ଼ାଇବା ପାଇଁ ପ୍ରଧାନମନ୍ତ୍ରୀ ଏବଂ ଅନ୍ୟ ନେତାମାନେ ଏହି ଟୀକା ଗ୍ରହଣ କରିବେ। ବାସ୍ତବରେ ଟୀକାକରଣ ଦିନ ପ୍ରଧାନମନ୍ତ୍ରୀ ମୋଦୀ ନିଜେ କହିଥିଲେ ଯେ, ଟୀକାକରଣର ଦ୍ୱିତୀୟ ପର୍ଯ୍ୟାୟରେ ୫୦ ବର୍ଷରୁ ଉର୍ଦ୍ଧ ଲୋକଙ୍କୁ ଟୀକାକରଣ କରାଯିବ। ଏହା ଅଧୀନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ମଧ୍ୟ ଟୀକାକରଣ କରାଯିବ। ଏହା ବ୍ୟତୀତ ଦେଶରେ କରୋନା ଟୀକା ଉପରେ ଥିବା ଦ୍ୱନ୍ଦ୍ୱ ଏବଂ ଅବିଶ୍ୱାସ ଦୂର କରିବାକୁ ପ୍ରଧାନମନ୍ତ୍ରୀ ଟୀକା ଗ୍ରହଣ କରିବେ।
ସୂଚନାନୁସାରେ, ଲୋକସଭା ସଚିବାଳୟ ସଂସଦ ପକ୍ଷରୁ ସମସ୍ତ ସାଂସଦ ଏବଂ ସେମାନଙ୍କ ସହଯୋଗୀଙ୍କ ବିବରଣୀ ପଞ୍ଜିକରଣ କରିଛି।
କେବେ ଆରମ୍ଭ ହେବ ଦ୍ୱିତୀୟ ପର୍ଯ୍ୟାୟ ?
ଦେଶର ବଡ ରାଜନୈତିକ ବ୍ୟକ୍ତିତ୍ୱ, ରାଜ୍ୟର ମୁଖ୍ୟମନ୍ତ୍ରୀ, ରାଜ୍ୟପାଳ ଏବଂ କ୍ୟାବିନେଟର ଅନ୍ୟ ସଦସ୍ୟମାନେ ମଧ୍ୟ ଟୀକା ଗ୍ରହଣ କରିବେ ବୋଲି ବିଶ୍ୱାସ କରାଯାଉଛି। ୫୦ ବର୍ଷରୁ ଉର୍ଦ୍ଧ ସମସ୍ତ ସାଂସଦ ଏବଂ ବିଧାୟକଙ୍କୁ ମଧ୍ୟ କରୋନା ଟୀକା ଦିଆଯିବ। ଯଦିଓ ପ୍ରଥମ ପର୍ଯ୍ୟାୟ ଏପ୍ରିଲ ପର୍ଯ୍ୟନ୍ତ ଚାଲିବ। ଏହି ପର୍ଯ୍ୟାୟରେ, ଆଗ ଧାଡ଼ିରେ ଥିବା କରୋନା ଯୋଦ୍ଧାମାନଙ୍କୁ ଟୀକାକରଣ କରାଯାଉଛି।
ତଥାପି ଟୀକାକରଣର ଗତି ଅତ୍ୟନ୍ତ ମନ୍ଥର କିନ୍ତୁ ପ୍ରଥମ ପର୍ଯ୍ୟାରେ ସମୁଦାୟ ତିନି କୋଟି ଫ୍ରଣ୍ଟ ଲାଇନ କର୍ମଚାରୀଙ୍କୁ ଟୀକାକରଣ କରାଯିବ। ଏଭଳି ପରିସ୍ଥିତିରେ ଦେଶରେ ଦ୍ୱିତୀୟ ପର୍ଯ୍ୟାୟ କେବେ ଆରମ୍ଭ ହେବ ତାହା ସ୍ପଷ୍ଟ ହୋଇନାହିଁ।
