ଭଦ୍ରକ, ୪ା୮ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଭଦ୍ରକ ଜିଲା ତିହିଡ଼ି ବ୍ଲକ ମଙ୍ଗଳପୁର ପଂଚାୟତ ଅଧୀନ ସନ୍ଥପୁରା ଠାରେ ଥିବା ଆଦର୍ଶ ବିଦ୍ୟାଳୟର ଛାତ୍ରୀ ଲିପିପୁଷ୍ପା ଶନିବାର ଅଟୋ ଦୁର୍ଘଟଣାରେ ଗୁରୁତର ହୋଇ କଟକ ବଡ଼ଡାକ୍ତରଖାନାରେ ଚିକିତ୍ସିତ ହେଉଛନ୍ତି । ଖବର ପାଇ ଜିଲାପାଳ ସିଦ୍ଧେଶ୍ୱର ବଳିରାମ ବନ୍ଦୋର ରେଡ଼କ୍ରସ ପାଣ୍ଠିରୁ ୧୦ହଜାର ଟଙ୍କା ସହାୟତା ବିଡିଓ ଜ୍ୟୋତିର୍ମୟ କରଙ୍କ ଜରିଆରେ ଚେକ୍ ଆକାରରେ ପ୍ରଦାନ କରିଛନ୍ତି । ତେବେ ଜିଲାପାଳଙ୍କ ନିର୍ଦ୍ଦେଶକ୍ରମେ ରବିବାର ଛୁଟିଦିନରେ ବିଡିଓ ଶ୍ରୀ କର କଟକ ବଡ଼ ଡାକ୍ତରଖାନାରେ ପହଂଚି ୧୦ହଜାର ଟଙ୍କାର ସହାୟତା ଚେକ୍ ଗୁରୁତର ଛାତ୍ରୀ ଲିପିପୁଷ୍ପାଙ୍କ ମା’ ସୋମାଞ୍ଜଳି ଦାସଙ୍କୁ ପ୍ରଦାନ କରିଥିବା ଜଣାପଡ଼ିଛି । ବିଡିଓଙ୍କ ସହିତ ଆଦର୍ଶ ସ୍କୁଲର ଭାରପ୍ରାପ୍ତ ଅଧ୍ୟକ୍ଷ ଦୀପକ କୁମାର ଜେନା ସହାୟତା ପ୍ରଦାନ ବେଳେ ଉପସ୍ଥିତ ଥିଲେ । ସୂଚନା ଯୋଗ୍ୟ ଯେ ଶନିବାର ସ୍କୁଲ ଛୁଟି ହେବା ପରେ ଏକ ଅଟୋରେ ୯ଜଣ ଛାତ୍ରଛାତ୍ରୀ ତିହିଡ଼ି ଅଭିମୁଖେ ଆସୁଥିଲେ । ଅଟୋଟି ଆରୁହା ଛକ ନିକଟରେ ଠିଆ ହୋଇଥିବା ଏକ ଟାଟା ମ୍ୟାଜିକ୍ ଗାଡ଼ିକୁ ଧକ୍କା ଦେଇ ଭାରସାମ୍ୟ ହରାଇ ଓଲଟି ପଡ଼ିଥିଲା । ଏଥିରେ ଛାତ୍ରୀ ଲିପିପୁଷ୍ପାଙ୍କ ସମେତ ୯ଜଣ ଆହତ ହୋଇଥିଲେ ।
