ଭଦ୍ରକ, ୩୦ା୭ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଧାମନଗର-ଷେଣ୍ଢପୁର ଭାୟା ଦୋବଲ ଓ ଧାମନଗର-ଫଳପୁର ରାସ୍ତା ନିର୍ମାଣ ଲାଗି ରାଜ୍ୟ ସରକାରଙ୍କ ପଦକ୍ଷେପ ଆରମ୍ଭ ହୋଇଛି । ଖୁବଶୀଘ୍ର ଉକ୍ତ ରାସ୍ତାର ନବକଳେବର ହେବାକୁ ଯାଉଛି । ଅପରପକ୍ଷେ ରାଜ୍ୟ ସରକାରଙ୍କ ନିର୍ଦ୍ଦେଶ ଯେତେ ସରକାରୀ ଜବରଦଖଲ ରାସ୍ତାକୁ ସରକାର ନିଜ ଅକ୍ତିଆରକୁ ନେଇ ବିଭିନ୍ନ ସରକାରୀ କାର୍ଯ୍ୟ କରିବା ପାଇଁ ପ୍ରତିଶ୍ରୁତି ଦେଇଥିବା ବେଳେ ଧାମନଗର ତହସିଲଦାର ପୁରା ଆକ୍ସନ ମୁଡରେ । ରାସ୍ତାରୁ ଜବରଦଖଲ ହଟାଇବା ଲାଗି ଧାମନଗର ତହସିଲ ପ୍ରଶାସନ କାର୍ଯ୍ୟ ଆରମ୍ଭ କରିଛି । ଆଜି ଧାମନଗର ଫଳପୁର ରାସ୍ତାର ପ୍ରବେଶ ପଥ ଧାମନଗର ବଜାର ମଝିରେ ଥିବା ହାଟ ଛକ ଉପରେ ମାପ କରାଯାଇଛି, ତାହାକୁ ଚିହ୍ନଟ କରାଯାଇଥିଲା । ଆଜି ସକାଳୁ ତହସିଲଦାର ଦୀପକ ଦାସଙ୍କ ନିର୍ଦ୍ଦେଶ କ୍ରମେ ରାସ୍ତା ଚିହ୍ନଟ ପ୍ରକ୍ରିୟା ଆରମ୍ଭ ହୋଇଥିଲା । ଏଥିଲାଗି ପୁଲିସ୍ କର୍ମଚାରୀ ମୁତୟନ ସହ ଅନ୍ୟାନ୍ୟ ବିଭାଗର ଅଧିକାରୀ ଉପସ୍ଥିତ ରହିଥିଲେ । ସୂଚନା ଥାଉକି ୩୩୩ ନଂ ଉପରେ ଥିବା ଏକ ଚାଳଘରକୁ ପ୍ରଶାସନ ପକ୍ଷରୁ ଜବରଦଖଲ ଉଚ୍ଛେଦ କରିଥିଲେ । ପ୍ରକାଶ ଥାଉକି ଧାମନଗର-ଫଳପୁର ପୂର୍ତ ବିଭାଗ ରାସ୍ତାର ପ୍ରବେଶ ପଥ ତଥା ହାଟ ଛକ ଉପରେ ୩୩୩, ୩୩୪ ଓ ୩୩୫ ପ୍ଲଟ୍ ନଂ ଉପରେ କିଛି ବ୍ୟକ୍ତି ଦୀର୍ଘଦିନ ହେବ ଜବରଦଖଲ କରି ଦୋକାନ ଗୃହ କରି ଆସୁଥିଲେ । ଯାହାଫଳରେ ରାସ୍ତାରେ ଯିବାଆସିବା କରୁଥିବା ଗାଡିଘୋଡା ପାଇଁ ଟ୍ରାଫିକ୍ ଜାମ ଲାଗି ରହିଥିଲା । ଏଣୁ ଲୋକମାନେ ହଇରାଣ ହେଉଥିଲେ । ଏନେଇ ବିଭିନ୍ନ ସମୟରେ ଉଚ୍ଛେଦ ପାଇଁ ଦାବି ହେଉଥିଲା । ପ୍ରଶାସନ ତରଫରୁ ପୂର୍ବରୁ ବିଭିନ୍ନ ସମୟରେ ମାପଚୁପ କରି ଫେଲ ମାରୁଥିଲେ । ତେବେ ନୂଆ ସରକାରଙ୍କ ନିର୍ଦ୍ଦେଶ ମତେ ଉଚ୍ଛେଦ ପ୍ରକ୍ରିୟା ପାଇଁ ପ୍ରାରମ୍ଭିକ ଭାବେ ରାସ୍ତାରୁ ଜବରଦକଲ ହଟାଇବା ଲାଗି ଧାମନଗର ତହସିଲ ପ୍ରଶାସନ କାର୍ଯ୍ୟ ଆରମ୍ଭ କରିଛି । ୩୩୩ ନଂ ପ୍ଲଟ୍ ଭାଙ୍ଗିଥିବାବେଳେ ଅନ୍ୟ ପ୍ଲଟ୍କୁ କିଛି ବ୍ୟକ୍ତି ନିଜ ନାମରେ ପଟା କରିନେଇଥିବା ଯୋଗୁଁ ଉଚ୍ଛେଦ ପ୍ରକ୍ରିୟା ସଂପୂର୍ଣ୍ଣ କରିନପାରି ଫେରିଯାଇଥିଲେ । ତେବେ ଦୀର୍ଘ ୯୦ ବର୍ଷ ଧରି ସେଠାରେ ଜବରଦଖଲ ଥିବାବେଳେ ମାତ୍ର ୯୦ ମିନିଟ୍ରେ ଉକ୍ତ ଜବରଦଖଲ ସ୍ଥାନ ଭଂଗାଯାଇଥିବାରୁ ସାଧାରଣରେ ପ୍ରଶାସନକୁ ସାଧାରଣ ଲୋକମାନେ ଧନ୍ୟବାଦ ଜଣାଇଛନ୍ତି । ତେବେ ଧାମନଗର ଫଳପୁର ଓ ଧାମନଗର ଦକ୍ଷିଣବାଡ ରାସ୍ତାର ଉଭୟ ପାଶ୍ୱର୍ର ଅନେକ ସ୍ଥାନରେ ଜବରଦଖଲ କରାଯାଇଥିବାରୁ ଜନ ସାଧାରଣ ଏବଂ ଯାନବାହନ ଯାତାୟତରେ ଅନେକ ସମସ୍ୟା ଉପୁଜିଛି । ଏ ଦିଗରେ ଜିଲାପାଳ ଦୃଷ୍ଟି ଦେବାକୁ ସାଧାରଣରେ ଦାବି ହୋଇଛି । ତେବେ ଖୁବଶୀଘ୍ର ଧାମନଗରରେ ଜବରଦଖଲ ଚିହ୍ନଟ କରାଯାଇ ଉଚ୍ଛେଦ କରାଯିବ ବୋଲି ତହସିଲଦାର ଦୀପକ ଦାସ ତାଙ୍କ ପ୍ରତିକ୍ରିୟାରେ କହିଥିଲେ । ତେବେ ଏହି ଉଚ୍ଛେଦ କାର୍ଯ୍ୟକ୍ରମରେ ଧାମନଗର ତହସିଲଦାର ଦୀପକ ଦାସ, ଏସଡିପିଓ ତ୍ରିଲୋଚନ ସେଠୀ, ଥାନା ଅଧିକାରୀ ଫନି ଭୂଷଣ ନାୟକ, ଏସଆଇ ରାଜେଶ ସେଠୀ, ବିଦ୍ୟୁତ୍ ବିଭାଗର ଏସ୍ଡିଓ, ଜେଇ ଉପସ୍ଥିତ ଥିବାବେଳେ ଆଇନ୍ ଶୃଙ୍ଖଳା ପରିସ୍ଥିତି ପାଇଁ ୨ ପ୍ଲାଟୁନ ପୁଲିସ୍ ଫୋର୍ସ ମୁତୟନ କରାଯାଇଥିଲା ।
