ଭଦ୍ରକ, ୨୧ା୮ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଲଘୁଚାପ ପ୍ରଭାବରେ ଉପର ମୁଣ୍ଡରେ ଲଗାଣବର୍ଷା ଯୋଗୁ କିଛିଦିନ ହେବ ଆରଡି ଅଞ୍ଚଳ ଦେଇ ପ୍ରବାହିତ ହେଉଥିବା ବୈତରଣୀ ନଦୀ ଉଛୁଳିବାରେ ଲାଗିଛି ମଙ୍ଗଳବାର ଅମାବାସ୍ୟା ତଥି ଥିବାରୁ ଉପରମୁଣ୍ଡରୁ ଆସୁଥିବା ବର୍ଷାପାଣି ନିଷ୍କାସନରେ ବାଧକ ସାଜିଛି ସମୁଦ୍ର ଜୁଆରପାଣି। ଫଳରେ ଆରଡି ନିକଟସ୍ଥ ମୁଆଁ ନିକଟରେ ପୁଣି ବୈତରଣୀ ନଦୀ କୂଳ ଲଂଘିବା ସହ କିଛିଦିନ ତଳେ ଲୁଣାବନ୍ଧ ପ୍ରାୟ ୩ଶହ ଫୁଟ ଧସି ଯାଇଥିବା ବେଳେ ମଙ୍ଗଳବାର ଜୁଆରପାଣି ମାଡରେ ୨ଶହ ଫୁଟ ଲୁଣାବନ୍ଧ ନଦୀ ମଧ୍ୟକୁ ଚାଲିଯାଇଥିବା ନଦୀକୂଳିଆ ବାସୀ ପ୍ରକାଶ କରିଛନ୍ତି। ଫଳରେ ଶହଶହ ଏକର ଚାଷଜମି ଜଳମଗ୍ନ ହୋଇ ପଡିଛି। ତାହାସହ ଶୀତଳପୁର ନିକଟରେ ପ୍ରବାହିତ ହେଉଥିବା ସାଳନ୍ଦୀ ନଦୀର ସୁରକ୍ଷାବନ୍ଧ ଗତକିଛିମାସ ହେବ ନଦୀଗର୍ଭକୁ ଚାଲିଯାଇଥିବାରୁ ଜୁଆର ସମୟରେ ନଦୀକୂଳ ଲଂଘି ଜୁଆରପାଣି ଗାଁ ଦାଣ୍ଡରେ ଲହଡି ଭାଙ୍ଗୁଛି। ମୁଆଁ ନିକଟରେ ନଦୀବନ୍ଧକୁ ସୁରକ୍ଷା ଦେବାପାଇଁ ଯାଜପୁର ଜଳସେଚନ ବିଭାଗ ପକ୍ଷରୁ ମାତ୍ର କେହିଖଣ୍ଡ ବାଉଁଶ ପାତିଆରେ ଆଡା ଦିଆଯାଇଥିଲେ ମଧ୍ୟ ବାଲିବସ୍ତା ଦିଆଯାଇନଥିବାରୁ ଉକ୍ତ ସ୍ଥାନରେ ନଦୀବନ୍ଧ ଦିନକୁଦିନ ଧସିବାରେ ଲାଗିଛି ବୋଲି ମୁଆଁ ଗାଁର ନିର୍ମଳ ଦାସ, ରକ୍ଷାକର ମଲିକ ପ୍ରମୁଖ ପ୍ରକାଶ କରିଛନ୍ତି। ଏପରିକି ତାଙ୍କ କହିବା ଅନୁଯାୟୀ ଖରାଦିନେ ନଦୀବନ୍ଧ ମରାମତି କରିବା ପାଇଁ ଯେତେ ଅଭିଯୋଗ କରିଥିଲେ ମଧ୍ୟ ବିଭାଗୀୟ ଅଧିକାରୀ କିମ୍ବା ପ୍ରଶାସନ କର୍ଣ୍ଣପାତ କରିନଥିଲେ।
